Bìoball air-loidhne

哥林多前書 11 - 現代台語譯本羅馬字版

¹ Lín tio̍h o̍h góa, chhin-chhiūⁿ góa o̍h Ki-tok.

Lé-pài ê Sî Tà Thâu-kun ê Kui-tēng

² Lín put-sî ōe-kì-tit góa, koh chun-thàn góa thoân-siū hō͘ lín ê kà-sī, lín si̍t-chāi thang hō͘ góa o-ló.

³ Put-kò góa ài lín bêng-pe̍k, ta̍k-ê ta-po͘-lâng ê thâu sī Ki-tok, hū-jîn-lâng ê thâu sī tiōng-hu, Ki-tok ê thâu sī Siōng-tè.

⁴ Ta-po͘-lâng tī kong-kiōng tiûⁿ-só͘ kî-tó á-sī soan-káng Siōng-tè sìn-sit ê sî, nā tà thâu-kun sī bú-jio̍k i ê thâu Ki-tok.

⁵ M̄-kú cha-bó͘-lâng tī kî-tó á-sī soan-káng Siōng-tè sìn-sit ê sî, nā bô tà thâu-kun sī bú-jio̍k ka-kī ê thâu, chiū-sī i ê tiōng-hu. Chit-khoán ê hū-jîn-lâng kap thâu-mn̂g hō͘ lâng thì--khí-lâi ê cha-bó͘-lâng bô sím-mi̍h chha-pia̍t.

⁶ Cha-bó͘-lâng nā m̄ tà thâu-kun, thâu-mn̂g tio̍h chián--khí-lâi; kì-jiân khòaⁿ thì kng-thâu á-sī chián thâu-mn̂g chòe kiàn-siàu ê sū, chiū tio̍h tà thâu-kun.

⁷ Ta-po͘-lâng bô eng-kai tà thâu-kun, in-ūi i sī Siōng-tè ê hêng-siōng kap êng-iāu; cha-bó͘-lâng sī ta-po͘-lâng ê êng-iāu.

⁸ In-ūi ta-po͘-lâng m̄-sī tùi cha-bó͘-lâng chō--chhut-lâi--ê, cha-bó͘-lâng sī tùi ta-po͘-lâng chō--chhut-lâi--ê.

⁹ Ta-po͘-lâng m̄-sī ūi-tio̍h cha-bó͘-lâng chō--ê, m̄-kú cha-bó͘-lâng sī ūi-tio̍h ta-po͘-lâng chō--ê.

¹⁰ Ūi-tio̍h thiⁿ-sài ê iân-kò͘, cha-bó͘-lâng ê thâu eng-kai tà koân-ui ê kì-hō.

¹¹ Chóng-sī tī Chú ê lāi-bīn, ta-po͘-lâng su-iàu cha-bó͘-lâng, cha-bó͘-lâng mā su-iàu ta-po͘-lâng.

¹² In-ūi cha-bó͘-lâng sī tùi ta-po͘-lâng chō--chhut-lâi--ê, ta-po͘-lâng sī thong-kè cha-bó͘-lâng siⁿ--ê, m̄-kú bān-mi̍h lóng sī tùi Siōng-tè chhut--lâi-ê.

¹³ Lín tio̍h ka-kī phòaⁿ-toàn: Cha-bó͘-lâng bô tà thâu-kun tùi Siōng-tè kî-tó ū ha̍p-gî--bô?

¹⁴ Chū-jiân ê pún-sèng kà lán, lâu tn̂g thâu-mn̂g sī ta-po͘-lâng ê kiàn-siàu,

¹⁵ m̄-kú cha-bó͘-lâng lâu tn̂g thâu-mn̂g sī i ê êng-iāu. In-ūi tn̂g thâu-mn̂g thang chòe cha-bó͘-lâng ê jia-phè.

¹⁶ Nā ū lâng ài piān-pok, góa chí-ū ōe-tàng kóng, tī lán kap Siōng-tè ê kàu-hōe pèng bô kî-tha ê kui-kú.

Chú ê Boán-chhan

¹⁷ Góa tī chia beh kóng ê ōe m̄-sī beh kā lín o-ló, in-ūi lín ê chū-hōe sún-hāi pí lī-ek khah chōe.

¹⁸ Tē-it, góa ū thiaⁿ-kìⁿ kóng, lín tī kàu-hōe chū-hōe ê sî kiat-tóng hun-phài, góa siong-sìn ū chi̍t-pō͘-hūn sī sū-si̍t.

¹⁹ Lín tiong-kan lân-bián ū hun-lia̍t, án-ni chiah ōe-tàng khòaⁿ-chhut sím-mi̍h-lâng ōe thong-kè khó-giām.

²⁰ Lín chū-chi̍p ê sî, m̄-sī teh chia̍h Chú ê Boán-chhan.

²¹ In-ūi lín ta̍k-ê lâng kóaⁿ-kín chia̍h ka-kī tòa--lâi ê mi̍h-kiāⁿ, kiat-kó ū-ê iau, ū-ê chiú-chùi.

²² Lín kiám bô chhù thang chia̍h, thang lim? Lín sī teh biáu-sī Siōng-tè ê kàu-hōe, ia̍h teh hō͘ bô mi̍h thang chia̍h ê lâng kiàn-siàu sī--bô? Góa beh tùi lín kóng sím-mi̍h? Góa kiám tio̍h kā lín o-ló? Bōe, tī chit-hāng sū góa bōe kā lín o-ló!

²³ Góa tùi Chú só͘ niá-siū--ê, góa mā thoân hō͘ lín: Chú Iâ-so͘ hō͘ lâng chhut-bōe hit-mî, I the̍h piáⁿ,

²⁴ kám-siā Siōng-tè liáu-āu, peh-khui, kóng, “Chit-ê sī góa ê seng-khu, ūi-tio̍h lín hi-seng--ê; lín tio̍h chòe chit-ê lâi kì-liām góa.”

²⁵ Chiàu án-ni, chia̍h liáu-āu, I koh phâng poe, kóng, “Chit-ê poe sī sin ê iok, ēng góa ê huih siat-li̍p--ê, lín ta̍k-pái lim ê sî tio̍h chòe chit-ê lâi kì-liām góa.”

²⁶ Án-ni, lín ta̍k-pái chia̍h chit-ê piáⁿ, lim chit-ê poe, sī teh soan-kò Chú ê sí, ti̍t-kàu I lâi-lîm.

²⁷ Só͘-í, bô-lūn sím-mi̍h-lâng, nā bô ēng ha̍p-gî ê thài-tō͘ chia̍h Chú ê piáⁿ, lim Chú ê poe, sī tek-chōe Chú ê sin-thé kap huih.

²⁸ Ta̍k-ê lâng tio̍h séng-chhat ka-kī chiah thang chia̍h chit-ê piáⁿ, lim chit-ê poe.

²⁹ Lín chia̍h chit-ê piáⁿ, lim chit-ê poe, nā bô khak-si̍t bêng-pe̍k Chú ê seng-khu ê ì-sù, chia̍h chit-ê piáⁿ lim chit-ê poe sī ka-kī jiá sím-phòaⁿ.

³⁰ In-ūi án-ni, tī lín tiong-kan ū chin chōe lâng loán-jio̍k, phòa-pīⁿ, mā ū lâng tì-kàu sí.

³¹ Lán nā seng séng-chhat ka-kī, chiū bōe tì-kàu siū sím-phòaⁿ.

³² Put-kò lán siū Chú sím-phòaⁿ ê sî, sī teh siū koán-kàu, hō͘ lán bián tì-kàu kap sè-kan tâng siū tēng-chōe.

³³ Só͘-í, góa ê hiaⁿ-tī chí-bē, lín chū-chi̍p chia̍h Chú ê Boán-chhan ê sî, tio̍h hō͘-siōng thèng-hāu.

³⁴ Nā ū lâng iau, tio̍h tī chhù--ni̍h seng chia̍h, chiah bián lín chū-hōe tian-tò siū Siōng-tè sím-phòaⁿ. Kî-tha ê tāi-chì, góa khì lín hia ê sî chiah chhú-lí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan