Bìoball air-loidhne

提摩太前書 3 - 現代台語譯本羅馬字版

Kàu-hōe ê Léng-siù: Kam-tok

¹ Chit-kù ōe thang siong-sìn: Nā ū lâng ài choh kam-tok, i sī him-bō͘ bí-hó ê kang-chok.

² Só͘-í, kam-tok tio̍h bô thang hiâm, chí-ū chi̍t ê bó͘, an-hūn siú-kí, chū-chè, toan-chèng, gâu khoán-thāi chhut-gōa-lâng, gâu kà-sī;

³ bô chiú-chùi, bô hiong-pō, hoán-tńg ài un-hô, bô saⁿ-chiⁿ, bô tham-châi,

⁴ gâu koán-lí ka-kī ê ka-têng, kiáⁿ-jî ū sūn-ho̍k, sū-sū toan-chong.

⁵ Lâng nā bōe-hiáu koán-lí ka-kī ê ka-têng, ná ōe-hiáu koàn-kò͘ Siōng-tè ê kàu-hōe?

⁶ Chho͘-sìn-chiá m̄-thang hō͘ i tam-jīm kam-tok, chiah bōe chū-ko chū-tāi, hām-lo̍h kap Mô͘-kúi só͘ siū kâng-khoán ê sím-phòaⁿ.

⁷ I tī kàu-hōe-gōa mā tio̍h ū hó kiàn-chèng, chiah bián siū húi-pòng, hām-lo̍h Mô͘-kúi ê lô-bāng.

Kàu-hōe Léng-siù ê Chō͘-chhiú: Chip-sū

⁸ Chip-sū siâng-khoán mā tio̍h toan-chong, bô siang-bīn-ōe, bô hò͘ⁿ-chiú, bô tham châi-lī,

⁹ tio̍h ēng chheng-khì ê liông-sim kò͘-siú sìn-gióng ê ò-pì.

¹⁰ Chit-khoán lâng mā tio̍h seng hō͘ in chiap-siū khó-giām, nā bô thang hiâm chiah hō͘ in tam-jīm chip-sū.

¹¹ Lú chip-sū mā-sī tio̍h toan-chong, bô tiòng-siong pa̍t-lâng, an-hūn siú-kí, sū-sū tiong-si̍t.

¹² Chip-sū eng-kai chí-ū chi̍t ê bó͘, gâu koán-lí kiáⁿ-jî kap ka-kī ê ka-têng.

¹³ Chip-sū ê kang-chok nā chòe ōe hó, pún-sin ōe tit-tio̍h hó miâ-siaⁿ, mā thang chin hó-táⁿ káng-lūn in tùi Ki-tok Iâ-so͘ ê sìn-gióng.

Ko-chhim ê Ò-pì

^14-15 Góa ǹg-bāng chin kín chiū ōe khì lí hia, m̄-kú kiaⁿ-liáu khah bān kàu, góa seng siá chit-tiuⁿ phoe hō͘ lí chai lán tī Siōng-tè ê ke tio̍h án-chóaⁿ seng-oa̍h; chit-ê ke chiū-sī chin-oa̍h Siōng-tè ê kàu-hōe, iā chiū-sī chin-lí ê thiāu-chio̍h kap tōe-ki.

¹⁶ Tāi-ke lóng soan-jīn lán sìn-gióng ê ò-pì sī jōa-ni̍h tōa: Ki-tok hián-hiān chòe lâng, Sèng Sîn jīn-tēng chòe gī, tùi thiⁿ-sài chhut-hiān, tī bān-pang tiong siū soan-iông, sè-kan-lâng siong-sìn, siū chiap-la̍p ji̍p êng-iāu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan