Bìoball air-loidhne

哥林多前書 10 - 現代台語譯本羅馬字版

Kéng-kài Pài Ngó͘-siōng

¹ Hiaⁿ-tī chí-bē, góa ài lín ōe-kì--tit, lán ê chó͘-sian lóng kun-tè Mô͘-se, tī hûn ê pó-hō͘-ē kè Âng-hái.

² In tī hûn-lāi, tī hái--ni̍h, siū sóe kui tī Mô͘-se.

³ In lóng chia̍h kâng-khoán sio̍k-lêng ê chia̍h-mi̍h,

⁴ lóng lim kâng-khoán sio̍k-lêng ê chôaⁿ-chúi, chit-ê chôaⁿ-chúi sī tùi kap in tâng-kiâⁿ hit-ê sio̍k-lêng ê chio̍h-pôaⁿ lâu--chhut-lâi--ê; hit-ê chio̍h-pôaⁿ chiū-sī Ki-tok.

⁵ M̄-kú in tiong-kan tōa-pō͘-hūn ê lâng bô hō͘ Siōng-tè hoaⁿ-hí, lóng siū húi-bia̍t, tó kah kui khòng-iá.

⁶ Chiah-ê tāi-chì hō͘ lán chòe kàm-kài, kiò lán m̄-thang chhin-chhiūⁿ in tham-loân pháiⁿ-tāi.

⁷ M̄-thang chhin-chhiūⁿ in tiong-kan ū chi̍t-kóa lâng khì pài ngó͘-siōng; chiàu Sèng-keng kì-chài, “Chiah-ê chú-bîn chē--lo̍h-khì, tōa-chia̍h tōa-lim; khiā--khí-lâi, tian-kông loān-sńg.”

⁸ Lán m̄-thang chhin-chhiūⁿ in ū chi̍t-kóa lâng îm-loān, soah tī chi̍t ji̍t lāi sí nn̄g-bān saⁿ-chheng lâng.

⁹ M̄-thang chhin-chhiūⁿ in tiong-kan ū chi̍t-kóa lâng chhì-thàm Chú, soah hō͘ chôa kā-sí.

¹⁰ M̄-thang chhin-chhiūⁿ in tiong-kan ū chi̍t-kóa lâng kóng oàn-giân, soah hō͘ Húi-bia̍t-chiá châu-bia̍t.

¹¹ In só͘ tú--tio̍h chiah-ê tāi-chì thang chòe pa̍t-lâng ê kàm-kài, koh kì-lio̍k--lo̍h-lâi thang kéng-kài lán chiah-ê oa̍h tī boa̍t-sè ê lâng.

¹² Só͘-í, siūⁿ-kóng ka-kī khiā-chāi--ê tio̍h kín-sīn, chiah bōe poa̍h-tó.

¹³ Lín só͘ tú--tio̍h ê khó-giām lóng sī lâng ōe tú--tio̍h-ê. Siōng-tè sī sìn-si̍t--ê, I bōe hō͘ lín tú-tio̍h tam-tng bōe khí ê khó-giām. Lín tú-tio̍h khó-giām ê sî, I ōe kā lín khui chi̍t tiâu chhut-lō͘, hō͘ lín jím-siū ōe tiâu.

¹⁴ Só͘-í, chhin-ài ê hiaⁿ-tī chí-bē, pài ngó͘-siōng ê sū lóng m̄-thang chhap--tio̍h.

¹⁵ Góa khòaⁿ lín chòe bêng-pe̍k sū-lí ê lâng kap lín kóng-ōe; góa só͘ kóng--ê lín ka-kī thang phòaⁿ-toàn.

¹⁶ Lán teh lim hit-ê kám-siā ê poe, kiám m̄-sī teh hun-hióng Ki-tok ê huih? Lán teh chia̍h hit-ê peh-khui ê piáⁿ, kiám m̄-sī teh hun-hióng Ki-tok ê seng-khu?

¹⁷ In-ūi piáⁿ chí-ū chi̍t tè, lán sui-jiân chin chōe lâng, iáu-kú sī chi̍t-thé, in-ūi lán chòe-hé chia̍h kâng chi̍t tè piáⁿ.

¹⁸ Ēng Í-sek-lia̍t-lâng chòe lē, hiah-ê chia̍h chè-mi̍h ê lâng kap chè-tôaⁿ ū koan-hē.

¹⁹ Án-ni góa teh kóng--ê sī sím-mi̍h ì-sù? Sī kóng ngó͘-siōng ū sím-mi̍h tiōng-iàu, chè-mi̍h ū sím-mi̍h iàu-kín sī--bô?

²⁰ M̄-sī, góa sī teh kóng, hiàn tī īⁿ-kàu chè-tôaⁿ téng ê chè-mi̍h sī hiàn hō͘ kúi, m̄-sī hiàn hō͘ Siōng-tè. Góa bô ài lín kap kúi kau-chhap.

²¹ Lín lim Chú ê poe, bōe-ēng-tit koh lim kúi ê poe; lín chham-ka Chú ê iàn-se̍k, bōe-ēng-tit koh chham-ka kúi ê iàn-se̍k.

²² Lán beh kek Chú oàn-tò͘ sī--bô? Lán pí I khah kiông sī--bô?

²³ Ū lâng kóng “Ta̍k-hāng lóng thang chòe”, put-kò m̄-sī ta̍k-hāng lóng ū lī-ek. “Ta̍k-hāng lóng thang chòe”, put-kò m̄-sī ta̍k-hāng sū lóng ōe-tàng pang-chān lâng.

²⁴ Ta̍k-ê lâng lóng m̄-thang kiû ka-kī ê lī-ek, tio̍h kiû pa̍t-lâng ê lī-ek.

²⁵ Chhī-tiûⁿ teh bōe ê bah lóng thang bóe lâi chia̍h, m̄-bián ūi-tio̍h liông-sim ê iân-kò͘ mn̄g-tang-mn̄g-sai.

²⁶ In-ūi Sèng-keng kóng, “Tōe kap tōe-chiūⁿ ê bān-mi̍h lóng sio̍k tī Chú.”

²⁷ Nā ū bī-sìn-chiá chhiáⁿ lín chia̍h-pn̄g, lín nā khì, pâi tī lín bīn-chêng ê mi̍h chòe lín chia̍h, m̄-bián ūi-tio̍h liông-sim ê iân-kò͘ mn̄g-tang-mn̄g-sai.

²⁸ M̄-kú nā ū lâng kā lín kóng “Chiah-ê chia̍h-mi̍h ū chè-kè ngó͘-siōng”, lín chiū ūi-tio̍h hit-ê kā lín kóng ê lâng kap liông-sim ê iân-kò͘, mài chia̍h hit-ê chia̍h-mi̍h.

²⁹ Góa só͘ chí ê sī hit-ê lâng ê liông-sim, m̄-sī lín ê liông-sim. Kiám-chhái ū lâng ōe mn̄g, “Góa ê chū-iû ná tio̍h siū pa̍t-lâng ê liông-sim phoe-phòaⁿ?

³⁰ Góa nā kám-siā lâi chia̍h, ná tio̍h in-ūi chia̍h kám-siā ê mi̍h siū húi-pòng?”

³¹ Só͘-í, lín bô-lūn sī chia̍h sī lim, á-sī chòe sím-mi̍h, lóng tio̍h ūi-tio̍h êng-iāu Siōng-tè lâi chòe.

³² Bô-lūn sī tùi Iû-thài-lâng, Gōa-pang-lâng, á-sī Siōng-tè ê kàu-hōe, lín lóng m̄-thang chiâⁿ-chòe in ê chó͘-gāi.

³³ Lín tio̍h chiàu góa só͘ chòe--ê khì chòe. Góa ūi-tio̍h hō͘ tāi-ke hoaⁿ-hí, m̄-bat kiû ka-kī ê lī-ek, sī kiû tāi-ke ê lī-ek, thang hō͘ in tit-tio̍h kiù.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan