Bìoball air-loidhne

提摩太前書 6 - 現代台語譯本羅馬字版

¹ Tī lâng ê koán-hat-ē chòe lô͘-lē--ê, tio̍h khòaⁿ ka-kī ê chú-lâng chòe kham-tit siū chhiong-hun ê chun-kèng, Siōng-tè ê miâ kap tō-lí chiah bōe siū siat-to̍k.

² Chú-lâng nā-sī sìn Chú ê, m̄-thang in-ūi in sī Chú-lāi ê hiaⁿ-tī chiū bô kā in chun-kèng; kì-jiân tùi lô͘-lē ê ho̍k-sāi lâi tit-tio̍h lī-ek ê chú-lâng sī sìn-tô͘, mā-sī só͘ kèng-ài ê lâng, lín koh-khah tio̍h un-khûn kā in ho̍k-sāi. Lí tio̍h ēng chiah-ê sū lâi kà-sī kap khoàn-bián:

Ké ê Kà-sī kap Chin ê Hù-chiok

³ Nā ū lâng kà pa̍t-khoán kàu-gī bô hû-ha̍p lán ê Chú Iâ-so͘ Ki-tok kiān-choân ê tō-lí, bô kun-kù khiân-sêng ê kàu-gī,

⁴ chiū-sī phòng-hong chū-tāi, oân-choân bû-ti, hò͘ⁿ piān-lūn, ài tī jī-bīn siōng cheng-lūn; tùi chiah-ê ín-khí oàn-tò͘, hun-cheng, húi-pòng, chhai-gî,

⁵ tì-kàu sim-su pāi-hoāi, sòng-sit chin-lí, hun-cheng bô-thêng; in siūⁿ-kóng chong-kàu sī thàn-chîⁿ ê chhiú-tōaⁿ.

⁶ Kèng-khiân koh ti-chiok ōe hō͘ lâng tit-tio̍h tōa lī-ek.

⁷ Seng-put-tài-lâi, sú-put-tài-khì;

⁸ ū thang chia̍h, ū thang chhēng, chiū tio̍h ti-chiok.

⁹ Siūⁿ-beh hoat-châi ê lâng ōe hām-lo̍h iú-he̍k, hām-chíⁿ, kap chin chōe khoán gû-gōng iú-hāi ê io̍k-bōng, hō͘ lâng tîm-lûn tì-kàu pāi-hoāi kap húi-bia̍t.

¹⁰ In-ūi tham-châi sī bān-ok ê kun-goân; ū lâng tham-ài chîⁿ-châi, siū bê phian-lī sìn-gióng, ka-kī siū-chīn khó͘-thàng.

Tùi Thê-mô͘-thài ê Chí-sī

¹¹ M̄-kú lí chit-ê sio̍k Siōng-tè ê lâng, tio̍h siám-pī chiah-ê sū. Tio̍h tui-kiû chèng-gī, kèng-khiân, sìn-sim, jîn-ài, nāi-sim, kap un-jiû.

¹² Sìn-gióng ê bí-hó kèng-sài tio̍h chīn-la̍t khì piàⁿ; tio̍h khak-pó éng-oán ê oa̍h-miā; ūi-tio̍h chit-ê oa̍h-miā lí ū siū kéng-tiàu, tī chin chōe kiàn-chèng-jîn ê bīn-chêng soan-jīn bí-hó ê sìn-gióng.

¹³ Tī sù oa̍h-miā hō͘ bān-mi̍h ê Siōng-tè, kap tùi Pâng-siu Pí-lia̍p-to soan-jīn bí-hó sìn-gióng ê Ki-tok Iâ-so͘ bīn-chêng,

¹⁴ góa hoan-hù lí tio̍h chun-siú só͘ niá-siū ê bēng-lēng, bô khoat-tiám, bô thang hiâm, ti̍t-kàu lán ê Chú Iâ-so͘ Ki-tok hián-hiān ê sî.

¹⁵ Tī sî-ki sêng-se̍k ê sî, hit-ūi eng-kai siū chheng-chàn to̍k-it-bû-jī ê Chú-cháiⁿ, bān-ông ê Ông, bān-chú ê Chú Siōng-tè, beh hō͘ I hián-hiān.

¹⁶ Siōng-tè sī to̍k-it bōe-sí, tiàm tī lâng bōe thang chiap-kūn ê kng-bêng tiong; bô lâng bat khòaⁿ-kìⁿ I, mā bô lâng ōe-tàng khòaⁿ-kìⁿ I. Goān chun-kùi kap éng-oán ê chú-koân kui tī I. Amen!

¹⁷ Tùi hiah-ê kim-sè hó-gia̍h ê lâng, lí tio̍h hoan-hù in m̄-thang kiau-ngō͘, m̄-thang chiong in ê ǹg-bāng khǹg tī bōe óa-khò--tit ê châi-bu̍t, tio̍h óa-khò chiong bān-mi̍h hong-hong-hù-hù hō͘ lán ta̍k-ê lâng hióng-siū ê Siōng-tè.

¹⁸ Tio̍h hoan-hù in chòe hó-sū, chòe khah chōe hó-sū, khóng-khài si-sià, kap lâng hun-hióng.

¹⁹ Án-ni chòe sī teh ūi ka-kī ê chiong-lâi khí-chō kian-kò͘ ê tōe-ki, khak-pó chin-chiàⁿ ê oa̍h-miā.

²⁰ Thê-mô͘-thài ah, tio̍h chhî-siú Siōng-tè kau-thok lí ê chit-chek. Tio̍h siám-pī bô kèng-khiân ê khong-tâm kap ké tì-sek ê cheng-lūn.

²¹ Ū lâng chū-chheng ū chit-khoán tì-sek, tì-kàu sìn-gióng sit-lo̍h bo̍k-phiau. Goān Siōng-tè ê un-tián kap lín tông-chāi!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan