Bìoball air-loidhne

哥林多後書 9 - 現代台語譯本羅馬字版

Koan-hē Chín-chè Sìn-tô͘ ê Sū

¹ Koan-hē chín-chè Iû-thài sìn-tô͘ ê sū, góa m̄-bián koh siá-phoe hō͘ lín.

² Góa chai lín kam-sim pang-chān, góa bat ūi-tio̍h chit-hāng tāi-chì tùi Má-kî-tùn-lâng khoa-kháu kóng, “A-kai-a ê sìn-tô͘ tī kū-nî chiū chún-pī hó-sè.” Lín ê jia̍t-sim ū kám-tōng in tōa-pō͘-hūn ê lâng.

³ Góa ū chhe kúi-nā ê hiaⁿ-tī khì lín hia, ǹg-bāng lín chiàu góa só͘ kóng--ê chún-pī hó-sè, chiah bián góa tī chit-hāng tāi-chì ūi-tio̍h lín tùi lâng ê khoa-kháu lo̍k-khong.

⁴ Nā bô, Má-kî-tùn-lâng nā kap góa khì, khòaⁿ-tio̍h lín bô chún-pī hó-sè, goán ōe in-ūi kè-thâu siong-sìn lín soah chin làu-khùi, lín kiám bōe koh-khah làu-khùi!

⁵ Só͘-í, góa siūⁿ eng-kai kó͘-lē hiah-ê hiaⁿ-tī seng khì lín hia, kiò lín chêng tah-èng beh koan-hiàn ê chîⁿ seng chún-pī hó-sè. Án-ni góa kàu-ūi ê sî lín lóng chún-pī hó lah, piáu-sī lín ê koan-hiàn m̄-sī bián-kióng, sī kam-sim lo̍k-ì.

⁶ Tio̍h chai: Iā chió siu chió, iā chōe siu chōe.

⁷ Só͘-í ta̍k-ê lâng tio̍h chiàu ka-kī só͘ koat-tēng--ê lâi hiàn, m̄-thang m̄-kam, mā m̄-thang bián-kióng; in-ūi Siōng-tè thiàⁿ hoaⁿ-hí hōng-hiàn ê lâng.

⁸ Siōng-tè ōe chiong ta̍k-hāng un-tián hong-hong-hù-hù sù-hok hō͘ lín, m̄-nā ka-kī ta̍k-hāng kàu-gia̍h, koh ōe-tàng chòe ta̍k-hāng hó-sū.

⁹ Chiàu Sèng-keng só͘ kì-chài: I khóng-khài chín-chè sàn-chhiah-lâng; I ê hó hêng-ûi sòa kàu éng-oán.

¹⁰ Kiong-kip chéng-chí hō͘ iā-chéng--ê, koh siúⁿ-sù chia̍h-mi̍h hō͘ lâng chia̍h hit-ūi Siōng-tè, ōe chiong lín só͘ su-iàu ê chéng-chí kiong-kip lín, koh hō͘ chéng-chí ná chōe, mā hō͘ lín jîn-gī ê ké-chí hong-siu.

¹¹ I ōe hō͘ lín sū-sū hù-chiok, thang sûi-sî khóng-khài si-sià, hō͘ chin chōe lâng thong-kè goán chiap-tio̍h lín ê lé-mi̍h lâi kám-siā Siōng-tè.

¹² In-ūi lín só͘ chòe chit-ê sū-hōng ê kang-chok m̄-nā kái-koat sìn-tô͘ ê su-iàu, mā hō͘ in tùi Siōng-tè ê kám-siā ke-thiⁿ kàu móa--chhut-lâi.

¹³ Thong-kè lín só͘ chòe chit-ê sū-hōng chèng-si̍t lín ū sūn-thàn só͘ soan-jīn Ki-tok ê hok-im, í-ki̍p lín tùi in kap kî-tha só͘-ū ê lâng khóng-khài ê koan-hiàn, thang kui êng-kng hō͘ Siōng-tè.

¹⁴ Siōng-tè sù lín bû-hān ê un-tián, hō͘ in ōe koh-khah kèng-ài lín, koh ūi-tio̍h lín kî-tó.

¹⁵ Kám-siā Siōng-tè, I ū hō͘ lán bōe-tàng hêng-iông ê un-sù!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan