Bìoball air-loidhne

加拉太書 5 - 現代台語譯本羅馬字版

Ki-tok-tô͘ ê Chū-iû

¹ Ūi-tio̍h beh hō͘ lán ū chū-iû, Ki-tok í-keng ū kā lán tháu-pàng. Só͘-í tio̍h khiā-chāi, m̄-thang koh siū ap-chè chòe lô͘-lē!

² Góa Pó-lô kā lín kóng, tio̍h chù-ì thiaⁿ: Lín nā siū kat-lé, Ki-tok chiū tùi lín lóng bô lī-ek.

³ Góa koh chi̍t piàn kā ta̍k-ê kam-goān chiap-siū kat-lé ê lâng kéng-kò, chit-ê lâng ū gī-bū chun-siú choân-pō͘ ê Lu̍t-hoat!

⁴ Lín chiah-ê siūⁿ-beh khò chun-siú Lu̍t-hoat tit-tio̍h kap Siōng-tè ū ha̍p-gî koan-hē ê lâng, sī kap Ki-tok toān-choa̍t koan-hē, sit-lo̍h Siōng-tè ê un-tián.

⁵ Goán pek-chhiat teh thèng-hāu, ǹg-bāng Siōng-tè hō͘ lán kap I ū ha̍p-gî ê koan-hē; chit-ê ǹg-bāng khò Siōng-tè ê Sîn, tùi sìn chiah ōe-tàng si̍t-hiān.

⁶ In-ūi lán nā kap Ki-tok Iâ-so͘ kiat-liân, ū siū kat-lé á-sī bô siū kat-lé lóng bô iàu-kín, iàu-kín--ê sī ū thiàⁿ ê hêng-tōng piáu-hiān--chhut-lâi ê sìn-sim.

⁷ Lín í-keng chòe-liáu chin hó; sī siáⁿ-lâng kā lín chó͘-tòng, hō͘ lín bô sūn-ho̍k chin-lí?

⁸ Kiò lín án-ni chòe--ê m̄-sī hit-ūi ho͘-tiàu lín ê Siōng-tè.

⁹ Sio̍k-gú kóng, “Chi̍t-sut-á kàⁿ-bú ōe hō͘ kui-ê mī-oân hoat--khí-lâi.”

¹⁰ Tī Chú ê lāi-bīn góa siong-sìn lín bōe kap góa ū bô sio-siâng ê siūⁿ-hoat. Hiah-ê teh jiáu-loān lín--ê, bô-lūn sī sím-mi̍h-lâng, it-tēng ōe siū Siōng-tè chek-hoa̍t.

¹¹ Hiaⁿ-tī chí-bē, góa nā kè-sio̍k thoân tio̍h siū kat-lé, sī-án-chóaⁿ góa iáu-teh siū pek-hāi? Góa nā án-ni chòe, Ki-tok ê si̍p-jī-kè chiū bōe chiâⁿ-chòe chó͘-gāi.

¹² Hiah-ê teh jiáu-loān lín ê lâng lêng-khó ka-kī iam--khí-lâi!

¹³ Hiaⁿ-tī chí-bē, Siōng-tè ho͘-tiàu lín sī beh hō͘ lín chū-iû. Put-kò m̄-thang hō͘ lín ê chū-iû pìⁿ-chòe hòng-chhiòng su-io̍k ê ki-hōe. Tio̍h ēng thiàⁿ-sim hō͘-siōng ho̍k-bū.

¹⁴ In-ūi choân-pō͘ Lu̍t-hoat pau-hâm tī “Tio̍h thiàⁿ chhù-piⁿ chhin-chhiūⁿ thiàⁿ ka-kī” chit-ê kài-bēng.

¹⁵ Tio̍h sió-sim, lín nā iáu-teh sio-kā sio-thun, ōe hō͘-siōng châu-bia̍t.

Sèng Sîn kap Lâng ê Pún-sèng

¹⁶ Góa ê ì-sù sī: Lín tio̍h chiàu Sèng Sîn ê ín-chhōa seng-oa̍h, choa̍t-tùi m̄-thang kiû boán-chiok pún-sèng ê io̍k-bōng.

¹⁷ In-ūi lâng pún-sèng ê io̍k-bōng tùi-khòng Sèng Sîn; Sèng Sîn tùi-khòng lâng ê pún-sèng. Chit nn̄g ê hō͘-siōng te̍k-tùi, tì-kàu lín bōe-tàng chiàu ka-kī só͘ ài khì chòe.

¹⁸ Lín nā hō͘ Sèng Sîn ín-chhōa, chiū bōe siū Lu̍t-hoat khòng-chè.

¹⁹ Lâng pún-sèng io̍k-bōng ê hêng-ûi chin bêng-hián, chiū-sī îm-loān, ù-òe, hò͘ⁿ-sek,

²⁰ pài ngó͘-siōng, kiâⁿ siâ-su̍t, te̍k-tùi, tò͘-cheng, chi̍t-tò͘, siū-khì, chū-su, kiat-tóng, hun-phài,

²¹ oàn-tò͘, chiú-chùi, hoa-thian-chiú-tōe, téng. Góa í-chêng bat kā lín kéng-kò, chit-chūn koh chi̍t piàn kā lín kéng-kò: Chòe chit-khoán tāi-chì ê lâng bōe-tàng chiâⁿ-chòe Siōng-tè-kok ê chú-bîn!

²² M̄-kú Sèng Sîn só͘ kiat ê ké-chí sī: Jîn-ài, hoaⁿ-hí, hô-pêng, jím-nāi, jîn-chû, liông-siān, tiong-si̍t,

²³ un-jiû, chiat-chè. Chit-khoán hêng-ûi it-poaⁿ ê hoat-lu̍t bô teh kìm-chí.

²⁴ Hiah-ê sio̍k Ki-tok Iâ-so͘ ê lâng í-keng ū chiong pún-sèng kap it-chhè ê siâ-chêng su-io̍k chòe-hé tèng-sí tī si̍p-jī-kè.

²⁵ Kì-jiân lán khò Sèng Sîn teh oa̍h, lán tio̍h sūn-thàn Sèng Sîn lâi seng-oa̍h.

²⁶ Lán m̄-thang tui-kiû hu-êng, m̄-thang pí-chhú kek-khì, hō͘-siōng oàn-tò͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan