Bìoball air-loidhne

撒母耳記上卷 18 - 現代台語譯本羅馬字版

¹ Tāi-pi̍t kap Sò-lô ōe kóng soah. Iok-ná-tan kap Tāi-pi̍t sim kat saⁿ-liân; Iok-ná-tan thiàⁿ i chhin-chhiūⁿ thiàⁿ ka-kī ê sìⁿ-miā.

² Tùi hit-ji̍t khí, Sò-lô kā Tāi-pi̍t lâu tī sin-piⁿ, bô hō͘ i tò-tńg-khì in lāu-pē ê chhù.

³ Iok-ná-tan kap Tāi-pi̍t nn̄g lâng kiat-iok, in-ūi Iok-ná-tan thiàⁿ Tāi-pi̍t chhin-chhiūⁿ ka-kī ê sìⁿ-miā.

⁴ Iok-ná-tan thǹg i ê gōa-saⁿ hō͘ Tāi-pi̍t, koh chiong kun-ho̍k, liân to, keng, io-tòa mā lóng hō͘ i.

⁵ Sò-lô bô-lūn phài Tāi-pi̍t khì tó-ūi, Tāi-pi̍t só͘ chòe--ê lóng sūn-lī, só͘-í Sò-lô phài i chòe pō͘-tūi ê chí-hui-koaⁿ; chèng-lâng kap Sò-lô ê koaⁿ-tiúⁿ lóng chin boán-ì.

Sò-lô Oàn-tò͘ Tāi-pi̍t

⁶ Tāi-pi̍t phah-sí Ko-lī-a tò--lâi ê sî, só͘-ū ê hū-lú tùi Í-sek-lia̍t ta̍k-ê siâⁿ-chhī chng-siā chhut--lâi, chhiùⁿ-koa, thiàu-bú, phah lin-long-kó͘, tôaⁿ-khîm chok-ga̍k lâi gêng-chiap Sò-lô-ông.

⁷ Hiah-ê hū-lú thiàu-bú, ū-ê chhiùⁿ, ū-ê ìn, kóng: Sò-lô thâi-sí chheng-chheng; Tāi-pi̍t thâi-sí bān-bān.

⁸ Sò-lô hui-siông siū-khì, bô hoaⁿ-hí chit-ê ōe, chiū kóng, “Chiong bān-bān hō͘ Tāi-pi̍t, chheng-chheng hō͘ góa, chhun ông-ūi iáu-bē hō͘ i nā-tiāⁿ.”

⁹ Tùi hit-ji̍t khí, Sò-lô khòaⁿ-tio̍h Tāi-pi̍t chiū kā i gîn.

¹⁰ Keh-ji̍t, tùi Siōng-tè hia lâi ê pháiⁿ-sîn oân-choân khòng-chè Sò-lô, i chiū tī chhù-lāi khai-sí loān kóng-ōe. Tāi-pi̍t chiàu-siông ēng chhiú tôaⁿ-khîm; Sò-lô chhiú--ni̍h ū gia̍h chhiuⁿ,

¹¹ chiū kā hit-ki chhiuⁿ siā--khì, siūⁿ-kóng, “Góa beh kā Tāi-pi̍t siā thàng-kè, kā i tèng tī piah--ni̍h.” Tāi-pi̍t ū nn̄g piàn siám-khui.

¹² Sò-lô kiaⁿ Tāi-pi̍t, in-ūi Siōng Chú lī-khui i, kap Tāi-pi̍t tông-chāi.

¹³ In-ūi án-ni, Sò-lô hō͘ Tāi-pi̍t lī-khui, phài i chí-hui chi̍t-chheng ê peng. Tāi-pi̍t chiū chòe thâu léng-tō kun-tūi.

¹⁴ Tāi-pi̍t só͘ chòe ê tāi-chì lóng sêng-kong, in-ūi Siōng Chú kap i tông-chāi.

¹⁵ Sò-lô khòaⁿ-tio̍h Tāi-pi̍t só͘ chòe ê tāi-chì lóng sêng-kong, chiū koh-khah kiaⁿ i.

¹⁶ M̄-kú Í-sek-lia̍t kap Iû-tāi ê jîn-bîn lóng ióng-hō͘ Tāi-pi̍t, in-ūi i lóng chòe thâu léng-tō.

Tāi-pi̍t Chhōa Sò-lô ê Cha-bó͘-kiáⁿ

¹⁷ Sò-lô kā Tāi-pi̍t kóng, “Góa ê tōa cha-bó͘-kiáⁿ Bí-la hō͘ lí chòe bó͘, m̄-kú lí tio̍h chòe góa chīn-tiong ê ióng-sū, ūi Siōng Chú kau-chiàn.” Sò-lô sim-lāi siūⁿ, “Góa m̄-thang chhin-chhiú hāi i, tio̍h chioh Hui-lī-sū-lâng ê to hō͘ i sí.”

¹⁸ Tāi-pi̍t kā Sò-lô kóng, “Góa sǹg sím-mi̍h? Góa ū sím-mi̍h sin-hūn? Goán ê ka-cho̍k tī Í-sek-lia̍t tiong sǹg sím-mi̍h? Góa ná ū chu-keh thang chòe ông ê kiáⁿ-sài?”

¹⁹ Sò-lô ê cha-bó͘-kiáⁿ Bí-la eng-kai kap Tāi-pi̍t sêng-chhin ê sî kàu, Sò-lô kèng-jiân chiong i hō͘ Bí-hô-la-lâng A-tek-lia̍t chòe bó͘.

²⁰ Sò-lô lēng-gōa chi̍t ê cha-bó͘-kiáⁿ Bí-kah ài Tāi-pi̍t; ū lâng kā Sò-lô kóng, Sò-lô thiaⁿ-liáu chin hoaⁿ-hí.

²¹ Sò-lô sim-lāi kóng, “Góa chiong chit-ê cha-bó͘-kiáⁿ kè hō͘ i, chòe lô-bāng, thang chioh Hui-lī-sū-lâng ê chhiú hāi-sí Tāi-pi̍t.” Sò-lô tē-jī piàn kā Tāi-pi̍t kóng, “Lí thang chòe góa ê kiáⁿ-sài.”

²² Sò-lô chiū hoan-hù jîn-sîn kóng, “Lín su-hā kā Tāi-pi̍t kóng, ‘Ông chin kah-ì lí; jîn-sîn mā chin ài lí, án-ni lí thang chòe ông ê kiáⁿ-sài.’”

²³ Sò-lô ê jîn-sîn chiong chiah-ê ōe kóng hō͘ Tāi-pi̍t thiaⁿ; Tāi-pi̍t kóng, “Lín siūⁿ, chòe ông ê kiáⁿ-sài kiám sī sió-sū? Góa put-kò sī sòng-hiong pi-bî ê lâng.”

²⁴ Sò-lô ê jîn-sîn chiong Tāi-pi̍t só͘ kóng--ê kā i hôe-ho̍k.

²⁵ Sò-lô kóng, “Lín tio̍h kā Tāi-pi̍t kóng, ông bô ài sím-mi̍h phèng-lé, chí-ū ài chi̍t-pah ê Hui-lī-sū-lâng ê pau-phê, thang thòe ông kā tùi-te̍k pò-ho̍k.” Sò-lô ê khì-tô͘ sī beh hō͘ Tāi-pi̍t sí tī Hui-lī-sū-lâng ê chhiú-ē.

²⁶ Sò-lô ê jîn-sîn chiong chiah-ê ōe kā Tāi-pi̍t kóng, Tāi-pi̍t chiū goān-ì chòe ông ê kiáⁿ-sài. Chí-tēng ê ji̍t-kî kàu í-chêng,

²⁷ Tāi-pi̍t chhōa pō͘-hā khì thâi-sí nn̄g-pah ê Hui-lī-sū-lâng. Tāi-pi̍t chiong hiah-ê pau-phê choân-sò͘ hiàn hō͘ ông, thang chòe ông ê kiáⁿ-sài. Sò-lô chiū chiong cha-bó͘-kiáⁿ Bí-kah hō͘ Tāi-pi̍t chòe bó͘.

²⁸ Sò-lô khòaⁿ-chhut Siōng Chú kap Tāi-pi̍t tông-chāi, koh chai cha-bó͘-kiáⁿ Bí-kah mā ài Tāi-pi̍t,

²⁹ Sò-lô chiū koh-khah kiaⁿ Tāi-pi̍t, kui-sì-lâng kap Tāi-pi̍t choh-tùi.

³⁰ Hui-lī-sū ê siú-léng siông-siông chhut-lâi kong-kek Í-sek-lia̍t-lâng; ta̍k-piàn kau-chiàn, Tāi-pi̍t ê chiàn-kó lóng pí Sò-lô ê koaⁿ-tiúⁿ khah hui-hông. Tāi-pi̍t ê miâ-siaⁿ jú lâi jú hiáng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan