Bìoball air-loidhne

哥林多後書 3 - 現代台語譯本羅馬字版

Sin ê Iok ê Chhe-ēng

¹ Goán kiám koh teh chhui-chiàn ka-kī? Goán kiám tio̍h chhin-chhiūⁿ chi̍t-kóa lâng siá chhui-chiàn-su hō͘ lín, á-sī su-iàu lín ê chhui-chiàn-su?

² Lín pún-sin chiū-sī goán ê chhui-chiàn-su, siá tī goán ê sim-lāi, beh hō͘ chèng-lâng chai, chèng-lâng tha̍k.

³ Chin bêng-hián, lín sī Ki-tok só͘ siá thong-kè goán lâi sàng ê phoe. Chit-tiuⁿ phoe m̄-sī ēng ba̍k-chúi siá tī chio̍h-pán, sī ēng éng-oa̍h Siōng-tè ê Sîn siá tī lâng ê sim-pán.

⁴ Goán thong-kè Ki-tok tùi Siōng-tè ū chit-khoán ê khak-sìn chiah án-ni kóng.

⁵ Che m̄-sī kóng goán ka-kī ū châi-tiāu thang chòe chit-ê tāi-chì, goán ê châi-tiāu sī tùi Siōng-tè lâi--ê.

⁶ I sù goán ū châi-tiāu thang chòe sin ê iok ê chhe-ēng; m̄-sī ēng bûn-jī siá--ê, sī Sèng Sîn ê iok. Bûn-jī hō͘ lâng sí, m̄-kú Sèng Sîn hō͘ lâng oa̍h.

⁷ Ēng bûn-jī khek tī chio̍h-pán ê Lu̍t-hoat pan-pò͘ ê sî, Siōng-tè ê êng-kng ū hián-hiān. Tùi Mô͘-se ê bīn hoán-chiò--chhut-lâi ê kng sui-jiân chiām-chiām teh siau-sit, m̄-kú hit-ê kng iáu chin kiông, tì-kàu Í-sek-lia̍t kiáⁿ-sun bōe-tàng ba̍k-chiu kim-kim kā i khòaⁿ. Hō͘ lâng tì-kàu sí ê sū-kang to ū chit-khoán ê êng-kng,

⁸ án-ni Sèng Sîn ê sū-kang só͘ hoat-chhut ê êng-kng kiám bōe koh-khah tōa?

⁹ Hit-ê kā lâng tēng-chōe ê sū-kang nā ōe hoat-chhut chit-khoán ê êng-kng, chit-ê kā lâng soan-pò͘ bô chōe ê sū-kang só͘ hián-chhut ê êng-kng kiám bōe koh-khah tōa!

¹⁰ Án-ni, in-ūi hiān-chāi ê êng-kng pí í-chêng--ê koh-khah tōa, í-chêng ê êng-kng soah bô--khì.

¹¹ Hit-ê ōe siau-sit--ê nā ōe hoat-chhut êng-kng, chit-ê éng-chûn--ê it-tēng ōe hián-chhut koh-khah tōa ê êng-kng.

¹² In-ūi goán ū chit-khoán ê ǹg-bāng chiah chiah-ni̍h ióng-kám.

¹³ Goán bô chhin-chhiūⁿ Mô͘-se tio̍h ēng phè tà ka-kī ê bīn. Mô͘-se án-ni chòe, chiah bián hō͘ Í-sek-lia̍t kiáⁿ-sun khòaⁿ-tio̍h i bīn ê êng-kng chiām-chiām siau-sit, kàu bé lóng bô--khì.

¹⁴ M̄-kú in ê sim tūn, it-ti̍t kàu kin-á-ji̍t in tha̍k kū ê iok ê sî, in ê sim iáu hō͘ hit-tè phè tà--teh. In-ūi chí-ū kap Ki-tok kiat-liân, hit-tè phè chiah the̍h--khí-lâi.

¹⁵ Sīm-chì kàu kin-á-ji̍t, in ta̍k-pái tha̍k Mô͘-se ê Lu̍t-hoat, hit-tè phè iáu tà tī in ê sim.

¹⁶ M̄-kú, tng in kui-ǹg Chú ê sî, phè chiū the̍h--khí-lâi.

¹⁷ Chit-ūi Chú chiū-sī Sèng Sîn; ū Chú ê Sîn ê só͘-chāi chiū ū chū-iû.

¹⁸ Lán tāi-ke lóng ēng bô tà-phè ê bīn teh hoán-chiò Chú ê êng-kng; chit-ê êng-kng sī tùi Chú, chiū-sī tùi Sèng Sîn hoat--chhut-lâi ê êng-kng, teh kā lán kái-chō chiâⁿ-chòe I ê hêng-siōng, hō͘ lán ū koh-khah tōa ê êng-kng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan