Bìoball air-loidhne

哥林多前書 16 - 現代台語譯本羅馬字版

Ūi Sìn-tô͘ Koan-hiàn

¹ Koan-hē koan-hiàn pang-chān sìn-tô͘ ê tāi-chì, lín mā tio̍h chiàu góa kā Ka-lia̍p-thài ê chèng kàu-hōe só͘ chí-sī ê khì chòe.

² Múi lé-pài ê thâu chi̍t ji̍t, ta̍k-ê lâng tio̍h chiàu ka-kī ê siu-ji̍p the̍h chi̍t-kóa khí-lâi khǹg, chiah bián góa khì lín hia ê sî chiah khai-sí bō͘-koan.

³ Góa kàu-ūi ê sî, ōe chiong kài-siāu ê phoe kap lín ê koan-hiàn kau hō͘ lín ōe sìn-jīm--tit ê lâng, phài in tòa-khì Iâ-lō͘-sat-léng.

⁴ Nā-sī góa mā tio̍h khì khah hó, in ōe kap góa chòe-hé khì.

Pó-lô ê Lú-hêng Kè-ōe

⁵ Góa siūⁿ-beh keng-kè Má-kî-tùn, àn-sǹg keng-kè Má-kî-tùn liáu-āu beh khì lín hia,

⁶ tāi-khài ōe tòa lín hia kap lín chòe-hé kè tang-thiⁿ. Án-ni, bô-lūn beh koh khì tó-ūi, lín thang sàng góa chhut-hoat.

⁷ Góa bô ài tī kè-lō͘ ê sî chiah sūn-sòa khì khòaⁿ lín; Chú nā ún-chún, góa ǹg-bāng kap lín tòa chi̍t-chām-á.

⁸ Góa ōe tī Í-hut-só͘ tòa kàu Gō͘-sûn-choeh.

⁹ Tī chia sui-jiân ū chin chōe hoán-tùi ê lâng, m̄-kú mn̂g ūi góa tōa khui, thang chòe ū hāu-kó ê kang-chok.

¹⁰ Thê-mô͘-thài kàu-ūi ê sî, lín tio̍h kā i chiap-thāi, hō͘ i ōe-tàng an-sim, in-ūi i kap góa kâng-khoán teh chòe Chú ê kang.

¹¹ Lín lóng m̄-thang khòaⁿ i bô khí. Tio̍h sàng i pêng-an lī-khui, hō͘ i thang tńg-lâi góa chia, in-ūi góa teh thèng-hāu i kap hiah-ê hiaⁿ-tī chòe-hé lâi.

¹² Koan-hē lán ê hiaⁿ-tī A-pho-lô, góa ū ke̍k-le̍k khǹg i kap kî-tha ê hiaⁿ-tī khì hóng-būn lín; put-kò i ba̍k-chêng lóng bô àn-sǹg beh khì, nā ū tú-hó ê ki-hōe i chiū ōe khì.

Kiat-bé ê Ōe

¹³ Lín tio̍h kéng-séng, sìn-sim khiā-chāi, tio̍h ióng-kám, tio̍h kian-kiông.

¹⁴ Lín só͘ chòe it-chhè ê tāi-chì tio̍h ēng thiàⁿ-sim khì chòe.

¹⁵ Hiaⁿ-tī chí-bē, lín bat Sū-thê-hoat-ná chi̍t ke ê lâng; in sī A-kai-a-séng thâu chi̍t ke kui-sìn Ki-tok ê lâng, jia̍t-sim ho̍k-bū sìn-tô͘.

¹⁶ Góa khǹg lín tio̍h sūn-thàn chit-khoán lâng, í-ki̍p só͘-ū kap in chòe-hé tio̍h-bôa kang-chok ê lâng.

¹⁷ Sū-thê-hoat-ná, Hok-tô͘-ná-to͘, kap A-kai-kó͘ lâi góa chia, góa chin hoaⁿ-hí. Lín bô tī chia, in thòe lín lâi pang-chān góa.

¹⁸ In hō͘ góa kap lín pîⁿ-pîⁿ tit-tio̍h kek-lē. Só͘-í lín tio̍h kèng-tiōng chit-khoán lâng.

¹⁹ A-sè-a-séng ê chèng kàu-hōe lóng beh kā lín chhéng-an. A-ku-la kap Pek-ki-la, í-ki̍p tī in tau teh chū-hōe ê kàu-hōe, tī Chú ê lāi-bīn beh jia̍t-chhiat kā lín chhéng-an.

²⁰ Só͘-ū ê hiaⁿ-tī chí-bē lóng beh kā lín chhéng-an. Lín tio̍h chhin-chhiat hō͘-siōng chhéng-an.

²¹ Góa Pó-lô chhin-pit kā lín chhéng-an.

²² Nā ū lâng bô thiàⁿ Chú, tio̍h siū chiù-chó͘. Chú ah, chhiáⁿ lâi!

²³ Goān Chú Iâ-so͘ ê un-tián kap lín tông-chāi!

²⁴ Goān góa ê thiàⁿ kap lín só͘-ū sio̍k Ki-tok Iâ-so͘ ê lâng tông-chāi!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan