哥林多前書 12 - 現代台語譯本羅馬字版

Sèng Sîn ê Un-sù

¹ Hiaⁿ-tī chí-bē, koan-hē Sèng Sîn ê un-sù, góa ài lín liáu-kái.

² Lín chai, lín iáu-sī īⁿ-kàu-tô͘ ê sî chhut-chāi lâng chhōa-khì pài bōe kóng-ōe ê ngó͘-siōng.

³ Só͘-í góa ài lín liáu-kái, só͘-ū siū Siōng-tè ê Sîn kám-tōng ê lâng, bô lâng ōe kóng “Iâ-so͘ tio̍h siū chiù-chó͘”; nā bô siū Sèng Sîn kám-tōng, mā bô lâng ōe kóng “Iâ-so͘ sī Chú”.

⁴ Un-sù ū chin chōe khoán, m̄-kú sù un-sù--ê sī kâng chi̍t ūi Sèng Sîn.

⁵ Sū-hōng ū chin chōe khoán, m̄-kú sī sū-hōng kâng chi̍t ūi Chú.

⁶ Kang-chok ū chin chōe khoán, m̄-kú pang-chān ta̍k-ê lâng khì chòe ta̍k-hāng tāi-chì--ê sī kâng chi̍t ūi Siōng-tè.

⁷ Sèng Sîn tī ta̍k-ê lâng sin-chiūⁿ hián-bêng--ê, sī beh hō͘ tāi-ke tit-tio̍h lī-ek.

⁸ Ū lâng thong-kè Sèng Sîn tit-tio̍h thoân sìn-sit ê tì-hūi; ū lâng kun-kù kâng chi̍t ūi Sèng Sîn tit-tio̍h thoân sìn-sit ê tì-sek;

⁹ ū lâng tùi kâng chi̍t ūi Sèng Sîn tit-tio̍h sìn-sim; ū lâng tùi kâng chi̍t ūi Sèng Sîn tit-tio̍h i-pīⁿ ê un-sù;

¹⁰ ū lâng tit-tio̍h kiâⁿ sîn-jiah ê un-sù; ū lâng tit-tio̍h thoân Siōng-tè sìn-sit ê un-sù; ū lâng tit-tio̍h hun-piān Siōng-tè ê Sîn kap pa̍t-ê sîn ê un-sù; ū lâng tit-tio̍h kóng lêng-gú ê un-sù; ū lâng tit-tio̍h kóe-seh lêng-gú ê un-sù.

¹¹ Chiah-ê it-chhè lóng sī kâng chi̍t ūi Sèng Sîn ê ūn-chok, I chiàu ka-kī ê ì-sù chiong bô kâng-khoán ê un-sù pun hō͘ ta̍k-ê lâng.

Chi̍t Ê Seng-khu Ū Chin Chōe Chi-thé

¹² Chhin-chhiūⁿ seng-khu sī chi̍t ê, m̄-kú ū chin chōe chi-thé; seng-khu sui-jiân ū chin chōe chi-thé, m̄-kú seng-khu chí-ū chi̍t ê; Ki-tok mā-sī án-ni.

¹³ Bô-lūn sī Iû-thài-lâng á-sī Gōa-pang-lâng, lô͘-lē á-sī chū-iû ê lâng, lán lóng tùi kâng chi̍t ūi Sèng Sîn niá-siū sóe-lé, chiâⁿ-chòe chi̍t-thé, koh lán mā lóng lim kâng chi̍t ūi Sèng Sîn lâi tit-tio̍h lūn-te̍k.

¹⁴ Seng-khu m̄-sī chí-ū chi̍t ê chi-thé, sī ū chin chōe chi-thé.

¹⁵ Kha nā kóng “Góa m̄-sī chhiú, só͘-í bô sio̍k seng-khu”, kha m̄-sī án-ni kóng chiū bô sio̍k seng-khu.

¹⁶ Hī-á nā kóng “Góa m̄-sī ba̍k-chiu, só͘-í bô sio̍k seng-khu”, hī-á m̄-sī án-ni kóng chiū bô sio̍k seng-khu.

¹⁷ Choân seng-khu nā lóng sī ba̍k-chiu, beh ēng sím-mi̍h lâi thiaⁿ? Choân seng-khu nā lóng sī hī-á, beh ēng sím-mi̍h lâi phīⁿ?

¹⁸ Án-ni, Siōng-tè chiàu I ê chí-ì chiong ta̍k-khoán chi-thé an-tì tī seng-khu.

¹⁹ Choân-pō͘ nā chí-ū sī chi̍t ê chi-thé, ná ōe-tàng sǹg-chòe seng-khu?

²⁰ Án-ni, chi-thé ū chin chōe, m̄-kú seng-khu chí-ū chi̍t ê.

²¹ Ba̍k-chiu bōe-tàng kā chhiú kóng “Góa bô su-iàu lí!” Thâu mā bōe-tàng tùi kha kóng “Góa bô su-iàu lí!”

²² Kî-si̍t, lán ê seng-khu hiah-ê khòaⁿ--khí-lâi khah loán-jio̍k ê chi-thé tian-tò khah ū pit-iàu.

²³ Lán khòaⁿ khah m̄ chiūⁿ-ba̍k ê chi-thé, tian-tò khah tio̍h kā in khòaⁿ-tāng; khah pháiⁿ-khòaⁿ ê chi-thé, tian-tò khah tio̍h kā in chng-thāⁿ;

²⁴ hiah-ê khah hó-khòaⁿ ê chi-thé chiū bô su-iàu chng-thāⁿ. Siōng-tè chiong seng-khu an-pâi hó-sè, hō͘ hiah-ê khah bô tiōng-iàu ê chi-thé tit-tio̍h khah-tōa ê chun-tiōng,

²⁵ thang hō͘ seng-khu bián tì-kàu hun-lia̍t, tian-tò hō͘ ta̍k-ê chi-thé hō͘-siōng chiàu-kò͘.

²⁶ Chi̍t ê chi-thé siū-khó͘, kî-tha ê chi-thé chiū chòe-hé siū-khó͘; chi̍t ê chi-thé tit-tio̍h êng-kng, kî-tha ê chi-thé chiū chòe-hé hoaⁿ-hí.

²⁷ Lín sī Ki-tok ê seng-khu, ta̍k-ê lâng sī seng-khu ê chi-thé.

²⁸ Siōng-tè tī kàu-hōe só͘ an-tì--ê, tē-it sī sù-tô͘, tē-jī sī sian-ti, tē-saⁿ sī kàu-su, koh ū kiâⁿ sîn-jiah--ê, koh ū i-pīⁿ un-sù--ê, pang-chān lâng--ê, koán-lí sū-bū--ê, kóng ta̍k-khoán lêng-gú--ê.

²⁹ Ta̍k-ê lâng kiám lóng sī sù-tô͘? Kiám lóng sī sian-ti? Kiám lóng sī kàu-su? Kiám lóng sī kiâⁿ sîn-jiah--ê?

³⁰ Kiám lóng sī ū i-pīⁿ un-sù--ê? Kiám lóng sī kóng lêng-gú--ê? Kiám lóng sī kóe-seh lêng-gú--ê?

³¹ Lín tio̍h jia̍t-chhiat him-bō͘ hiah-ê koh-khah tiōng-iàu ê un-sù. Taⁿ góa kā lín chí-sī chi̍t tiâu siōng-hó ê lō͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan