Bìoball air-loidhne

提摩太後書 4 - 現代台語譯本羅馬字版

¹ Tī Siōng-tè kap teh-beh sím-phòaⁿ só͘-ū oa̍h-lâng kap sí-lâng ê Ki-tok Iâ-so͘ bīn-chêng, koh in-ūi Ki-tok beh hián-hiān lâi choh-ông, góa sīn-tiōng hoan-hù lí:

² Tio̍h thoân tō-lí, bô-lūn sî-ki sek-ha̍p bô sek-ha̍p lóng tio̍h kian-chhî khì thoân; tio̍h ēng chòe tōa ê nāi-sim kap kàu-tō lâi khoàn-bián, tok-chek, kó͘-lē.

^3-4 In-ūi sî-ki teh-beh kàu, hit-sî lâng thiaⁿ bōe lo̍h kiān-choân ê kà-sī, ng hī-khang m̄ thiaⁿ chin-lí, hoán-tńg thàn ka-kī ê su-io̍k, hī-khang chiūⁿ, phèng-chhiáⁿ chi̍t-ê koh chi̍t-ê kàu-su lâi kóng kah-ì thiaⁿ, bô-iáⁿ-chiah ê thoân-soat.

⁵ Chóng-sī lí hoān-sū tio̍h kín-sīn, jím-siū khó͘-lān, chòe thoân-tō-chiá ê kang-chok, chīn lí chòe Siōng-tè chhe-ēng ê pún-hūn.

⁶ Taⁿ góa hi-seng ka-kī hiàn hō͘ Siōng-tè ê sî kàu lah; chit-chūn chiū-sī góa lī-khui sè-kan ê sî.

⁷ Bí-hó ê kèng-sài góa í-keng piàⁿ liáu; tio̍h cháu ê lō͘-thêng góa í-keng cháu oân; tio̍h siú ê sìn-gióng góa í-keng kian-siú.

⁸ Gī ê hoa-koan hiān-chāi í-keng ūi góa chún-pī hó-sè, Chú — kong-gī ê Sím-phòaⁿ-chiá tī hit-ê Ji̍t beh hō͘ góa; m̄-nā hō͘ góa, mā beh hō͘ lóng-chóng him-bō͘ I hián-hiān ê lâng.

Su-jîn ê Kau-tài

⁹ Tio̍h chīn só͘-ōe kóaⁿ-kín lâi góa chia;

¹⁰ in-ūi Tí-má tham-ài hiān-sè, í-keng lī-khui góa khì Thiap-sat-lô-nî-ka; Kek-le̍k-sū mā í-keng khì Ka-lia̍p-thài, Thê-to khì That-má-thài.

¹¹ Chí-ū Lō͘-ka kap góa chòe-hé tī chia. Lí tio̍h chhōa Má-khó chòe-hé lâi, in-ūi i tùi góa ê sū-hōng chin ū pang-chān.

¹² Góa í-keng phài Chhui-ki-kó͘ khì Í-hut-só͘.

¹³ Góa tī Te̍k-lô-a lâu tī Ka-pò͘ in tau hit-niá gōa-saⁿ, lí lâi ê sî tio̍h tòa--lâi, mā tio̍h tòa hiah-ê chheh lâi, te̍k-pia̍t sī hiah-ê iûⁿ-phê ê chheh-kǹg.

¹⁴ Phah-tâng sai-hū A-le̍k-san-tāi kā góa hāi kah chin chhám; Chú ōe chiàu i ê só͘-chòe kā i pò-èng.

¹⁵ Lí ka-kī mā tio̍h tî-hông, in-ūi i ke̍k-le̍k hoán-tùi lán só͘ thoân ê sìn-sit.

¹⁶ Góa thâu chi̍t piàn sin-sò͘ ê sî bô lâng tī sin-piⁿ pang-chān góa, ta̍k-ê lóng kā góa pàng-sak. Goān chit-ê chōe bô kui tī in.

¹⁷ M̄-kú Chú ū khiā tī góa sin-piⁿ, hō͘ góa ū khùi-la̍t thang oân-chéng thoân-iông sìn-sit, hō͘ só͘-ū ê Gōa-pang-lâng lóng thiaⁿ--kìⁿ. Chòe-āu góa ū tùi sai ê chhùi siū kiù chhut.

¹⁸ Chú ōe kiù góa thoat-lī lóng-chóng ê pháiⁿ-tāi, mā ōe kiù góa chìn-ji̍p I thiⁿ--ni̍h ê Kok-tō͘. Goān êng-kng kui I, ti̍t-kàu éng-éng-oán-oán. Amen!

Chòe-āu ê Chhéng-an

¹⁹ Chhiáⁿ kā Pek-ki-la, A-ku-la, kap O-nî-sek-hut choân-ke chhéng-an.

²⁰ Í-la-to͘ kè-sio̍k tiàm tī Ko-lîm-to; Te̍k-lô-hui-mô͘ phòa-pīⁿ, góa kā i lâu tī Bí-lī-to͘.

²¹ Tio̍h chīn só͘-ōe tī tang-thiⁿ í-chêng lâi. Iú-pò͘-lô, Pò͘-tiân, Lī-ló͘, Kek-ló-tí-a, kap chèng hiaⁿ-tī chí-bē lóng beh kā lí chhéng-an.

²² Goān Chú kap lí ê sim-lêng tông-chāi! Goān Siōng-tè ê un-tián kap lín tông-chāi!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan