Bìoball air-loidhne

哥林多後書 1 - 現代台語譯本羅馬字版

¹ Góa sī Pó-lô, hōng Siōng-tè ê chí-ì choh Ki-tok Iâ-so͘ ê sù-tô͘. Góa kap hiaⁿ-tī Thê-mô͘-thài siá-phoe hō͘ tī Ko-lîm-to Siōng-tè ê kàu-hōe kap choân A-kai-a-séng só͘-ū sìn-tô͘.

² Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an!

Pó-lô Hoān-lān Āu ê Kám-un

³ Tio̍h chheng-chàn lán ê Chú Iâ-so͘ Ki-tok ê Pē Siōng-tè! I sī chû-pi ê Pē, sù ta̍k-hāng an-ùi ê Siōng-tè.

⁴ Tī lán it-chhè ê hoān-lān tiong, I an-ùi lán, hō͘ lán ōe-tàng ēng Siōng-tè sù lán ê an-ùi khì an-ùi hiah-ê tú-tio̍h ta̍k-khoán hoān-lān ê lâng.

⁵ In-ūi Ki-tok ūi-tio̍h lán siū chin chōe khó͘-lān, lán mā thong-kè Ki-tok siū hiah-ni̍h chōe ê an-ùi.

⁶ Goán nā tú-tio̍h hoān-lān, sī beh hō͘ lín tit-tio̍h an-ùi kap chín-kiù; goán nā tit-tio̍h an-ùi, mā-sī beh hō͘ lín tit-tio̍h an-ùi, ū khùi-la̍t thang jím-siū kap goán só͘ jím-siū siâng-khoán ê khó͘-lān.

⁷ Goán tùi lín ê ǹg-bāng bōe iô-tāng; in-ūi goán chai, lín kap goán tâng siū-khó͘, lín mā ōe kap goán tâng siū an-ùi.

⁸ Hiaⁿ-tī chí-bē, goán ài lín chai goán tī A-sè-a-séng só͘ tú--tio̍h ê hoān-lān. Goán só͘ taⁿ ê tāng-tàⁿ hui-siông tāng, tāng kah taⁿ bōe khí, tì-kàu kiông-beh oa̍h bōe lo̍h--khì.

⁹ Goán ka-kī kám-kak ū siū phòaⁿ sí-hêng; án-ni sī beh hō͘ goán bô koh óa-khò ka-kī, chí-ū óa-khò hō͘ sí-lâng koh-oa̍h ê Siōng-tè.

¹⁰ I ū kiù goán thoat-lī sí ê gûi-hiám, mā ōe kè-sio̍k kiù goán. Goán ǹg-bāng I chiong-lâi ōe koh kiù goán.

¹¹ Lín mā tio̍h ēng kî-tó pang-chān goán, án-ni chiū ū chin chōe lâng ōe in-ūi goán tùi lín chin chōe ê kî-tó tit-tio̍h chiok-hok lâi kám-siā Siōng-tè.

Pó-lô Kái-piàn Kè-ōe

¹² Goán só͘ khoa-kháu--ê sī án-ni: Goán ê liông-sim chèng-bêng, goán tī chit sè-kan ê seng-oa̍h lóng sī chiàu Siōng-tè só͘ sù ê sûn-kiat kap sêng-si̍t, m̄-sī khò sio̍k-sè ê tì-hūi, sī khò Siōng-tè ê un-tián; goán tùi-thāi lín koh-khah sī án-ni.

^13-14 Goán siá hō͘ lín--ê lóng sī lín ōe-hiáu tha̍k ōe-tàng liáu-kái--ê. Lín kàu taⁿ só͘ lí-kái--ê chí-ū chi̍t-pō͘-hūn, góa ǹg-bāng lín kàu lō͘-bé ōe oân-choân liáu-kái. Án-ni, tī lán ê Chú Iâ-so͘ ê Ji̍t, lín ōe chòe goán ê khoa-kháu, goán mā chòe lín ê khoa-kháu.

¹⁵ In-ūi ū chit-ê khak-sìn, góa chiah kè-ōe seng khì hóng-būn lín, thang hō͘ lín tit-tio̍h ka-pē ê chiok-hok;

¹⁶ chiū-sī kè-ōe khì Má-kî-tùn ê lō͘-tiong seng khì hóng-būn lín, koh tùi Má-kî-tùn tò--lâi keng-kè lín hia ê sî, hō͘ lín thang sàng góa chhut-hoat khì Iû-thài.

¹⁷ Chit-ê kè-ōe kiám sī chhìn-chhái chòe--ê? Góa chòe chit-khoán kè-ōe kiám chhut tī chū-su ê tōng-ki, liâm-piⁿ kóng “sī” liâm-piⁿ kóng “m̄-sī”?

¹⁸ Siōng-tè sī sìn-si̍t, góa tùi lín tah-èng ê ōe chiū m̄-sī liâm-piⁿ “sī” liâm-piⁿ “m̄-sī”.

¹⁹ In-ūi Se-la, Thê-mô͘-thài, kap góa thoân hō͘ lín hit-ūi Siōng-tè ê Kiáⁿ Iâ-so͘ Ki-tok, pèng m̄-sī liâm-piⁿ “sī” liâm-piⁿ “m̄-sī” ê. Chāi-tī Iâ-so͘ Ki-tok chí-ū “sī” nā-tiāⁿ.

²⁰ Siōng-tè it-chhè ê èng-ún tī Iâ-so͘ Ki-tok lóng chiâⁿ-chòe “sī”, só͘-í lán chiah thong-kè I kóng “Amen” lâi kui êng-kng hō͘ Siōng-tè.

²¹ Hō͘ goán kap lín lâi kap Ki-tok kiat-liân, koh soán-phài goán--ê sī Siōng-tè.

²² I kā goán khàm-ìn, koh sù Sèng Sîn tī goán sim-lāi chòe pó-chèng.

²³ Góa ēng ka-kī ê sìⁿ-miā khún-kiû Siōng-tè kā góa choh-chèng. Góa sī thé-thiap lín chiah bô khì Ko-lîm-to.

²⁴ Goán m̄-sī teh kiông-chè lín tio̍h sìn sím-mi̍h, hoán-tńg sī teh chòe lín ê tâng-kang, hō͘ lín thang hoaⁿ-hí, in-ūi lín ê sìn-sim ū khiā-chāi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan