Bìoball air-loidhne

哥林多後書 11 - 現代台語譯本羅馬字版

Pó-lô kap Ké Sù-tô͘

¹ Chhiáⁿ lín khoan-iông góa sió-khóa ê gû-gōng; chhiáⁿ khoan-iông góa!

² Góa thiàⁿ lín, chhin-chhiūⁿ Siōng-tè thiàⁿ lín thiàⁿ kah beh khí oàn-tò͘. In-ūi lín chhin-chhiūⁿ sûn-kiat ê chāi-sek-lú, góa ū chiong lín phòe hō͘ chi̍t ê tiōng-hu, chiū-sī Ki-tok.

³ Chhin-chhiūⁿ Hā-oa hō͘ chôa ê khúi-chà phiàn--khì, góa mā kiaⁿ-liáu lín ê sim-su ōe siū bê-he̍k, soah khì-sak tùi Ki-tok ê sûn-kiat kap chin-sêng.

⁴ In-ūi tùi ū lâng khì lín hia thoân kap goán só͘ thoân bô kâng ê Iâ-so͘, á-sī lín chiap-la̍p kap lín chêng só͘ chiap-la̍p bô kâng ê Sèng Sîn, á-sī lín chiap-siū kap lín chêng só͘ chiap-siū bô kâng ê hok-im, lín mā lóng iông-jím.

⁵ Kap hiah-ê “chhiau-kip sù-tô͘” pí, góa siūⁿ góa chi̍t-sut-á to bô khah su.

⁶ Kiám-chhái góa kóng-ōe khah han-bān, m̄-kú tì-sek bô pí lâng khah su, chit-hāng sū góa í-keng ū ēng ta̍k-khoán hong-hoat, lī-iōng ta̍k-chióng ki-hōe tùi lín piáu-bêng.

⁷ Ūi-tio̍h beh kā lín ko-seng, góa kàng-kē ka-kī, chiong Siōng-tè ê hok-im pe̍h-pe̍h thoân hō͘ lín, án-ni kiám ū sǹg hoān-chōe?

⁸ Góa tī lín hia sū-hōng ê sî, góa ê só͘-hùi lóng sī pa̍t-ê kàu-hōe kiong-kip. Kóng--khí-lâi, góa sī teh pak-siah pa̍t-ê kàu-hōe lâi kā lín ho̍k-bū.

⁹ Góa tī lín hia ê sî, ū sím-mi̍h su-iàu lóng m̄-bat kiû lín pang-chān, kā lín mâ-hoân; it-chhè ê su-iàu lóng sī Má-kî-tùn lâi ê sìn-tô͘ kā góa kiong-kip. Góa í-chêng bô kā lín mâ-hoân, í-āu mā bōe kā lín mâ-hoân.

¹⁰ Góa chí só͘ sìn Ki-tok ê chin-lí kóng, tī choân A-kai-a-séng kéng-lāi, góa lóng káⁿ án-ni tián.

¹¹ Sī-án-chóaⁿ? Kiám kóng góa bô thiàⁿ lín? Góa ū, Siōng-tè chai!

¹² Góa teh chòe--ê, góa beh kè-sio̍k chòe, sī beh hō͘ hiah-ê siūⁿ-beh kap goán siâng-khoán choh “sù-tô͘” ê bô ki-hōe thang khoa-kháu.

¹³ Chit-khoán lâng sī ké sù-tô͘, chòe tāi-chì kan-chà, ké-chòe sī Ki-tok ê sù-tô͘.

¹⁴ Che bô kî-koài, liân Sat-tàn pún-sin mā ké-chòe kng-bêng ê thiⁿ-sài.

¹⁵ Án-ni Sat-tàn ê po̍k-jîn nā ké-chòe gī ê po̍k-jîn mā m̄-sī sím-mi̍h tōa tāi-chì. Chòe-āu in ê hêng-ûi ōe siū-tio̍h èng-tit ê pò-èng.

Pó-lô Choh Sù-tô͘ ê Lô-khó͘

¹⁶ Góa koh kóng chi̍t piàn, m̄-thang khòaⁿ góa chòe gōng-lâng; m̄-kú nā beh, kā góa chiap-la̍p chòe gōng-lâng, góa chiah thang tián--chi̍t-ē.

¹⁷ Góa chit-chūn teh kóng--ê m̄-sī Chú ê ì-sù, sī chòe chi̍t ê gōng-lâng teh tián.

¹⁸ Kì-jiân ū chiah-ni̍h chōe lâng teh tián sio̍k-sè ê sū, góa mā beh tián--chi̍t-ē.

¹⁹ Lín to hiah-ni̍h khiáu, eng-kai ōe hoaⁿ-hí iông-jím góa chit-ê gōng-lâng chiah tio̍h.

²⁰ Nā ū lâng kā lín tòng-chòe lô͘-lē chhe-kah, kā lín phiⁿ, kā lín hām-hāi, kā lín khòaⁿ-khin, á-sī kā lín siàn chhùi-phóe, lín to ōe iông-jím.

²¹ Chin kiàn-siàu, góa tio̍h sêng-jīn, chit-khoán tāi-chì goán m̄-káⁿ chòe. M̄-kú nā ū lâng káⁿ tián sím-mi̍h, chún-chòe chi̍t ê gōng-lâng lâi kóng, góa mā káⁿ.

²² In sī Hi-pek-lâi-lâng sī--bô? Góa mā-sī. In sī Í-sek-lia̍t-lâng sī--bô? Góa mā-sī. In sī A-pek-la-hán ê kiáⁿ-sun sī--bô? Góa mā-sī.

²³ In sī Ki-tok ê chhe-ēng sī--bô? Góa chún-chòe siáu-lâng lâi kóng, góa koh-khah sī. Góa siū koh-khah chōe lô-khó͘, chē koh-khah chōe kaⁿ, siū sǹg bōe liáu ê piⁿ-phah, chin chōe piàn hiám-hiám-á sí.

²⁴ Góa gō͘ piàn hō͘ Iû-thài-lâng piⁿ-phah, ta̍k-piàn sì-cha̍p ē kiám chi̍t ē.

²⁵ Góa saⁿ piàn hō͘ Lô-má-lâng ēng kùn-á kòng, chi̍t piàn hō͘ lâng ēng chio̍h-thâu tìm, saⁿ piàn tú-tio̍h chûn phòa, chi̍t piàn tī hái--ni̍h phiau-liû chi̍t mî chi̍t ji̍t.

²⁶ Tī lú-hêng tiong góa tú-tio̍h tōa-chúi ê gûi-hiám, chhiúⁿ-kiap ê gûi-hiám, Iû-thài tông-pau kap Gōa-pang-lâng ê hām-hāi; mā ū siâⁿ-chhī ê gûi-hiám, khòng-iá ê gûi-hiám, hái-siōng ê gûi-hiám, kap ké hiaⁿ-tī ê gûi-hiám.

²⁷ Góa lô-lo̍k thoa-bôa, siông-siông bô khùn, iau-gō chhùi-ta, bô thang chia̍h, bô thang tòa, bô thang chhēng.

²⁸ Kî-tha ê tāi-chì bián kóng, kan-ta ta̍k-ji̍t ūi-tio̍h só͘-ū ê kàu-hōe khòa-lū í-keng kàu-gia̍h.

²⁹ Siáⁿ-lâng loán-jio̍k, góa bô loán-jio̍k? Siáⁿ-lâng hoān-chhò sit-pāi, góa bô siū-khì hé-to̍h?

³⁰ Góa nā tio̍h tián, beh tián góa ê loán-jio̍k.

³¹ Lán ê Chú Iâ-so͘ ê Pē Siōng-tè — goān I éng-oán tit-tio̍h chheng-chàn — I chai góa bô kóng pe̍h-chha̍t.

³² Góa tī Tāi-má-sū-kek ê sî, A-lí-ta̍t-ông chhiú-ē ê chóng-tok phài siú-ōe kò͘-siú siâⁿ-mn̂g, beh kā góa lia̍h,

³³ m̄-kú ū lâng ēng tōa ê nâ-á tùi siâⁿ-chhiûⁿ ê thang-á kā góa lūi--lo̍h-khì, hō͘ góa thoat-lī i ê chhiú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan