Bìoball air-loidhne

哥林多前書 9 - 現代台語譯本羅馬字版

Sù-tô͘ ê Koân-lī kap Chek-jīm

¹ Góa kiám m̄-sī chū-iû ê lâng? Góa kiám m̄-sī sù-tô͘? Góa kiám m̄-bat kìⁿ-tio̍h lán ê Chú Iâ-so͘? Lín kiám m̄-sī góa ūi-tio̍h Chú kang-chok ê sêng-kó?

² Tùi pa̍t-lâng lâi khòaⁿ, góa kiám-chhái m̄-sī sù-tô͘, m̄-kú tùi lín lâi khòaⁿ, góa khak-si̍t sī. In-ūi lín kap Chú kiat-liân chiū-sī góa choh sù-tô͘ ê chèng-kù.

³ Tùi hiah-ê phoe-phêng góa ê lâng, góa án-ni piān-bêng:

⁴ Goán kiám bô koân thang chia̍h, thang lim?

⁵ Goán kiám bô koân kap kî-tha ê sù-tô͘, Chú ê hiaⁿ-tī, í-ki̍p Pí-tek kâng-khoán, chhōa lú sìn-tô͘ chòe bó͘ chòe-hé lú-hêng?

⁶ Kiám kan-ta góa kap Pa-ná-pa it-tēng tio̍h chòe kang chiah ōe-tàng seng-oa̍h?

⁷ Kiám ū lâng choh-peng koh teh chia̍h ka-kī? Kiám ū lâng chèng-choh phû-tô-hn̂g bô chia̍h hn̂g-lāi chhut-sán ê phû-tô? Kiám ū lâng chhī iûⁿ bô lim ka-kī ê iûⁿ-lin?

⁸ Góa kóng chiah-ê kiám sī kun-kù lâng ê siūⁿ-hoat? Lu̍t-hoat kiám m̄-sī mā án-ni kóng?

⁹ Mô͘-se ê Lu̍t-hoat kui-tēng, “Gû teh lún ngó͘-kok ê sî, m̄-thang kā i kòa gû-chhùi-lam.” Siōng-tè koan-sim--ê kiám sī gû?

¹⁰ I kiám m̄-sī oân-choân ūi-tio̍h lán kóng--ê? Tong-jiân sī! In-ūi keng-choh ê lâng khǹg ǹg-bāng keng-choh, siu-koah ê lâng khǹg ǹg-bāng siu-koah, in lóng sī kî-thāi tit-tio̍h ngó͘-kok.

¹¹ Goán nā ū tī lín tiong-kan iā sio̍k-lêng ê chéng-chí, tùi lín tit-tio̍h bu̍t-chit siōng ê kiong-kip kiám ū kè-hūn?

¹² Pa̍t-lâng nā ū koân thang tùi lín iau-kiû, goán kiám m̄-sī koh-khah ū? M̄-kú goán lóng m̄-bat ēng chit-ê koân, hoán-tńg jím-siū it-chhè, chiah bián hō͘ Ki-tok ê hok-im siū chó͘-gāi.

¹³ Lín it-tēng chai, tī Sèng-tiān teh kang-chok ê lâng tùi Sèng-tiān tit-tio̍h chia̍h-mi̍h; tī chè-tôaⁿ teh hiàn-chè ê lâng pun-tio̍h tôaⁿ-téng ê chè-mi̍h.

¹⁴ Chhin-chhiūⁿ án-ni, Chú ū hoan-hù: Thoân hok-im ê lâng eng-kai khò hok-im seng-oa̍h.

¹⁵ M̄-kú góa lóng m̄-bat ēng chiah-ê koân. Góa hiān-chāi siá chiah-ê ōe mā m̄-sī beh cheng-chhú chit-khoán ê koân. Góa lêng-khó sí mā bô ài hō͘ góa só͘ khoa-kháu--ê lo̍k-khong!

¹⁶ Góa thoân hok-im pèng bô sím-mi̍h thang khoa-kháu; góa sī hōng-bēng teh thoân. Góa nā bô thoân chiū ū chai-hō.

¹⁷ Góa nā kam-goān chòe chit-ê kang, chiū ū pò-siúⁿ; góa nā m̄-sī chhut-tī kam-goān, mā tio̍h chip-hêng Siōng-tè kau-tài ê jīm-bū.

¹⁸ Án-ni, góa ê pò-siúⁿ sī sím-mi̍h? Chiū-sī góa thoân hok-im hō͘ lâng pe̍h-pe̍h tit-tio̍h, m̄-kú ka-kī bô beh hióng-siū thoân hok-im eng-kai ū ê koân-lī.

¹⁹ Góa sī chū-iû ê lâng, bô siū lâng ê sok-pa̍k, m̄-kú ūi-tio̍h beh tit-tio̍h khah chōe lâng lâi sìn Chú, góa chiâⁿ-chòe chèng-lâng ê po̍k-jîn.

²⁰ Tùi Iû-thài-lâng, góa chiū choh Iû-thài-lâng, sī ūi-tio̍h beh tit-tio̍h Iû-thài-lâng. Sui-jiân góa bô siū Mô͘-se ê Lu̍t-hoat khu-sok, khiok choh Lu̍t-hoat-ē ê lâng, sī ūi-tio̍h beh tit-tio̍h Lu̍t-hoat-ē ê lâng.

²¹ Tùi Lu̍t-hoat-gōa ê lâng, góa chiū choh Lu̍t-hoat-gōa ê lâng, sī ūi-tio̍h beh tit-tio̍h Lu̍t-hoat-gōa ê lâng. Án-ni m̄-sī kóng góa bô chun-siú Siōng-tè ê Lu̍t-hoat; kî-si̍t góa sī siū Ki-tok Lu̍t-hoat iok-sok ê lâng.

²² Tùi sìn-sim loán-jio̍k ê lâng, góa chiâⁿ-chòe loán-jio̍k, sī ūi-tio̍h beh tit-tio̍h loán-jio̍k ê lâng. Tùi tó chi̍t khoán lâng, góa chiū choh hit-khoán lâng, ēng ta̍k-khoán hong-hoat thang ke kiù chi̍t-kóa lâng.

²³ Góa chòe chiah-ê lóng sī ūi-tio̍h hok-im, bo̍k-te̍k sī beh kap lâng hun-hióng hok-im.

²⁴ Lín it-tēng chai, tī ūn-tōng-tiûⁿ chham-ka kèng-sài ê lâng lóng lo̍h-khì cháu, m̄-kú chí-ū chi̍t ê tit-tio̍h siúⁿ. Chhin-chhiūⁿ án-ni, ūi-tio̍h beh tit-tio̍h siúⁿ, lín tio̍h phah-piàⁿ cháu.

²⁵ Ta̍k-ê soán-chhiú lóng ū chiap-siū giâm-keh ê hùn-liān; in án-ni chòe sī beh tit-tio̍h ōe pāi-hoāi ê hoa-koan; m̄-kú lán ài tit--tio̍h-ê sī bōe pāi-hoāi ê hoa-koan.

²⁶ Án-ni, góa cháu m̄-sī bô bo̍k-phiau, phah-kûn m̄-sī teh phah khong-khì.

²⁷ Góa giâm-keh chhau-liān ka-kī ê seng-khu kàu ōe-tàng oân-choân khòng-chè, chiah bián góa chiong hok-im thoân hō͘ pa̍t-lâng, ka-kī tian-tò siū kū-choa̍t.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan