Bìoball air-loidhne

撒母耳記上卷 15 - 現代台語譯本羅馬字版

Kap A-má-le̍k-lâng Kau-chiàn

¹ Sat-bó-ní kā Sò-lô kóng, “Siōng Chú chhe góa lâi kā lí boah-iû, siat-li̍p lí choh-ông, tī-lí I ê chú-bîn Í-sek-lia̍t. Só͘-í, lí tio̍h thiaⁿ-thàn Siōng Chú só͘ kóng ê ōe.

² Siōng Chú — Bān-kun ê Thóng-sòe án-ni kóng, ‘Góa beh hêng-hoa̍t A-má-le̍k-lâng, in-ūi Í-sek-lia̍t-lâng chhut Ai-ki̍p ê sî, A-má-le̍k-lâng bat chó͘-gāi te̍k-tùi in.

³ Taⁿ lí tio̍h khì phah A-má-le̍k-lâng, kā in châu-bia̍t. Sím-mi̍h to m̄-thang lâu--teh; tio̍h chiong lâm, lú, gín-á, eⁿ-á, kap gû, iûⁿ, lo̍k-tô, lû, lóng thâi-sí.’”

⁴ Sò-lô chiū tiàu-chi̍p kun-peng tī Thê-liān, tiám-sǹg jîn-sò͘, pō͘-peng jī-cha̍p-bān, Iû-tāi-lâng chi̍t-bān.

⁵ Sò-lô lâi kàu A-má-le̍k ê siâⁿ, bâi-ho̍k tī soaⁿ-kok tiong.

⁶ Sò-lô kā Ki-nî-lâng kóng, “Lín lī-khui A-má-le̍k-lâng khì pa̍t-ūi, chiah bián góa kā lín kap in chòe-chi̍t-ē châu-bia̍t; in-ūi Í-sek-lia̍t-lâng chhut Ai-ki̍p ê sî, lín bat hó khoán-thāi in.” Ki-nî-lâng chiū lī-khui A-má-le̍k-lâng.

⁷ Sò-lô kong-kek A-má-le̍k-lâng, tùi Hap-hui-la kàu Ai-ki̍p tang-pêng ê Su-ní.

⁸ I oa̍h-lia̍h A-má-le̍k-ông A-kah, thâi-sí i lóng-chóng ê jîn-bîn.

⁹ M̄-kú Sò-lô kap kun-peng lâu A-kah, kap siōng-hó ê gû, iûⁿ, gû-á, iûⁿ-á, í-ki̍p it-chhè ê hó-mi̍h, m̄-khéng kā in châu-bia̍t, chí-ū húi-bia̍t hiah-ê bô lō͘-ēng, bô kè-ta̍t ê mi̍h-kiāⁿ.

Siōng Chú Khì-sak Sò-lô

¹⁰ Siōng Chú tùi Sat-bó-ní kóng,

¹¹ “Góa hō͘-hóe soán-li̍p Sò-lô choh-ông, in-ūi i pōe-poān góa, bô chun-siú góa ê bēng-lēng.” Sat-bó-ní chin chhoeh-sim, kui-mî kiû-kiò Siōng Chú.

¹² Keh-ji̍t thàu-chá, Sat-bó-ní beh khì kìⁿ Sò-lô; ū lâng kā Sat-bó-ní kóng, “Sò-lô í-keng khì Ka-bi̍t, tī hia ūi-tio̍h ka-kī khiā chio̍h-pi, āu-lâi oat-khì Kiat-kah.”

¹³ Sat-bó-ní kàu Sò-lô hia, Sò-lô kā i kóng, “Goān Siōng Chú sù-hok lí. Góa í-keng chiàu Siōng Chú ê bēng-lēng chòe lah.”

¹⁴ Sat-bó-ní kóng, “Án-ni o͘h? Góa ná ū thiaⁿ-tio̍h gû kap iûⁿ teh háu ê siaⁿ?”

¹⁵ Sò-lô kóng, “Hiah-ê sī góa ê kun-peng tùi A-má-le̍k-lâng hia lia̍h--lâi-ê; in-ūi in lâu siōng-hó ê gû, iûⁿ, beh hiàn hō͘ Siōng Chú — lí ê Siōng-tè; kî-tha--ê goán lóng ū kā châu-bia̍t.”

¹⁶ Sat-bó-ní kā Sò-lô kóng, “Lí tiām--khì! Góa beh kā lí kóng chā-mî Siōng Chú kā góa kóng ê ōe.” Sò-lô kā i kóng, “Chhiáⁿ kóng.”

¹⁷ Sat-bó-ní kóng, “Sui-jiân lí khòaⁿ ka-kī chòe bî-sòe, Siōng Chú kiám m̄-sī hō͘ lí chòe Í-sek-lia̍t chèng chi-cho̍k ê léng-siù? Siōng Chú ēng iû boah lí choh-ông, lâi tī-lí Í-sek-lia̍t.

¹⁸ Siōng Chú koh phài lí khì, bēng-lēng lí kóng, ‘Lí khì kap siâ-ok ê A-má-le̍k-lâng kau-chiàn, tio̍h kā in lóng châu-bia̍t.’

¹⁹ Lí sī-án-chóaⁿ bô thiaⁿ-thàn Siōng Chú ê ōe, chông-khì chhiúⁿ chiàn-lī-phín, chòe Siōng Chú khòaⁿ-chòe pháiⁿ ê tāi-chì?”

²⁰ Sò-lô kā Sat-bó-ní kóng, “Góa ū thiaⁿ-thàn Siōng Chú ê bēng-lēng, chiàu I ê chí-sī khì kau-chiàn, lia̍h A-má-le̍k-ông A-kah lâi, koh thâi-sí só͘-ū ê A-má-le̍k-lâng.

²¹ M̄-kú góa ê kun-peng tùi eng-kai tio̍h húi-bia̍t ê chiàn-lī-phín tiong-kan, lâu siōng-hó ê gû kap iûⁿ, tòa-lâi Kiat-kah beh hiàn hō͘ Siōng Chú — lí ê Siōng-tè.”

²² Sat-bó-ní kóng, “Siōng Chú kiám ì-ài sio-hòa-chè kap chè-mi̍h, khah iâⁿ ì-ài lâng chun-thàn I ê ōe? Lí tio̍h chai, thiaⁿ-thàn pí hiàn-chè khah hó, sūn-thàn iâⁿ-kè iûⁿ-káng ê iû.

²³ Pōe-poān chhin-chhiūⁿ kiâⁿ siâ-su̍t sī hoān-chōe; chū-ko chhin-chhiūⁿ pài ngó͘-siōng sī siâ-ok. In-ūi lí khì-sak Siōng Chú ê ōe, I mā khì-sak lí, m̄ hō͘ lí choh-ông.”

²⁴ Sò-lô tùi Sat-bó-ní kóng, “Góa ū hoān-chōe, ûi-pōe Siōng Chú ê bēng-lēng kap lí ê ōe, in-ūi góa kiaⁿ kun-peng, thiaⁿ in ê ōe.

²⁵ Taⁿ, kiû lí sià-bián góa ê chōe, kap góa chòe-hé tò--khì, hō͘ góa thang kèng-pài Siōng Chú.”

²⁶ Sat-bó-ní kā Sò-lô kóng, “Góa m̄ kap lí tò--khì; in-ūi lí khì-sak Siōng Chú ê ōe; Siōng Chú mā khì-sak lí, m̄ hō͘ lí chòe Í-sek-lia̍t ê ông.”

²⁷ Sat-bó-ní oa̍t-tńg-sin beh lī-khui, Sò-lô khiú i ê saⁿ-á-ku, saⁿ soah li̍h--khì.

²⁸ Sat-bó-ní kā i kóng, “Kin-á-ji̍t Siōng Chú hō͘ Í-sek-lia̍t-kok kap lí toān-choa̍t koan-hē, chiong Í-sek-lia̍t-kok kau hō͘ chi̍t ê tī lí sin-piⁿ, pí lí khah hó ê lâng.

²⁹ Í-sek-lia̍t ê Tāi-lêng-chiá, bōe pe̍h-chha̍t, mā bōe kái-piàn sim-ì; in-ūi I m̄-sī sè-kan-lâng, I bōe kái-piàn sim-ì.”

³⁰ Sò-lô kóng, “Góa ū hoān-chōe; chhiáⁿ lí tī hū-ló kap Í-sek-lia̍t-lâng bīn-chêng chun-tiōng góa, kap góa chòe-hé tò--khì, hō͘ góa thang kèng-pài Siōng Chú — lí ê Siōng-tè.”

³¹ Sat-bó-ní chiū oa̍t-tńg-sin tè Sò-lô tò--khì; Sò-lô chiū kèng-pài Siōng Chú.

³² Sat-bó-ní kóng, “Lín chhōa A-má-le̍k-ông A-kah lâi góa chia.” A-kah chiū kiaⁿ-kiaⁿ-hiâⁿ-hiâⁿ lâi kàu Sat-bó-ní bīn-chêng; A-kah kóng, “Góa sí-kî kàu lah.”

³³ Sat-bó-ní kóng, “Lí bat ēng to thâi-sí hū-jîn-lâng ê kiáⁿ, lín lāu-bú ê kiáⁿ mā ōe hō͘ lâng thâi-sí.” Sat-bó-ní tī Kiat-kah, tī Siōng Chú bīn-chêng, chiong A-kah chām-chòe chi̍t-tè chi̍t-tè.

³⁴ Sat-bó-ní tò-khì La-má; Sò-lô tńg-khì Ki-pí-a i ê chhù.

³⁵ Sat-bó-ní sí í-chêng, bô koh kap Sò-lô kìⁿ-bīn; i ūi-tio̍h Sò-lô iu-siong. Siōng Chú mā in-ūi ū siat-li̍p Sò-lô chòe Í-sek-lia̍t-ông kan-khó͘-sim.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan