Bìoball air-loidhne

哥林多前書 15 - 現代台語譯本羅馬字版

Ki-tok ê Koh-oa̍h

¹ Hiaⁿ-tī chí-bē, góa beh kā lín thê-chhíⁿ: Góa thoân hō͘ lín ê hok-im lín ū chiap-siū, mā ēng che chòe sìn-gióng ê ki-chhó͘.

² Lín nā ū kian-siú góa só͘ thoân ê sìn-sit, m̄-sī khang-khang sìn, chiū ōe khò chit-ê hok-im tit-tio̍h kiù.

³ Góa í-keng ū chiong góa pún-sin só͘ niá-siū hit-ê siōng tiōng-iàu ê sìn-sit thoân hō͘ lín, chiū-sī chiàu Sèng-keng só͘ kì-chài, Ki-tok ūi-tio̍h lán ê chōe sí,

⁴ bâi-chòng; koh chiàu Sèng-keng só͘ kì-chài, I tē-saⁿ ji̍t koh-oa̍h;

⁵ I ū tùi Pí-tek hián-hiān, koh tùi cha̍p-jī sù-tô͘ hián-hiān.

⁶ Āu-lâi I ū chi̍t pái tùi gō͘-pah gōa ê hiaⁿ-tī hián-hiān; hiah-ê lâng ū ê í-keng sí, m̄-kú tōa-pō͘-hūn ê lâng iáu oa̍h--teh.

⁷ Āu-lâi I ū tùi Ngá-kok hián-hiān, koh tùi só͘-ū ê sù-tô͘ hián-hiān.

⁸ Chòe-āu, I mā tùi góa chit-ê ná-chún bô kàu-ge̍h chiū chhut-sì ê lâng hián-hiān.

⁹ Góa sī sù-tô͘ tiong siōng bî-sòe--ê, bōe-kham-tit chheng-chòe sù-tô͘, in-ūi góa bat pek-hāi Siōng-tè ê kàu-hōe.

¹⁰ M̄-kú ū Siōng-tè ê un-tián chiah ū kin-á-ji̍t ê góa, I sù hō͘ góa ê un-tián bô lo̍k-khong. Góa tian-tò pí kî-tha ê sù-tô͘ koh-khah phah-piàⁿ kang-chok, kî-si̍t m̄-sī góa ka-kī, sī Siōng-tè ê un-tián kap góa tông-chāi.

¹¹ Só͘-í, bô-lūn sī góa á-sī in, che sī goán só͘ teh thoân, lín í-keng ū teh sìn--ê.

Sìn-tô͘ ê Koh-oa̍h

¹² Kì-jiân goán só͘ soan-iông--ê sī Ki-tok í-keng ū tùi sí-lâng tiong koh-oa̍h, lín tiong-kan ná ū lâng kóng bô sí-lâng koh-oa̍h chit-khoán tāi-chì?

¹³ Nā bô sí-lâng koh-oa̍h, án-ni Ki-tok chiū bô koh-oa̍h.

¹⁴ Nā Ki-tok bô koh-oa̍h, án-ni goán só͘ soan-iông--ê sī khang-khang, lín ê sìn mā-sī khang-khang.

¹⁵ Án-ni goán chiū-sī teh ūi Siōng-tè chòe ké kiàn-chèng, in-ūi goán kiàn-chèng Siōng-tè í-keng hō͘ Ki-tok koh-oa̍h; sí-lâng nā bô koh-oa̍h, Siōng-tè chiū bô hō͘ Ki-tok koh-oa̍h.

¹⁶ Nā sí-lâng bô koh-oa̍h, Ki-tok chiū bô koh-oa̍h.

¹⁷ Ki-tok nā bô koh-oa̍h, lín ê sìn chiū bô lō͘-ēng, lín chiū iáu tī chōe-ok tiong.

¹⁸ Án-ni, hiah-ê sìn Ki-tok liáu-āu sí--khì ê lâng mā lóng bia̍t-bông lah.

¹⁹ Lán sìn Ki-tok ê lâng nā kan-ta tī hiān-sè ū ǹg-bāng, lán sī só͘-ū ê lâng ê tiong-kan siōng thang khó-lîn--ê.

²⁰ M̄-kú, hiān-chāi Siōng-tè í-keng ū hō͘ Ki-tok tùi sí-lâng tiong koh-oa̍h, thang chòe í-keng sí--khì ê lâng koh-oa̍h ê pó-chèng.

²¹ In-ūi sí thong-kè chi̍t ê lâng lâi, sí-lâng ê koh-oa̍h mā-sī thong-kè chi̍t ê lâng lâi.

²² Tùi A-tong chèng-lâng lóng tio̍h sí, án-ni, tùi Ki-tok chèng-lâng mā lóng ōe koh-oa̍h.

²³ Put-kò ta̍k-ê lâng lóng tio̍h chiàu ka-kī ê sūn-sū koh-oa̍h: Thâu chi̍t ê sī Ki-tok, sòa--lo̍h-khì sī Ki-tok lâi-lîm ê sî sio̍k I ê lâng,

²⁴ koh-lâi chiah sī boa̍t-kî; hit-sî I ōe siau-bia̍t it-chhè ê thóng-léng-chiá, chiáng-koân-chiá, kap koân-le̍k-chiá, jiân-āu chiong thóng-tī-koân kau hō͘ Pē Siōng-tè.

²⁵ In-ūi Ki-tok it-tēng tio̍h thóng-tī, ti̍t-kàu Siōng-tè hō͘ it-chhè ê tùi-te̍k lóng khut-ho̍k tī I ê kha-ē.

²⁶ Chòe-āu siū húi-bia̍t ê tùi-te̍k sī sí.

²⁷ In-ūi Sèng-keng kì-chài kóng, “Siōng-tè hō͘ bān-iú lóng khut-ho̍k tī I ê kha-ē.” Chin bêng-hián, chia só͘ kóng ê “bān-iú” pèng bô pau-hâm hō͘ bān-iú khut-ho̍k tī Ki-tok kha-ē ê Siōng-tè.

²⁸ Kàu bān-iú lóng khut-ho̍k Ki-tok ê sî, Kiáⁿ pún-sin mā ōe khut-ho̍k tī hō͘ bān-iú lóng khut-ho̍k ê Siōng-tè, thang hō͘ Siōng-tè oân-choân thóng-hat it-chhè.

²⁹ Nā m̄-sī án-ni, lâng thòe sí-lâng siū sóe ū sím-mi̍h ì-sù? Nā bô sí-lâng koh-oa̍h ê sū, sī-án-chóaⁿ beh thòe sí-lâng siū sóe?

³⁰ Goán sī-án-chóaⁿ tio̍h sî-sî-khek-khek mō͘-hiám?

³¹ Hiaⁿ-tī chí-bē, góa hōng lán ê Chú Ki-tok Iâ-so͘ tùi lín chiah-ê góa só͘ khoa-kháu ê lâng hó-táⁿ kóng: Góa ta̍k-ji̍t biān-tùi sí.

³² Góa tī Í-hut-só͘ kap “iá-siù” tò͘-cheng, nā sûn-chhùi sī chhut tī lâng ê tōng-ki, tùi góa ū sím-mi̍h lī-ek? Sí-lâng nā bô koh-oa̍h, ōe chhin-chhiūⁿ lâng teh kóng, “Lán lâi chia̍h, lâi lim, bîn-á-chài to beh sí lah!”

³³ M̄-thang hō͘ lâng phiàn--khì. “Kau-tio̍h pháiⁿ pêng-iú ōe phò-hoāi phín-tek!”

³⁴ Tio̍h kak-chhíⁿ, siūⁿ hō͘ chheng-chhó, m̄-thang koh hoān-chōe, in-ūi ū chi̍t-kóa lâng iáu m̄ bat Siōng-tè, góa kóng chiah-ê sī beh hō͘ lín chai thang kiàn-siàu.

Koh-oa̍h ê Thé

³⁵ Kiám-chhái ū lâng beh mn̄g, “Sí-lâng án-chóaⁿ koh-oa̍h? In ōe ēng sím-mi̍h khoán ê thé lâi?”

³⁶ Gōng-lâng! Lín iā-lo̍h tōe ê chéng-chí nā bô sí--khì, kiám ōe oa̍h--khí-lâi?

³⁷ Lín só͘ iā--ê, bô-lūn sī be̍h-á á-sī pa̍t-khoán ngó͘-kok, put-kò sī chéng-chí, m̄-sī āu-lâi tōa-châng ê hêng-thé.

³⁸ Siōng-tè chiàu I ê chí-ì hō͘ chéng-chí ū hêng-thé; ta̍k-khoán chéng-chí ū ka-kī ê hêng-thé.

³⁹ Ta̍k-khoán tōng-bu̍t ê jio̍k-thé mā lóng bô kâng-khoán: Lâng ê jio̍k-thé chi̍t khoán, siù-lūi chi̍t khoán, chiáu-lūi chi̍t khoán, hî-lūi koh chi̍t khoán.

⁴⁰ Ū thiⁿ-téng ê thé, ū tōe-chiūⁿ ê thé; thian-thé ê kng kap tōe-chiūⁿ ê thé ê kng bô kâng-khoán.

⁴¹ Ji̍t-thâu ū ji̍t-thâu ê kng, ge̍h ū ge̍h ê kng, chhiⁿ ū chhiⁿ ê kng; sīm-chì ta̍k-lia̍p chhiⁿ ê kng to lóng bô kâng-khoán.

⁴² Sí-lâng ê koh-oa̍h mā-sī án-ni. Tâi--lo̍h-khì--ê ōe hiú-nōa, koh-oa̍h--ê bōe hiú-nōa;

⁴³ tâi--lo̍h-khì--ê sī pi-chiān--ê, koh-oa̍h--ê sī êng-iāu--ê; tâi--lo̍h-khì--ê sī loán-jio̍k--ê, koh-oa̍h--ê sī ióng-chòng--ê;

⁴⁴ tâi--lo̍h-khì--ê sī hiat-jio̍k ê thé, koh-oa̍h--ê sī sio̍k-lêng ê thé. Kì-jiân ū hiat-jio̍k ê thé, chiū ū sio̍k-lêng ê thé.

⁴⁵ Só͘-í Sèng-keng ū kì-chài, “Thâu chi̍t ê lâng A-tong siū-chō chòe ū oa̍h-miā ê lâng”, m̄-kú lō͘-bé ê A-tong sī sù oa̍h-miā ê Sîn.

⁴⁶ Tāi-seng ū--ê m̄-sī sio̍k-lêng--ê, sī hiat-jio̍k--ê, āu-lâi chiah ū sio̍k-lêng--ê.

⁴⁷ Thâu chi̍t ê lâng sī tùi tōe chhut, sī thô͘ chō--ê; tē-jī ê lâng sī tùi thiⁿ lâi--ê.

⁴⁸ Só͘-ū ēng thô͘ chō ê lâng lóng kap hit-ê thâu chi̍t ê ēng thô͘ chō ê lâng kâng-khoán; só͘-ū sio̍k-thiⁿ ê lâng mā kap hit-ê lō͘-bé lâi sio̍k-thiⁿ ê lâng kâng-khoán.

⁴⁹ Tú chhin-chhiūⁿ lán ū hit-ê thâu chi̍t ê ēng thô͘ chō ê lâng ê hêng-siōng, mā ōe ū hit-ê lō͘-bé lâi sio̍k-thiⁿ ê lâng ê hêng-siōng.

⁵⁰ Hiaⁿ-tī chí-bē, góa kā lín kóng: Hiat-jio̍k ê thé bōe-tàng sêng-siū Siōng-tè-kok; ōe hiú-nōa--ê mā bōe-tàng sêng-siū bōe hiú-nōa--ê.

^51-52 Góa beh kā lín kóng chi̍t hāng ò-pì: Lán bōe lóng sí, put-kò tī chi̍t-sùn-kan, chi̍t-ba̍k-nih-kú, chòe-āu ê lat-pah chi̍t-ē tân, lán lóng ōe kái-piàn; lat-pah tân, sí-lâng ōe koh-oa̍h, pìⁿ-chòe bōe hiú-nōa--ê, lán mā lóng ōe kái-piàn.

⁵³ In-ūi chit-ê ōe hiú-nōa--ê it-tēng tio̍h pìⁿ-chòe bōe hiú-nōa--ê, ōe-sí--ê pìⁿ-chòe bōe-sí--ê.

⁵⁴ Tng ōe hiú-nōa--ê pìⁿ-chòe bōe hiú-nōa--ê, ōe-sí--ê pìⁿ-chòe bōe-sí--ê hit-sî, Sèng-keng só͘ kì-chài ê ōe chiū ōe èng-giām: Sí hō͘ sèng-lī thun--lo̍h-khì lah!

⁵⁵ Sí ah, lí ê sèng-lī tī tó-ūi? Sí ah, lí ê to̍k-chhì tī tó-ūi?

⁵⁶ Sí ê to̍k-chhì sī chōe, chōe ê ui-le̍k sī tùi Lu̍t-hoat lâi--ê.

⁵⁷ Kám-siā Siōng-tè, I thong-kè lán ê Chú Iâ-so͘ Ki-tok hō͘ lán tit-tio̍h sèng-lī.

⁵⁸ Só͘-í, chhin-ài ê hiaⁿ-tī chí-bē, tio̍h khiā-chāi, m̄-thang tōng-iâu. Tio̍h siông-siông chīn-la̍t ūi Chú chòe kang, in-ūi lín chai ūi Chú tio̍h-bôa chòe kang it-tēng bōe lo̍k-khong.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan