Bìoball air-loidhne

提摩太後書 1 - 現代台語譯本羅馬字版

¹ Góa sī Pó-lô, hōng Siōng-tè ê chí-ì choh Ki-tok Iâ-so͘ ê sù-tô͘, lâi thoân Siōng-tè só͘ èng-ún in-ūi kap Ki-tok Iâ-so͘ kiat-liân chiah ū ê oa̍h-miā.

² Góa siá-phoe hō͘ góa só͘ thiàⁿ ê kiáⁿ Thê-mô͘-thài. Goān Pē Siōng-tè kap lán ê Chú Ki-tok Iâ-so͘ sù lí un-tián, lîn-bín, kap pêng-an!

Kám-siā kap Kó͘-lē

³ Góa kám-siā góa kap lia̍t-chó͘ kâng-khoán ēng chheng-khì ê liông-sim kèng-pài ê Siōng-tè. Góa mî-ji̍t kî-tó ê sî siàu-liām lí bô-soah.

⁴ Góa siūⁿ-tio̍h lī-pia̍t ê sî lí teh lâu ba̍k-sái, chiū chin ài kìⁿ lí, thang hō͘ góa chhiong-móa hoaⁿ-hí.

⁵ Góa ōe-kì-tit lí ū sûn-chin ê sìn-sim; chit-ê sìn-sim lí ê gōa-má Lô-í kap lí ê lāu-bú Iú-nî-ki seng ū, góa siong-sìn hiān-chāi lí mā ū.

⁶ In-ūi án-ni, góa thê-chhíⁿ lí, góa kā lí àn-chhiú ê sî Siōng-tè hō͘ lí ê un-sù, tio̍h hō͘ i chhin-chhiūⁿ hé koh to̍h--khí-lâi.

⁷ In-ūi Siōng-tè hō͘ lán ê m̄-sī kiaⁿ-hiâⁿ ê sim-lêng, sī khùi-la̍t, jîn-ài, kap chū-chè ê sim-lêng.

⁸ Só͘-í, ūi-tio̍h lán ê Chú chòe kiàn-chèng m̄-thang kám-kak kiàn-siàu, mā m̄-thang in-ūi góa ūi-tio̍h Chú chòe siû-hoān lâi kám-kak kiàn-siàu; tio̍h chiàu Siōng-tè só͘ sù ê khùi-la̍t ūi-tio̍h hok-im kap góa chòe-hé siū-khó͘.

⁹ Siōng-tè kiù lán, kéng-tiàu lán chòe I ka-kī ê chú-bîn, m̄-sī kun-kù lán ê hêng-ûi, sī chiàu I ka-kī ê chí-ì kap un-tián. Chit-ê un-tián tī bān-sè í-chêng thong-kè Ki-tok Iâ-so͘ sù hō͘ lán;

¹⁰ chit-ê un-tián hiān-chāi thong-kè lán ê Kiù-chú Ki-tok Iâ-so͘ ê hián-hiān í-keng si̍t-hiān. Ki-tok í-keng húi-bia̍t sí-bông, koh thong-kè hok-im chiong bōe pāi-hoāi ê oa̍h-miā hián-bêng--chhut-lâi.

¹¹ Ūi-tio̍h chit-ê hok-im, Siōng-tè jīm-bēng góa chòe thoân-tō-chiá, sù-tô͘, kap kàu-su.

¹² Só͘-í góa chiah teh siū-khó͘. Chóng-sī góa bô kám-kak kiàn-siàu, in-ūi góa bat góa só͘ sìn ê Siōng-tè, mā chhim-sìn I ōe pó-siú I só͘ kau-thok góa--ê ti̍t-kàu hit-ê Ji̍t.

¹³ Tio̍h ēng lí tùi góa thiaⁿ--tio̍h hiah-ê kiān-choân ê tō-lí chòe bô͘-iūⁿ, kian-chhî lán kap Ki-tok Iâ-so͘ kiat-liân lâi tit--tio̍h ê sìn-sim kap jîn-ài.

¹⁴ Tio̍h kò͘-siú thong-kè tiàm tī lán lāi-bīn ê Sèng Sîn kau-thok hō͘ lí ê bí-hó ê sìn-sit.

¹⁵ Lí chai, tī A-sè-a ê lâng lóng pōe-poān góa, kî-tiong ū Hui-kiat-lō͘ kap Hek-mô͘-kî-nî.

¹⁶ Goān Chú lîn-bín O-nî-sek-hut chi̍t ke ê lâng, in-ūi i siông-siông kā góa kó͘-lē, bô in-ūi góa kòa thih-liān kám-kak kiàn-siàu,

¹⁷ tian-tò kàu Lô-má ê sî phah-piàⁿ chhē góa chhē kàu tio̍h.

¹⁸ Goān Chú hō͘ i tī hit-ê Ji̍t tit-tio̍h lîn-bín! I tī Í-hut-só͘ hiah-ni̍h gâu ho̍k-sāi góa, lí chin chheng-chhó.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan