Bìoball air-loidhne

撒母耳記上卷 16 - 現代台語譯本羅馬字版

Tāi-pi̍t Siū Soán-li̍p Chòe Ông

¹ Siōng Chú kā Sat-bó-ní kóng, “Góa í-keng khì-sak Sò-lô, bô ài i koh choh Í-sek-lia̍t-ông, lí beh ūi-tio̍h i iu-siong jōa kú? Lí ēng iû kā kak tóe hō͘ móa, chún-pī chhut-hoat, góa beh chhe lí khì Pek-lī-hêng-lâng Iâ-se hia; góa tī i ê kiáⁿ tiong-kan í-keng kéng chi̍t ê beh choh-ông.”

² Sat-bó-ní kóng, “Góa ná thang khì? Sò-lô nā thiaⁿ--tio̍h ōe thâi góa.” Siōng Chú kóng, “Lí tòa chi̍t chiah bú ê gû-á khì, kóng lí sī beh khì hiàn-chè hō͘ Siōng Chú.

³ Lí tio̍h chhiáⁿ Iâ-se lâi hù chit-ê chè-sū; góa beh chí-sī lí eng-kai chòe ê sū; góa kā lí chí-sī hit-ê lâng, lí tio̍h thòe góa kā i boah-iû choh-ông.”

⁴ Sat-bó-ní chiàu Siōng Chú ê ōe khì chòe, khì kàu Pek-lī-hêng; siâⁿ-lāi ê tiúⁿ-ló lóng phi̍h-phi̍h-chhoah chhut-lâi gêng-chiap i, kóng, “Lí kiám sī tòa pêng-an lâi?”

⁵ I kóng, “Sī, sī tòa pêng-an lâi. Góa lâi sī beh hiàn-chè hō͘ Siōng Chú. Lín tio̍h kiat-chēng ka-kī, kap góa chòe-hé hù chè-sū.” Sat-bó-ní chiū kā Iâ-se kap i ê kiáⁿ kiat-chēng, jiân-āu chhiáⁿ in chham-ka chè-sū.

⁶ In lâi ê sî, Sat-bó-ní khòaⁿ-tio̍h Í-lī-ap, sim-lāi siūⁿ, “Khiā tī Siōng Chú bīn-chêng chit-ê it-tēng sī I só͘ soán-li̍p ê lâng.”

⁷ M̄-kú Siōng Chú kā Sat-bó-ní kóng, “M̄-thang khòaⁿ i ê gōa-piáu, sin-châi tōa-hàn; góa kéng--ê m̄-sī chit-ê. Siōng Chú teh khòaⁿ bô chhin-chhiūⁿ lâng teh khòaⁿ; lâng khòaⁿ gōa-piáu, Siōng Chú khòaⁿ lāi-sim.”

⁸ Āu-lâi Iâ-se kiò A-pí-ná-ta̍t tùi Sat-bó-ní bīn-chêng kiâⁿ--kè; Sat-bó-ní kóng, “Siōng Chú mā bô kéng chit-ê.”

⁹ Iâ-se koh kiò Sa-má keng-kè; Sat-bó-ní kóng, “Siōng Chú mā bô kéng chit-ê.”

¹⁰ Iâ-se hō͘ i chhit ê kiáⁿ lóng tùi Sat-bó-ní bīn-chêng kiâⁿ--kè. Sat-bó-ní kā Iâ-se kóng, “Siōng Chú lóng bô kéng in.”

¹¹ Sat-bó-ní koh kā Iâ-se kóng, “Lí ê kiáⁿ kiám lóng tī chia?” I ìn kóng, “Iáu ū chi̍t ê soah-bé-kiáⁿ, i chit-chūn teh chhī iûⁿ.” Sat-bó-ní kā Iâ-se kóng, “Lí chhe lâng khì kiò i lâi; i iáu-bē lâi, lán bô beh chē-toh.”

¹² Iâ-se phài lâng khì kiò i lâi. I âng-ko-chhiah-chhi̍h, ba̍k-chiu ū-sîn, siⁿ-chòe eng-chùn. Siōng Chú kóng, “Chit-ê chiū-sī; lí kā i boah-iû.”

¹³ Sat-bó-ní chiū tī Tāi-pi̍t hiah-ê hiaⁿ-ko bīn-chêng ēng kak-lāi ê iû kā i boah. Tùi hit-ji̍t khí, Siōng Chú ê sîn oân-choân chi-phòe Tāi-pi̍t. Sat-bó-ní chiū chhut-hoat tò-khì La-má.

Tāi-pi̍t tī Sò-lô ê Kiong-lāi

¹⁴ Siōng Chú ê sîn lī-khui Sò-lô, chiū ū pháiⁿ-sîn tùi Siōng Chú hia lâi hō͘ i khí kiaⁿ-hiâⁿ.

¹⁵ Sò-lô ê jîn-sîn tùi i kóng, “Taⁿ ū pháiⁿ-sîn tùi Siōng-tè hia lâi hō͘ lí kiaⁿ-hiâⁿ.

¹⁶ Chhiáⁿ ông bēng-lēng kun-sûi lí ê pō͘-hā chhē chi̍t ê gâu tôaⁿ-khîm ê lâng lâi, án-ni, tùi Siōng-tè hia lâi ê pháiⁿ-sîn lâi ê sî, kiò i tôaⁿ-khîm, lí chiū ōe hó.”

¹⁷ Sò-lô kā i ê jîn-sîn kóng, “Lín kā góa chhē chi̍t ê gâu tôaⁿ-khîm--ê, kā i chhōa-lâi góa chia.”

¹⁸ Ū chi̍t ê siàu-liân-lâng kóng, “Góa bat khòaⁿ-tio̍h Pek-lī-hêng-lâng Iâ-se chi̍t ê kiáⁿ gâu tôaⁿ-khîm; i sī ióng-kám ê chiàn-sū, kháu-châi hó, gōa-piáu eng-chùn, koh ū Siōng Chú kap i tông-chāi.”

¹⁹ Sò-lô chhe sù-chiá khì kìⁿ Iâ-se, kóng, “Chhiáⁿ lí khì kiò lí hit-ê teh kò͘-iûⁿ ê kiáⁿ Tāi-pi̍t lâi góa chia.”

²⁰ Iâ-se chiū kiò i ê kiáⁿ Tāi-pi̍t ēng lû-á chài chin chōe piáⁿ, chi̍t phê-tē chiú, kap chi̍t chiah soaⁿ-iûⁿ-á, tòa-khì sàng Sò-lô.

²¹ Tāi-pi̍t kàu Sò-lô hia, kā i sū-hāu. Sò-lô chin thiàⁿ i, kéng i chòe sī-ōe, thòe Sò-lô gia̍h kun-khì.

²² Sò-lô chhe lâng khì kā Iâ-se kóng, “Góa chin kah-ì Tāi-pi̍t. Chhiáⁿ lí hō͘ i tī góa sin-piⁿ sū-hāu góa.”

²³ Ta̍k-piàn, tùi Siōng-tè hia lâi ê pháiⁿ-sîn lîm-kàu Sò-lô ê sî, Tāi-pi̍t lóng ōe tôaⁿ-khîm, Sò-lô sim-chêng chiū khin-sang, hôe-ho̍k goân-khì; pháiⁿ-sîn chiū lī-khui i.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan