Bìoball air-loidhne

彼得前書 5 - 現代台語譯本羅馬字版

Koàn-kò͘ Siōng-tè ê Iûⁿ-kûn

¹ Góa choh tiúⁿ-ló, koh choh Ki-tok siū-khó͘ ê kiàn-chèng-jîn, ū-hūn tī I teh-beh hián-hiān ê êng-kng, góa kā lín tiong-kan pîⁿ-pîⁿ teh choh tiúⁿ-ló ê lâng khó͘-khǹg.

² Tio̍h bo̍k-ióng Siōng-tè kau-tài lín ê iûⁿ-kûn, kā in koàn-kò͘, m̄-sī bián-kióng, sī chiàu Siōng-tè ê chí-ì kam-sim lo̍k-ì; m̄-sī ūi-tio̍h tham-châi, sī chū-goān jia̍t-sim lâi chòe.

³ Kau-tài hō͘ lín ê iûⁿ-kûn, m̄-thang ēng koân-ui koán-hat, tio̍h chòe in ê bô͘-iūⁿ.

⁴ Án-ni, lín tī Tōa-bo̍k-chiá hián-hiān ê sî ōe tit-tio̍h éng-oán bōe sit-khì kong-chhái êng-kng ê hoa-koan.

⁵ Siâng-khoán, lín siàu-liân-lâng tio̍h sūn-ho̍k tióng-pòe. Lín tāi-ke tio̍h khiam-pi saⁿ tùi-thāi; in-ūi Sèng-keng ū kì-chài: Siōng-tè te̍k-tùi kiau-ngō͘ ê lâng, si-un hō͘ khiam-pi ê lâng.

⁶ Só͘-í, lín tio̍h tī Siōng-tè tōa khùi-la̍t ê chhiú-ē khiam-pi, I kàu sî chiū ōe kā lín ko-seng.

⁷ Lín tio̍h chiong it-chhè ê khòa-lū kau hō͘ Siōng-tè, in-ūi I koan-sim lín.

⁸ Tio̍h kín-sīn, tio̍h kéng-séng, in-ūi lín ê tùi-te̍k Mô͘-kúi chhin-chhiūⁿ teh háu ê sai, sì-kòe kiâⁿ teh chhē thang thun-chia̍h ê lâng.

⁹ Tio̍h khò kian-tēng ê sìn-sim lâi tí-tng i, in-ūi lín chai choân sè-kài ê chèng hiaⁿ-tī chí-bē lóng teh keng-le̍k siâng-khoán ê khó͘-lān.

¹⁰ Sù it-chhè un-tián ê Siōng-tè, chiū-sī thong-kè Ki-tok lâi ho͘-tiàu lín chìn-ji̍p éng-oán ê êng-kng Hit-ūi, tī lín chiām-sî siū-khó͘ í-āu, it-tēng ōe chhin-sin kā lín têng-sin kiàn-li̍p, sù lín khùi-la̍t, hō͘ lín kian-kò͘, khiā-chāi.

¹¹ Goān koân-lêng kui hō͘ I, ti̍t-kàu éng-oán. Amen!

Chòe-āu ê Chhéng-an

¹² Thong-kè tiong-si̍t ê hiaⁿ-tī Se-la, góa siá chit-tiuⁿ té-té ê phoe hō͘ lín, lâi bián-lē lín, koh kiàn-chèng che sī Siōng-tè chin-si̍t ê un-tián. Tio̍h tī chit-ê un-tián téng-bīn khiā-chāi.

¹³ Tiàm tī Pa-pí-lûn kap lín pîⁿ-pîⁿ siū kéng-tiàu ê kàu-hōe kā lín chhéng-an. Góa ê kiáⁿ Má-khó mā kā lín chhéng-an.

¹⁴ Tio̍h chhin-chhiat hō͘-siōng chhéng-an. Goān pêng-an kui tī lín só͘-ū sio̍k Ki-tok ê lâng!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan