Bìoball air-loidhne

哥林多後書 2 - 現代台語譯本羅馬字版

¹ Só͘-í, góa koat-tēng bô beh khì lín hia, chiah bián koh-chài hō͘ lín sim kan-khó͘.

² Góa nā ū hō͘ lín sim kan-khó͘, lín chiah-ê kan-khó͘-sim ê lâng í-gōa iáu ū sím-mi̍h-lâng ōe-tàng hō͘ góa khoài-lo̍k?

³ Ūi-tio̍h beh pī-bián góa khì lín hia ê sî, hiah-ê eng-kai hō͘ góa hoaⁿ-hí ê lâng hoán-tńg hō͘ góa kan-khó͘-sim, góa chiah siá í-chêng hit-tiuⁿ phoe hō͘ lín. Góa khak-sìn, góa ê hoaⁿ-hí chiū-sī lín tāi-ke ê hoaⁿ-hí.

⁴ Góa hui-siông ut-chut koh thòng-sim, lâu chin chōe ba̍k-sái siá hit-tiuⁿ phoe, m̄-sī beh hō͘ lín sim kan-khó͘, sī beh hō͘ lín chai góa jōa-á-ni̍h thiàⁿ lín.

Sià-bián Hoān Kè-sit ê Lâng

⁵ Nā ū lâng hō͘ lâng kan-khó͘-sim, m̄-sī hō͘ góa kan-khó͘-sim — góa khah bô ài kóng kah kè-thâu giâm-tiōng — kàu bó͘ chi̍t ê thêng-tō͘ sī hō͘ lín tāi-ke lóng kan-khó͘-sim.

⁶ Hit-khoán lâng siū lín tāi-to-sò͘ ê lâng khiàn-chek í-keng kàu-gia̍h.

⁷ Lín tian-tò tio̍h kā i sià-bián, kā i kó͘-lē, chiah bián hō͘ i kè-thâu kan-khó͘-sim soah choa̍t-bāng.

⁸ Só͘-í, góa khó͘-khǹg lín, tio̍h hō͘ i chai-iáⁿ lín khak-si̍t ū thiàⁿ i.

⁹ Góa chêng siá hit-tiuⁿ phoe sī ài-beh chai lín jōa gâu jím-siū khó-giām, sī m̄-sī hoān-sū goān-ì sūn-ho̍k.

¹⁰ Lín sià-bián sím-mi̍h-lâng, góa mā sià-bián i. Góa nā ū sià-bián sím-mi̍h-lâng, sī tī Ki-tok ê bīn-chêng ūi-tio̍h lín ê iân-kò͘ sià-bián i.

¹¹ Án-ni chiah bián hō͘ Sat-tàn kā lán phiⁿ--khì, in-ūi lán chin chheng-chhó Sat-tàn ê khúi-kè.

Pó-lô ê Khòa-lū

¹² Góa khì Te̍k-lô-a thoân Ki-tok ê Hok-im ê sî, Chú í-keng kā góa khui kang-chok ê mn̂g;

¹³ put-kò bô tú-tio̍h góa ê hiaⁿ-tī Thê-to, góa bōe an-sim, chiū kap hia ê lâng saⁿ-sî khì Má-kî-tùn.

Khò Ki-tok Tek-sèng

¹⁴ Kám-siā Siōng-tè! In-ūi kap Ki-tok kiat-liân, goán sî-siông hō͘ Siōng-tè chhōa-khì chham-ka Ki-tok khái-soân ê hâng-lia̍t. Siōng-tè koh ēng goán khì ta̍k só͘-chāi sàn-pò͘ jīn-bat Ki-tok chiah ū ê phang-bī.

¹⁵ Bô-lūn tī tit-kiù á-sī tîm-lûn ê lâng tiong-kan, goán chiâⁿ-chòe Ki-tok ê phang-bī hiàn hō͘ Siōng-tè;

¹⁶ tùi teh-beh tîm-lûn ê lâng sī sí ê chhàu-bī, tùi teh-beh tit-kiù ê lâng sī oa̍h ê phang-bī. Sím-mi̍h-lâng ōe-kham-tit chòe chit-khoán tāi-chì?

¹⁷ Goán bô chhin-chhiūⁿ chin chōe lâng chiong Siōng-tè ê ōe chòe sio̍k-hè phah-bōe, tian-tò sī chòe chi̍t ê sûn-chin ê lâng, siū Siōng-tè chhe-phài, tī I ê bīn-chêng khò Ki-tok soan-káng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan