Bìoball air-loidhne

帖撒羅尼迦後書 2 - 現代台語譯本羅馬字版

Put-hoat ê Lâng

¹ Hiaⁿ-tī chí-bē, koan-hē lán ê Chú Iâ-so͘ Ki-tok ê lâi-lîm kap lán siū chū-chi̍p khì I hia ê sū, goán iau-kiû lín,

² nā ū thiaⁿ lâng kóng goán tī ū-giân, káng-tō, á-sī tī phoe--ni̍h ū kóng-khí “Chú ê Ji̍t kàu” ê sî, lín ê sim m̄-thang tōng-iâu á-sī kiaⁿ-hiâⁿ.

³ Lâng bô-lūn ēng sím-mi̍h hong-hoat, lín lóng m̄-thang hō͘ in phiàn--khì, in-ūi tī hit-ji̍t kàu í-chêng it-tēng seng ū pōe-kàu ê sū, mā ū put-hoat ê lâng, chiū-sī chù-tiāⁿ bia̍t-bông ê lâng, ōe chhut-hiān.

⁴ Chit-ê te̍k-tùi-chiá thê-ko ka-kī, chhiau-kè it-chhè chheng-chòe sîn-bêng á-sī kèng-pài ê tùi-siōng, khì chē tī Siōng-tè ê tiān, chū-chheng chòe Siōng-tè.

⁵ Chit-ê tāi-chì, góa iáu kap lín chòe-hé ê sî bat kā lín kóng, lín kiám bōe-kì--tit?

⁶ Lín lóng chai, hiān-chāi sī sím-mi̍h teh khian-chè hit-ê Put-hoat-chiá; i ê sî nā kàu, i ōe chhut-hiān.

⁷ In-ūi hit-ê sîn-pì ê put-hoat sè-le̍k í-keng teh ūn-chok, put-kò tio̍h thèng-hāu kàu teh khian-chè i ê sè-le̍k sóa-khui hit-sî chiah ōe hoat-seng.

⁸ Hit-sî Put-hoat-chiá ōe chhut-hiān; Chú Iâ-so͘ ōe ēng tùi I ê chhùi thò͘--chhut-lâi ê khùi kā i thâi-sí, ēng I lâi-lîm ê sî hián-hiān ê êng-kng kā i siau-bia̍t.

⁹ Put-hoat-chiá lâi-lîm ê sî ōe ēng Sat-tàn ta̍k-khoán ê koân-lêng kiâⁿ ké sîn-jiah kap kî-sū,

¹⁰ koh tùi bia̍t-bông ê lâng kiâⁿ ta̍k-khoán siâ-ok ê phiàn-su̍t, in-ūi in kū-choa̍t khì ài ōe hō͘ in tit-kiù ê chin-lí.

¹¹ Ūi-tio̍h án-ni, Siōng-tè hō͘ in sán-seng kiông-lia̍t ê chhò-kak khì siong-sìn hu-ké,

¹² tì-kàu it-chhè m̄ sìn chin-lí, ì-ài put-gī ê lâng lóng siū tēng-chōe.

Siū Kéng-soán Tit-kiù

¹³ Chú só͘ thiàⁿ ê hiaⁿ-tī chí-bē, goán eng-kai put-sî ūi-tio̍h lín kám-siā Siōng-tè, in-ūi I tùi khí-thâu chiū kéng-soán lín lâi tit-kiù, tùi Sèng Sîn hō͘ lín chiâⁿ-chòe sèng-kiat ê chú-bîn, koh hō͘ lín khak-sìn chin-lí.

¹⁴ Ūi-tio̍h chit-ê, Siōng-tè thong-kè goán só͘ thoân ê hok-im ho͘-tiàu lín lâi niá-siū lán ê Chú Iâ-so͘ Ki-tok ê êng-kng.

¹⁵ Só͘-í, hiaⁿ-tī chí-bē, tio̍h khiā-chāi, tio̍h kian-siú goán só͘ kà-sī ê thoân-thóng, bô-lūn sī ēng chhùi kóng--ê á-sī ēng phoe siá--ê, lóng tio̍h kian-siú.

¹⁶ Goān lán ê Chú Iâ-so͘ Ki-tok pún-sin kap thiàⁿ lán ê Pē Siōng-tè tùi I ê un-tián, sù lán éng-oán ê an-ùi kap bí-hó ê ǹg-bāng,

¹⁷ lâi an-ùi lín ê sim, hō͘ lín ū khùi-la̍t thang chòe ta̍k-hāng hó-sū, kóng ta̍k-hāng hó-ōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan