Bìoball air-loidhne

哥林多後書 5 - 現代台語譯本羅馬字版

¹ In-ūi goán chai, lán tī tōe-chiūⁿ teh tòa chit-ê pò͘-pîⁿ ê chhù nā thiah--khí-lâi, Siōng-tè ōe hō͘ lán thiⁿ-téng ê chhù, m̄-sī lâng ê chhiú khí--ê, sī éng-oán ê chhù.

² Lán hiān-chāi tī chit-ê pò͘-pîⁿ teh thó͘-khùi, jia̍t-chhiat ǹg-bāng thang khì tiàm thiⁿ-téng ê chhù, chhin-chhiūⁿ saⁿ tha̍h--lo̍h-khì,

³ nā tha̍h--lo̍h-khì chiū bōe chhiah-sin-lō͘-thé.

⁴ Lán iáu tiàm tī chit-ê pò͘-pîⁿ pē tāng-tàⁿ teh thó͘-khùi; lán m̄-sī ài thǹg-khì tōe-chiūⁿ ê thé, sī beh tha̍h sio̍k-thiⁿ ê thé, thang hō͘ oa̍h-miā kā ōe-sí--ê thun--lo̍h-khì.

⁵ Hō͘ lán ū chit-ê kái-piàn--ê sī Siōng-tè, I sù Sèng Sîn hō͘ lán, kā lán pó-chèng.

⁶ Só͘-í, goán put-sî ū ióng-khì. Goán chai, lán iáu tòa tī chit-ê seng-khu teh oa̍h ê sî, sī kap Chú saⁿ-lī.

⁷ In-ūi lán teh oa̍h, m̄-sī khò ba̍k-chiu khòaⁿ, sī khò sìn-sim.

⁸ Goán ū ióng-khì, khah ài lī-khui chit-ê seng-khu khì kap Chú tòa.

⁹ Só͘-í, bô-lūn tī chit-ê seng-khu á-sī lī-khui chit-ê seng-khu, goán ê bo̍k-te̍k sī ài hō͘ Chú hoaⁿ-hí.

¹⁰ In-ūi lán lóng it-tēng tio̍h khiā tī Ki-tok ê bīn-chêng siū I sím-phòaⁿ. Ta̍k-ê lâng lóng tio̍h chiàu ka-kī tī tōe-chiūⁿ ê seng-khu só͘ chòe--ê, bô-lūn sī hó á-sī pháiⁿ, chiap-siū pò-èng.

Thong-kè Ki-tok kap Siōng-tè Hô-hó

¹¹ Kì-jiân goán chai-iáⁿ tio̍h kèng-ùi Chú, goán chiū khó͘-khǹg lâng. Tùi Siōng-tè lâi khòaⁿ, goán sī sím-mi̍h khoán lâng chin chheng-chhó; góa ǹg-bāng tùi lín ê liông-sim lâi khòaⁿ mā chin chheng-chhó.

¹² Goán m̄-sī beh koh tùi lín chhui-chiàn ka-kī, sī hō͘ lín ū ki-hōe ēng goán chòe khoa-kháu, hō͘ lín thang hôe-èng hiah-ê chù-tiōng gōa-piáu bô chù-tiōng lāi-sim ê lâng.

¹³ Goán nā jia̍t-kông, sī ūi-tio̍h Siōng-tè; goán nā chheng-chhíⁿ, sī ūi-tio̍h lín.

¹⁴ In-ūi Ki-tok ê thiàⁿ chhui-pek goán chòe chit-ê kiat-lūn: Chi̍t lâng ūi-tio̍h chèng-lâng sí, chèng-lâng chiū lóng sí.

¹⁵ I ūi-tio̍h chèng-lâng sí, sī beh hō͘ hiah-ê oa̍h--teh ê lâng bô koh ūi-tio̍h ka-kī oa̍h, sī ūi-tio̍h hit-ūi thòe in sí koh-oa̍h ê Ki-tok lâi oa̍h.

¹⁶ Só͘-í, tùi taⁿ í-āu goán bô koh kun-kù lâng ê phiau-chún bat lâng. Sui-jiân goán bat ēng lâng ê phiau-chún bat Ki-tok, m̄-kú hiān-chāi bô koh án-ni bat I.

¹⁷ Án-ni, bô-lūn sím-mi̍h-lâng, nā kap Ki-tok kiat-liân chiū-sī sin chhòng-chō ê lâng; kū--ê í-keng kè--khì, taⁿ lóng pìⁿ-chòe sin--ê.

¹⁸ Chiah-ê it-chhè lóng sī Siōng-tè ê chok-ûi; I thong-kè Ki-tok hō͘ lán kap I koh hô-hó, koh chiong hō͘ lâng kap I hô-hó ê chit-bū kau-tài goán.

¹⁹ Goán só͘ thoân ê sìn-sit sī án-ni: Siōng-tè thong-kè Ki-tok hō͘ sè-kan-lâng kap I hô-hó, bô koh tui-kiù in ê chōe-kò, koh chiong chit-ê hô-hó ê sìn-sit kau-thok goán.

²⁰ Só͘-í, goán choh Ki-tok ê tāi-sài, Siōng-tè thong-kè goán kā lín khó͘-khǹg. Goán thòe Ki-tok kā lín kiû, tio̍h kap Siōng-tè hô-hó.

²¹ Siōng-tè hō͘ bô-chōe ê Ki-tok ūi-tio̍h lán ê iân-kò͘ chiâⁿ-chòe ū-chōe, hō͘ lán thang khò Ki-tok kap Siōng-tè kiàn-li̍p ha̍p-gî ê koan-hē.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan