Bìoball air-loidhne

撒母耳記上卷 12 - 現代台語譯本羅馬字版

Sat-bó-ní ê Lī-pia̍t-sû

¹ Sat-bó-ní kā só͘-ū ê Í-sek-lia̍t-lâng kóng, “Lín tùi góa ê iau-kiû, góa lóng ū thiaⁿ--kìⁿ, chiū kā lín siat-li̍p chi̍t ê ông tī-lí lín.

² Hiān-chāi lín ū chi̍t ê ông lâi léng-tō lín. Góa í-keng nî-lāu, thâu-mn̂g pe̍h; góa ê kiáⁿ mā lóng kap lín chòe-hé. Góa tùi siàu-liân kàu taⁿ, lóng it-ti̍t teh léng-tō lín.

³ Góa tī chia. Lín tio̍h tī Siōng Chú kap I só͘ soán-li̍p ê ông bīn-chêng choh-chèng. Góa kiám bat chhiúⁿ lâng ê gû, toa̍t lâng ê lû? Bat khi-hū siáⁿ-lâng, ap-chè siáⁿ-lâng? Bat kā lâng siu hóe-lō͘ chòe bô kong-pêng ê chhâi-koat? Nā ū, góa lóng beh hêng lín.”

⁴ In ìn kóng, “Lí m̄-bat khi-hū goán, m̄-bat ap-chè goán, mā m̄-bat tùi lâng the̍h sím-mi̍h.”

⁵ I kā in kóng, “Kin-á-ji̍t, lín bōe-tàng chhē-tio̍h góa ū chòe sím-mi̍h m̄-tio̍h. Siōng Chú kap I só͘ soán-li̍p ê ông lóng ūi góa choh-chèng.” Jîn-bîn ìn kóng, “Siōng Chú choh-chèng.”

⁶ Sat-bó-ní kā jîn-bîn kóng, “Í-chêng Siōng Chú jīm-bēng Mô͘-se kap A-lûn, chhōa lín ê chó͘-sian chhut Ai-ki̍p.

⁷ Taⁿ lín tio̍h khiā hó-sè. Góa beh tī Siōng Chú ê bīn-chêng kā lín khòng-kò, kā lín thê-chhíⁿ, Siōng Chú ū ūi-tio̍h lín kap lín ê chó͘-sian chòe chin chōe chín-kiù ê tōa-sū.

⁸ Chá-chêng, Ngá-kok khì Ai-ki̍p liáu-āu, lín ê chó͘-sian ū kiû-kiò Siōng Chú, Siōng Chú chiū chhe Mô͘-se kap A-lûn chhōa in chhut Ai-ki̍p, hō͘ in tī chit-ê só͘-chāi tēng-ku.

⁹ M̄-kú in bōe-kì-tit Siōng Chú — in ê Siōng-tè, I chiū kā in kau hō͘ Hā-só ê chiong-kun Se-se-la, Hui-lī-sū-lâng, kap Mô͘-ap-ông, chhut-chāi hiah-ê lâng lâi kong-kek.

¹⁰ In kiû-kiò Siōng Chú kóng, ‘Goán ū hoān-chōe, in-ūi goán lī-khui Siōng Chú khì ho̍k-sāi Pa-le̍k kap A-su-tha-lio̍k. Kiû lí kiù goán thoat-lī tùi-te̍k ê chhiú, goán chiū beh ho̍k-sāi lí.’

¹¹ Siōng Chú chiū chhe Ki-tiân, Pa-la, Iâ-hut-tha, kap góa Sat-bó-ní, kiù lín thoat-lī sì-ûi tùi-te̍k ê chhiú, lín chiah ōe-tàng pêng-an khiā-khí.

¹² M̄-kú, A-bûn-lâng ê ông Ná-hat chi̍t-ē lâi kong-kek lín, lín chiū tùi góa kóng, ‘Goán bô ài, goán it-tēng beh ū chi̍t ê ông kā goán thóng-tī.’ Kî-si̍t Siōng Chú — lín ê Siōng-tè sī lín ê ông.

¹³ Taⁿ khòaⁿ leh, lín só͘ kéng só͘ kiû ê ông tī chia. Siōng Chú í-keng siat-li̍p chi̍t ê ông thóng-tī lín.

¹⁴ Lín nā kèng-ùi Siōng Chú, ho̍k-sāi I, thiaⁿ I ê ōe, bô ûi-pōe I ê bēng-lēng, lín kap tī-lí lín ê ông mā sūn-thàn Siōng Chú — lín ê Siōng-tè, án-ni chiū chin hó.

¹⁵ Lín nā m̄ thiaⁿ-thàn Siōng Chú ê ōe, ûi-pōe I ê bēng-lēng, Siōng Chú ê chhiú ōe kong-kek lín, chhin-chhiūⁿ chá-chêng kong-kek lín ê chó͘-sian siâng-khoán.

¹⁶ Taⁿ khiā hó-sè, lâi khòaⁿ Siōng Chú tī lín ba̍k-chiu-chêng beh chòe ê úi-tāi ê sū.

¹⁷ Kin-á-ji̍t kiám m̄-sī koah sió-be̍h bô hō͘-chúi ê sî? Góa beh kiû Siōng Chú, I ōe khí-lûi lo̍h-hō͘, hō͘ lín ia̍h chai ia̍h khòaⁿ-chhut lín ūi ka-kī iau-kiû siat-li̍p ông, tī Siōng Chú bīn-chêng sī hoān tōa-chōe.”

¹⁸ Sat-bó-ní kî-kiû Siōng Chú, Siōng Chú chiū tī chit-ji̍t khí-lûi lo̍h-hō͘; chèng-lâng chiū kiaⁿ-ùi Siōng Chú kap Sat-bó-ní.

¹⁹ In kā Sat-bó-ní kóng, “Chhiáⁿ lí thòe lí ê po̍k-jîn kî-kiû Siōng Chú — lí ê Siōng-tè, goán chiah bián sí, in-ūi goán ūi ka-kī kiû chi̍t ê ông, chin-chiàⁿ sī chōe-siōng-ka-chōe.”

²⁰ Sat-bó-ní kā jîn-bîn kóng, “M̄-bián kiaⁿ, sui-jiân lín chòe chit-ê pháiⁿ tāi-chì, m̄-kú m̄-thang phian-lī bô tè Siōng Chú; chí-ū tio̍h choân-sim ho̍k-sāi Siōng Chú;

²¹ m̄-thang phian-lī Siōng Chú khì tè hu-ké ê sîn-bêng, in-ūi in hu-ké bô lō͘-ēng, bōe-tàng kiù lín.

²² Kì-jiân Siōng Chú kéng-soán lín chòe I ê chú-bîn, ūi-tio̍h beh chhî-siú ka-kī chun-kùi ê miâ, I it-tēng bōe khì-sak lín.

²³ Góa leh, góa it-tēng put-toān thòe lín kî-tó; nā bô, góa chiū tek-chōe Siōng Chú. Góa beh chí-sī lín hó koh chèng-ti̍t ê lō͘.

²⁴ Lín chí-ū tio̍h kèng-ùi Siōng Chú, sêng-sim-si̍t-ì ho̍k-sāi I; tio̍h ōe-kì-tit I ūi-tio̍h lín só͘ chòe ê tāi-chì jōa-á-ni̍h tōa.

²⁵ Lín nā kè-sio̍k chòe pháiⁿ, lín kap lín ê ông it-tēng ōe chòe-chi̍t-ē bia̍t-bông.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan