帖撒羅尼迦前書 5 - 現代台語譯本羅馬字版

Chún-pī Gêng-chiap Chú Lâi-lîm

¹ Hiaⁿ-tī chí-bē, koan-hē chit-ê tāi-chì hoat-seng ê sî kap kî, bô su-iàu siá-phoe kā lín kóng,

² in-ūi lín ka-kī chai Chú ê Ji̍t ōe chhin-chhiūⁿ chha̍t-á àm-sî thau-thau-á lâi.

³ Lâng teh kóng “pêng-an bô-sū” ê sî, chai-lān chhin-chhiūⁿ sán-hū chhui-chūn ê thàng-thiàⁿ hut-jiân lîm-kàu in, bô hoat-tō͘ thang tô-pī.

⁴ M̄-kú, hiaⁿ-tī chí-bē, lín m̄-sī tī o͘-àm tiong, hit-ê Ji̍t bōe chhin-chhiūⁿ chha̍t-á hut-jiân lâi.

⁵ In-ūi lín lóng sī kng-bêng ê lâng, sī ji̍t--sî ê lâng; lán m̄-sī sio̍k mî--sî, m̄-sī sio̍k o͘-àm.

⁶ Só͘-í, lán m̄-thang chhin-chhiūⁿ kî-tha ê lâng teh khùn, tio̍h chhíⁿ-chhíⁿ, tio̍h kín-sīn.

⁷ In-ūi khùn ê lâng lóng sī àm-sî teh khùn; chiú-chùi ê lâng sī àm-sî teh chùi.

⁸ Kì-jiân lán sī sio̍k ji̍t--sî ê lâng, tio̍h kín-sīn, ēng sìn-sim kap thiàⁿ-sim chòe hō͘-heng-kah chhēng, ēng tit-kiù ê ǹg-bāng chòe thâu-khoe tì.

⁹ Siōng-tè bô an-pâi lán tio̍h siū hêng-hoa̍t, sī beh hō͘ lán thong-kè Chú Iâ-so͘ Ki-tok lâi tit-tio̍h kiù.

¹⁰ Ki-tok thòe lán sí, sī beh hō͘ lán bô-lūn sī sí á-sī oa̍h, lóng ōe-tàng kap I chòe-hé oa̍h.

¹¹ Só͘-í, chhin-chhiūⁿ lín hiān-chāi án-ni, tio̍h kè-sio̍k hō͘-siōng kó͘-lē, pí-chhú chō-chiū.

Chòe-āu ê Khoàn-bián kap Chhéng-an

¹² Hiaⁿ-tī chí-bē, chhiáⁿ lín tio̍h kèng-tiōng tī lín tiong-kan teh tio̍h-bôa, mā-sī Chú kéng-soán lâi chí-tō kap khoàn-bián lín hiah-ê lâng.

¹³ Koh tio̍h in-ūi in só͘ chòe ê kang, ēng siōng-tōa ê kèng-ì kap thiàⁿ-sim tùi-thāi in. Lín ka-kī tio̍h hô-bo̍k siong-chhù.

¹⁴ Hiaⁿ-tī chí-bē, goán khó͘-khǹg lín tio̍h kéng-kài pîn-tōaⁿ ê lâng, bián-lē bô-táⁿ ê lâng, pang-chān loán-jio̍k ê lâng; tùi chèng-lâng tio̍h khoan-iông.

¹⁵ Lín tio̍h kín-sīn, m̄-thang ēng pháiⁿ pò pháiⁿ, tio̍h put-sî ūi-tio̍h pí-chhú í-ki̍p só͘-ū ê lâng chòe hó-sū.

¹⁶ Tio̍h put-sî hoaⁿ-hí;

¹⁷ tio̍h kè-sio̍k kî-tó;

¹⁸ bô-lūn sím-mi̍h kéng-gū lóng tio̍h kám-siā; in-ūi che sī Siōng-tè só͘ ì-ài, ài lín chiah-ê sio̍k Ki-tok Iâ-so͘ ê lâng án-ni chòe.

¹⁹ M̄-thang phah-hoa Sèng Sîn ê hé;

²⁰ m̄-thang biáu-sī sian-ti ê ōe.

²¹ Sū-sū tio̍h chhat-giām; hó--ê tio̍h chhî-siú,

²² it-chhè ê siâ-ok tio̍h khì-sak.

²³ Goān sù pêng-an ê Siōng-tè chhin-sin kā lín oân-choân sèng-hòa, hō͘ lín ê lêng, hûn, kap thé tī lán ê Chú Iâ-so͘ Ki-tok lâi-lîm ê sî tit-tio̍h pó-choân, bô thang hiâm!

²⁴ Ho͘-tiàu lín ê Siōng-tè sī sìn-si̍t, I it-tēng ōe oân-sêng chit-ê sū.

²⁵ Hiaⁿ-tī chí-bē, chhiáⁿ ūi-tio̍h goán kî-tó.

²⁶ Tio̍h chin-sêng kā lóng-chóng ê hiaⁿ-tī chí-bē chhéng-an.

²⁷ Goán hōng Chú ê miâ hoan-hù lín tio̍h tha̍k chit-tiuⁿ phoe hō͘ chèng hiaⁿ-tī chí-bē thiaⁿ.

²⁸ Goān lán ê Chú Iâ-so͘ Ki-tok ê un-tián kap lín tông-chāi!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan