Bìoball air-loidhne

撒母耳記上卷 17 - 現代台語譯本羅馬字版

Ko-lī-a Thiau-chiàn Í-sek-lia̍t-lâng

¹ Hui-lī-sū-lâng chū-chi̍p kun-tūi beh kau-chiàn; in tī Iû-tāi ê So-ko chi̍p-ha̍p, tī So-ko kap A-se-ka tiong-kan ê Í-hut Tāi-bín chat-iâⁿ.

² Sò-lô kap Í-sek-lia̍t-lâng mā chū-chi̍p, tī Í-la ê soaⁿ-kok chat-iâⁿ, pâi-tīn beh tùi-khòng Hui-lī-sū-lâng.

³ Hui-lī-sū-lâng kap Í-sek-lia̍t-lâng hun-pia̍t tī nn̄g pêng ê soaⁿ pâi-tīn, tiong-kan ū soaⁿ-kok keh-khui.

⁴ Ū chi̍t ê Hui-lī-sū ióng-sū Ka-te̍k-lâng Ko-lī-a tùi iâⁿ-lāi kiâⁿ--chhut-lâi, ǹg Í-sek-lia̍t-lâng thiau-chiàn; i koân saⁿ kong-chhioh khah ke,

⁵ thâu-khak tì tâng ê thâu-khoe, seng-khu chhēng ū lân ê chiàn-kah, chiàn-kah tāng gō͘-cha̍p-chhit kong-kun,

⁶ tōa-thúi ēng tâng ê kah pó-hō͘, keng-thâu phāiⁿ chi̍t ki tâng ê chhiuⁿ;

⁷ chhiuⁿ ê pìⁿ chhin-chhiūⁿ chit-pò͘-ki ê chhia-sim hiah chho͘; kan-ta chhiuⁿ ê thâu ê thih chiū ū chhit kong-kun tāng; i ê thâu-chêng ū chi̍t ê lâng kā i giâ tún-pâi.

⁸ I khiā--teh, tùi Í-sek-lia̍t kun-tūi hoah kóng, “Lín pâi-tīn beh chhòng siáⁿ? Góa sī Hui-lī-sū ê ióng-sū, lín sī Sò-lô ê pō͘-hā. Lín kéng chi̍t ê lâng lo̍h-lâi chia,

⁹ i nā ū châi-tiāu kap góa tàu su-iâⁿ, koh kā góa thâi-sí, goán chiū chòe lín ê lô͘-châi; i nā hō͘ góa thâi-sí, lín chiū chòe goán ê lô͘-châi ho̍k-sāi goán.”

¹⁰ Hit-ê Hui-lī-sū-lâng koh kóng, “Kin-á-ji̍t góa tùi Í-sek-lia̍t kun-tūi chhiàng-siaⁿ; hó-táⁿ phài chi̍t ê kap góa piàⁿ siⁿ-sí!”

¹¹ Sò-lô kap Í-sek-lia̍t kun-peng thiaⁿ-tio̍h Hui-lī-sū-lâng chiah-ê ōe, lóng chin lún, chin kiaⁿ.

¹² Tāi-pi̍t sī Iû-tāi Pek-lī-hêng ê Í-hoat-tha-lâng Iâ-se ê kiáⁿ. Iâ-se ū poeh ê kiáⁿ. Sò-lô choh-ông ê sî, Iâ-se nî-hè chōe, í-keng lāu.

¹³ Iâ-se saⁿ ê khah tōa-hàn ê kiáⁿ lóng tè Sò-lô chhut-cheng; siōng-tōa--ê kiò-chòe Í-lī-ap, tē-jī--ê A-pí-ná-ta̍t, tē-saⁿ--ê Sa-má.

¹⁴ Tāi-pi̍t sī soah-bé-kiáⁿ; hit saⁿ ê hiaⁿ-ko kun-tè Sò-lô ê sî,

¹⁵ Tāi-pi̍t ūi-tio̍h beh chhī in lāu-pē ê iûⁿ-kûn, tī Pek-lī-hêng kap Sò-lô hia lâi-lâi-khì-khì.

¹⁶ Hit-ê Hui-lī-sū-lâng chá-àm chhut-lâi thiau-chiàn, ū sì-cha̍p ji̍t kú.

¹⁷ Ū chi̍t ji̍t, Iâ-se kā i ê kiáⁿ Tāi-pi̍t kóng, “Lí kín chiong pē-hó ê be̍h-sūi cha̍p kong-kun, kap cha̍p ê piáⁿ the̍h-khì kun-iâⁿ hō͘ lín hiaⁿ-ko;

¹⁸ koh tòa cha̍p tè chhì-jù, sàng hō͘ in ê chí-hui-koaⁿ. Khì khòaⁿ lín hiaⁿ-ko ū pêng-an bô, sòa tòa chèng-kù tńg--lâi.

¹⁹ Sò-lô kap lín saⁿ ê hiaⁿ-ko, í-ki̍p Í-sek-lia̍t chèng-lâng, tī Í-la ê soaⁿ-kok kap Hui-lī-sū-lâng teh kau-chiàn.”

²⁰ Tē-jī ji̍t thàu-chá, Tāi-pi̍t chiong iûⁿ-kûn kau hō͘ pa̍t-lâng kò͘, chiū chiàu Iâ-se ê hoan-hù tòa chia̍h-mi̍h khì kàu kun-iâⁿ; hit-sî kun-tūi tú-á chhut-khì chiàn-tiûⁿ, hoah-siaⁿ beh kau-chiàn.

²¹ Í-sek-lia̍t-lâng kap Hui-lī-sū-lâng lóng pâi-tīn sio-tùi.

²² Tāi-pi̍t kā mi̍h-kiāⁿ kau-tài kò͘-siú ê lâng, chiū cháu-khì chiàn-tiûⁿ, kā i ê hiaⁿ-ko chhéng-an.

²³ I kap in kóng-ōe ê sî, khòaⁿ-tio̍h hit-ê Hui-lī-sū ê ióng-sū Ka-te̍k-lâng Ko-lī-a tùi iâⁿ-lāi chhut--lâi, kā Í-sek-lia̍t-lâng kóng kâng-khoán ê ōe; Tāi-pi̍t lóng ū thiaⁿ--tio̍h.

²⁴ Í-sek-lia̍t chèng-lâng chi̍t-ē khòaⁿ-tio̍h hit-ê lâng chiū kiaⁿ-hiâⁿ tô-cháu.

²⁵ Í-sek-lia̍t-lâng kóng-lâi-kóng-khì, “Hit-ê kiâⁿ--chhut-lâi ê lâng, lín ū khòaⁿ--tio̍h-bô? I chhut-lâi kā Í-sek-lia̍t-lâng chhiàng-siaⁿ. Kā i thâi-sí ê lâng, ông ū chi̍t tōa-pit chióng-kim beh hō͘ i, mā beh chiong cha-bó͘-kiáⁿ kè hō͘ i, koh hō͘ in lāu-pē choân-ke bián la̍p sè-kim, bián ho̍k-sāi ông.”

²⁶ Tāi-pi̍t mn̄g khiā tī i sin-piⁿ hiah-ê lâng, “Thâi-sí hit-ê Hui-lī-sū-lâng, sóe-tû Í-sek-lia̍t ê kiàn-siàu chit-ê lâng ōe tit-tio̍h sím-mi̍h? Hit-ê bô siū kat-lé ê Hui-lī-sū-lâng sī siáⁿ-lâng, koh káⁿ kā éng-oa̍h Siōng-tè ê kun-tūi chhiàng-siaⁿ!”

²⁷ Kun-peng chiū chiàu chêng ê ōe kā Tāi-pi̍t hôe-tap, kóng thâi-sí hit-ê lâng--ê, ōe-tàng tit-tio̍h sím-mi̍h pò-siúⁿ.

²⁸ Tāi-pi̍t ê tōa-hiaⁿ Í-lī-ap thiaⁿ-tio̍h Tāi-pi̍t kap lâng kóng-ōe, chiū tùi i hoat siū-khì, kóng, “Lí ná lâi chia? Khòng-iá hit kúi chiah iûⁿ lí pàng hō͘ siáⁿ-lâng kò͘? Góa chai, lí ké-gâu; lí teh siūⁿ siáⁿ góa lóng chai. Lí lâi sī beh khòaⁿ lâng sio-thâi.”

²⁹ Tāi-pi̍t kóng, “Góa bô chòe sím-mi̍h, mn̄g chi̍t-ē iā bōe-ēng--tit o͘h?”

³⁰ Tāi-pi̍t chiū lī-khui khì chhē pa̍t-lâng, mn̄g kâng-khoán būn-tôe, kun-peng mā ēng kâng-khoán ê ōe ìn i.

³¹ Ū lâng thiaⁿ-tio̍h Tāi-pi̍t kóng ê ōe, chiū khì kā Sò-lô pò-kò; Sò-lô chiū phài lâng kiò Tāi-pi̍t lâi.

³² Tāi-pi̍t kā Sò-lô kóng, “Lán m̄-bián kiaⁿ hit-ê Hui-lī-sū-lâng, chhiáⁿ hō͘ lí ê po̍k-jîn khì kap i koat-tàu.”

³³ Sò-lô tùi Tāi-pi̍t kóng, “Lí bô hoat-tō͘ kap chit-ê Hui-lī-sū-lâng koat-tàu; lí iáu chió-hè, m̄-kú i tùi siàu-liân chiū chòe chiàn-sū.”

³⁴ Tāi-pi̍t kā Sò-lô kóng, “Góa kā goán lāu-pē kò͘-iûⁿ ê sî, ū sai á-sī hîm lâi kā iûⁿ-á;

³⁵ góa chiū kā jip, kā phah, chiong iûⁿ-á tùi in ê chhùi kiù--chhut-lâi. Sai á-sī hîm nā beh kā góa, góa chiū cháng i ê chhùi-chhiu, kā i phah-sí.

³⁶ Góa bat phah-sí sai kap hîm; chit-ê bô siū kat-lé ê Hui-lī-sū-lâng, góa mā beh án-ni kā phah-sí, in-ūi i biáu-sī éng-oa̍h Siōng-tè ê kun-tūi.”

³⁷ Tāi-pi̍t koh kóng, “Siōng Chú ū kiù góa thoat-lī sai kap hîm ê jiáu, I mā ōe kiù góa thoat-lī chit-ê Hui-lī-sū-lâng ê chhiú.” Sò-lô kā Tāi-pi̍t kóng, “Lí khì, Siōng Chú kap lí tông-chāi.”

³⁸ Sò-lô chiū ēng ka-kī ê kun-ho̍k hō͘ Tāi-pi̍t chhēng, ēng tâng ê thâu-khoe hō͘ i tì, koh hō͘ i chhēng chiàn-kah.

³⁹ Tāi-pi̍t kā to hâ--teh. In-ūi i bô koàn-sì chhēng chiah-ê, chiū chhì kiâⁿ khòaⁿ-bāi leh, jiân-āu kā Sò-lô kóng, “Chhēng chiah-ê góa kiâⁿ bōe khì, in-ūi bōe koàn-sì.” Tāi-pi̍t chiū lóng thǹg--khí-lâi.

⁴⁰ Tāi-pi̍t chhiú gia̍h koáiⁿ-á, khì khoe-piⁿ kéng gō͘ lia̍p kng-ku̍t ê chio̍h-thâu, khǹg tī i kò͘-iûⁿ teh ēng ê tē-á, chhiú the̍h hìⁿ-soh, jiân-āu kiâⁿ-óa hit-ê Hui-lī-sū-lâng.

⁴¹ Siâng-sî, hit-ê Hui-lī-sū-lâng mā kiâⁿ-óa Tāi-pi̍t; gia̍h tún-pâi ê peng kiâⁿ tī thâu-chêng.

⁴² Hit-ê Hui-lī-sū-lâng khòaⁿ-tio̍h Tāi-pi̍t, chiū khòaⁿ-khin i; in-ūi i siàu-liân, âng-ko-chhiah-chhi̍h, siⁿ-chòe eng-chùn.

⁴³ Hit-ê Hui-lī-sū-lâng tùi Tāi-pi̍t kóng, “Góa kiám sī káu? Lí gia̍h koáiⁿ-á beh chhòng siáⁿ?” Hui-lī-sū-lâng chiū kí ka-kī ê sîn-bêng chiù-chó͘ Tāi-pi̍t.

⁴⁴ Hit-ê Hui-lī-sū-lâng koh kā Tāi-pi̍t kóng, “Lâi, góa beh ēng lí ê bah chhī chiáu-á kap iá-siù.”

⁴⁵ Tāi-pi̍t tùi hit-ê Hui-lī-sū-lâng kóng, “Lí sī gia̍h to, gia̍h tn̂g-chhiuⁿ, té-chhiuⁿ lâi kong-kek góa; góa sī hōng Siōng Chú — Bān-kun ê Thóng-sòe ê miâ, chiū-sī lí só͘ biáu-sī Í-sek-lia̍t kun-tūi ê Siōng-tè, lâi kong-kek lí.

⁴⁶ Kin-á-ji̍t Siōng Chú beh chiong lí kau tī góa ê chhiú; góa beh kā lí thâi-sí, kā lí chām-thâu. Kin-á-ji̍t góa beh ēng Hui-lī-sū kun-peng ê sin-si chhī chiáu-á kap iá-siù, hō͘ choân sè-kài ê lâng lóng chai Í-sek-lia̍t ū Siōng-tè;

⁴⁷ koh hō͘ só͘-ū chū-chi̍p tī chia ê lâng lóng chai, Siōng Chú hō͘ lâng tek-sèng m̄-sī ēng to, m̄-sī ēng chhiuⁿ. Kau-chiàn ê sèng-pāi Siōng Chú teh koat-tēng; I beh chiong lín kau tī goán ê chhiú.”

⁴⁸ Ko-lī-a kiâⁿ chìn-chêng beh kong-kek Tāi-pi̍t. Tāi-pi̍t kóaⁿ-kín cháu chìn-chêng khì gêng-chiàn.

⁴⁹ Tāi-pi̍t tùi tē-á lāi the̍h chi̍t lia̍p chio̍h-thâu chhut--lâi, ēng hìⁿ-soh hìⁿ--khì, tìm-tio̍h Ko-lī-a ê thâu-hia̍h, chio̍h-thâu chǹg-ji̍p thâu-hia̍h, i chiū tó--lo̍h-khì, bīn phak tī tōe--ni̍h.

⁵⁰ Án-ni, Tāi-pi̍t bô ēng to, chí-ū ēng hìⁿ-soh kap chio̍h-thâu chiū phah-sí Ko-lī-a.

⁵¹ Tāi-pi̍t cháu--khì, ta̍h tī Ko-lī-a ê seng-khu téng, jiân-āu chiong i ê to pu̍ih--chhut-lâi, kā i thâi-sí, chám-tn̄g i ê thâu. Hui-lī-sū-lâng khòaⁿ-tio̍h in ê ióng-sū í-keng sí, chiū lóng tô-cháu.

⁵² Í-sek-lia̍t-lâng kap Iû-tāi-lâng chiū ná hoah-hiàm ná tui-sat Hui-lī-sū-lâng, tui kàu Ka-te̍k kap Í-kek-lûn ê siâⁿ-mn̂g; tùi Sa-la-im kàu Ka-te̍k kap Í-kek-lûn, iân-lō͘ lóng sī si-thé.

⁵³ Í-sek-lia̍t-lâng tui-sat Hui-lī-sū-lâng liáu-āu, tò-tńg-lâi chhiúⁿ-toa̍t in ê iâⁿ-tōe.

⁵⁴ Tāi-pi̍t chiong Ko-lī-a ê thâu tòa kàu Iâ-lō͘-sat-léng, m̄-kú kā i ê kun-khì khǹg tī ka-kī ê pò͘-pîⁿ.

Sò-lô Tiàu-kiàn Tāi-pi̍t

⁵⁵ Sò-lô khòaⁿ-tio̍h Tāi-pi̍t khì gêng-chiàn Hui-lī-sū-lâng ê sî, mn̄g goân-sòe Ap-nî-ní kóng, “Ap-nî-ní, hit-ê siàu-liân-lâng sī siáⁿ-lâng ê kiáⁿ?” Ap-nî-ní kóng, “Góa kí ông ê sìⁿ-miā chiù-chōa, góa m̄ chai.”

⁵⁶ Ông kóng, “Lí khì mn̄g-khòaⁿ hit-ê siàu-liân-lâng sī siáⁿ-lâng ê kiáⁿ.”

⁵⁷ Tāi-pi̍t phah-sí Ko-lī-a tò--lâi, Ap-nî-ní chiū chhōa i lâi kìⁿ Sò-lô, i ê chhiú iáu kōaⁿ Ko-lī-a ê thâu.

⁵⁸ Sò-lô mn̄g i kóng, “Siàu-liân-lâng, lí sī siáⁿ-lâng ê kiáⁿ?” Tāi-pi̍t kóng, “Góa sī lí ê po̍k-jîn Pek-lī-hêng-lâng Iâ-se ê kiáⁿ.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan