Bìoball air-loidhne

哥林多後書 6 - 現代台語譯本羅馬字版

¹ Goán choh Siōng-tè ê tâng-kang--ê koh kā lín khó͘-khǹg, lín tùi Siōng-tè niá-siū ê un-tián m̄-thang hō͘ i lo̍k-khong.

² In-ūi Siōng-tè kóng: Tī thang siū chiap-la̍p ê sî, góa ū thiaⁿ lí; tī chín-kiù ê ji̍t, góa ū pang-chān lí. Tio̍h thiaⁿ! Chit-chūn sī siū chiap-la̍p ê sî; kin-á-ji̍t sī chín-kiù ê ji̍t!

³ Ūi-tio̍h goán sū-hōng ê kang-chok bián siū chí-chek, chó͘-gāi pa̍t-lâng ê tāi-chì goán lóng bô chòe,

⁴ hoán-tńg ēng siōng-tōa ê nāi-sim, hoān-sū thong-kè hoān-lān, kan-lân, kap khùn-khó͘, piáu-sī goán sī Siōng-tè ê chhe-ēng.

⁵ Goán bat siū-tio̍h piⁿ-phah, koaiⁿ-kaⁿ, pō-le̍k ê siong-hāi, lô-khó͘, bô-khùn, bô-chia̍h.

⁶ Goán ēng sûn-kiat, tì-sek, khoan-iông, jîn-chû, óa-khò Sèng Sîn, ēng sûn-chin ê thiàⁿ,

⁷ thoân chin-lí ê sìn-sit kap Siōng-tè ê tōa lêng-le̍k, ēng kong-gī chòe bú-khì kong-kek tùi-te̍k, pó-hō͘ ka-kī.

⁸ Goán siū chun-tiōng, mā siū bú-jio̍k; tit-tio̍h pháiⁿ miâ-siaⁿ, mā tit-tio̍h hó miâ-siaⁿ. Goán hō͘ lâng khòaⁿ-chòe pián-sian-á, kî-si̍t goán kóng si̍t-ōe;

⁹ ná-chún bô lâng bat, kî-si̍t lâng-lâng lóng bat; ná-chún sí--khì, kî-si̍t iáu-teh oa̍h. Goán sui-jiân siū hêng-hoa̍t, m̄-kú bô hō͘ lâng thâi-sí;

¹⁰ sui-jiân iu-siong, m̄-kú put-sî hoaⁿ-hí; sui-jiân sàn-chhiah, m̄-kú hō͘ chin chōe lâng hó-gia̍h; chhin-chhiūⁿ bô-pòaⁿ-hāng, m̄-kú ta̍k-hāng lóng ū.

¹¹ Ko-lîm-to ê pêng-iú, goán ê sim-heng í-keng phah-khui, khui-chhùi kā lín kóng lah.

¹² M̄-sī goán tùi lín bô tō͘-liōng, sī lín tùi goán tō͘-tn̂g oe̍h.

¹³ Góa khòaⁿ lín chòe ka-kī ê kiáⁿ kā lín kóng: Kap goán siâng-khoán, lín ê sim-heng mā tio̍h phah khah khui leh.

Éng-oa̍h Siōng-tè ê Tiān

¹⁴ M̄-thang kap bī-sìn ê lâng khan-liân kau-chhap; kong-gī kap put-hoat ū sím-mi̍h koan-liân? Kng-bêng kap o͘-àm ná ōe-tàng kau-óng?

¹⁵ Ki-tok kap Mô͘-kúi ná ōe-tàng hô-ha̍p? Sìn kap bô-sìn ê lâng ū sím-mi̍h koan-hē?

¹⁶ Siōng-tè ê tiān kap ngó͘-siōng ná ōe-tàng pâi chòe-hé? In-ūi lán sī éng-oa̍h Siōng-tè ê tiān! Chiàu Siōng-tè só͘ kóng: Góa beh kap góa ê chú-bîn chòe-hé khiā-khí, tī in tiong-kan óng-lâi. Góa beh chòe in ê Siōng-tè, in beh chòe góa ê chú-bîn.

¹⁷ Só͘-í Chú kóng: Lín tio̍h tùi in tiong-kan chhut--khì, kap in hun-lī. Bô chheng-khì--ê m̄-thang chiap-chhiok, án-ni góa chiū chiap-la̍p lín.

¹⁸ Góa beh chòe lín ê Pē, lín beh chòe góa ê kiáⁿ, cha-bó͘-kiáⁿ. Choân-lêng ê Chú ū án-ni kóng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan