Bìoball air-loidhne

帖撒羅尼迦前書 3 - 現代台語譯本羅馬字版

¹ Só͘-í, goán tán bōe tiâu, koat-tēng kan-ta goán lâu tī Ngá-tián,

² chiū chhe goán ê hiaⁿ-tī, mā-sī ūi-tio̍h Siōng-tè thoân Ki-tok hok-im ê tâng-kang Thê-mô͘-thài, khì lín hia, lâi kó͘-lē lín, kian-kò͘ lín ê sìn-sim,

³ hō͘ lín tiong-kan bô lâng in-ūi só͘ tú--tio̍h ê khó͘-lān tì-kàu tōng-iâu. Lín ka-kī chai, lán tú-tio̍h khó͘-lān sī Siōng-tè ê an-pâi.

⁴ Goán iáu kap lín chòe-hé ê sî, ū seng kā lín kóng-khí goán ōe siū khó͘-lān, āu-lâi chin-chiàⁿ ū hoat-seng, che sī lín só͘ chai--ê.

⁵ In-ūi án-ni, góa tán bōe tiâu chiah chhe Thê-mô͘-thài khì lín hia, ài chai lín ê sìn-sim án-chóaⁿ, chiah bián lín siū Chhì-thàm-chiá bê-he̍k, tì-kàu goán tī lín tiong-kan ê lô-khó͘ lo̍k-khong.

⁶ Hiān-chāi Thê-mô͘-thài í-keng tùi lín hia tò--lâi, chiong koan-hē lín ê sìn-sim kap thiàⁿ-sim ê hó siau-sit pò goán chai, koh kā goán kóng lín sî-siông teh siàu-liām goán, ài kap goán kìⁿ-bīn, chhin-chhiūⁿ goán ài kap lín kìⁿ-bīn.

⁷ In-ūi án-ni, hiaⁿ-tī chí-bē, tī it-chhè ê hoān-lān kap khùn-khó͘ tiong goán ū tùi lín ê sìn-sim tit-tio̍h an-ùi.

⁸ Lín nā tùi Chú ū kian-kò͘ ê sìn-sim, goán chiah ōe-tàng kóng hiān-chāi ū chin-chiàⁿ teh oa̍h.

⁹ Goán tī Siōng-tè ê bīn-chêng in-ūi lín lâi hoaⁿ-hí; tùi che it-chhè ê hoaⁿ-hí, goán tio̍h án-chóaⁿ kám-siā chiah ū kàu-gia̍h?

¹⁰ Goán mî-ji̍t pek-chhiat kî-kiû thang kìⁿ lín ê bīn, lâi pó͘-chiok lín sìn-sim ê su-iàu.

¹¹ Goān lán ê Thiⁿ-pē Siōng-tè kap lán ê Chú Iâ-so͘ kā goán khui-lō͘ thang khì lín hia.

¹² Goān Chú hō͘ lín saⁿ-thiàⁿ kap thiàⁿ chèng-lâng ê sim it-ti̍t ke-thiⁿ, chhin-chhiūⁿ goán tùi lín ê thiàⁿ ū ná ke-thiⁿ.

¹³ Án-ni, I ōe hō͘ lín ê sim kian-kò͘, tī lán ê Chú Iâ-so͘ kap I ê chèng sìn-tô͘ lâi-lîm ê sî, tī lán ê Pē Siōng-tè ê bīn-chêng sèng-kiat, bô thang hiâm. Amen!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan