Bìoball air-loidhne

加拉太書 4 - 現代台語譯本羅馬字版

¹ Góa koh kóng, kè-sêng-jîn sui-jiân sī choân-pō͘ châi-sán ê só͘-iú-chiá, i tī bī-sêng-liân ê sî kap lô͘-lē bô sím-mi̍h chha-pia̍t,

² it-ti̍t kàu lāu-pē só͘ tēng ê ji̍t-chí, tio̍h siū kàm-hō͘-jîn kap koán-ke ê kàm-tok.

³ Lán mā chhin-chhiūⁿ án-ni, tī lêng-sèng bī-sêng-liân ê sî siū ú-tiū kan ê sîn-lêng chi-phòe chòe lô͘-lē.

⁴ M̄-kú sî-kî kàu, Siōng-tè chhe ka-kī ê Kiáⁿ, hō͘ I tùi hū-jîn-lâng lâi chhut-sì, oa̍h tī Lu̍t-hoat-ē,

⁵ ūi-tio̍h beh kiù-sio̍k oa̍h tī Lu̍t-hoat-ē ê lâng, thang hō͘ Siōng-tè kā lán siu khí-lâi chòe kiáⁿ-jî.

⁶ In-ūi lín sī Siōng-tè ê kiáⁿ-jî, I ū chhe I ê Kiáⁿ ê Sîn ji̍p lín ê sim, hō͘ lín kiò “A-pa, Pē!”

⁷ Án-ni, lí bô koh chòe lô͘-lē, sī kiáⁿ-jî; kì-jiân sī kiáⁿ-jî, Siōng-tè chiū hō͘ lí chòe kè-sêng-jîn.

Pó-lô Koan-hoâi Ka-lia̍p-thài-lâng

⁸ Í-chêng, lín m̄ bat Siōng-tè ê sî, chòe hiah-ê pún-chit m̄-sī chin Sîn ê sîn-bêng ê lô͘-lē, siū in chi-phòe.

⁹ M̄-kú hiān-chāi lín í-keng bat Siōng-tè, á-sī kóng hō͘ Siōng-tè bat, sī-án-chóaⁿ lín koh tò-khì chhē hiah-ê bô-la̍t koh bô lō͘-ēng ê sîn-lêng, chòe in ê lô͘-lē?

¹⁰ Lín siú te̍k-pia̍t ê ji̍t, ge̍h, kap nî-á-choeh-á.

¹¹ Góa kiaⁿ-liáu góa ūi-tio̍h lín só͘ chòe--ê lóng sī pe̍h-pe̍h chòe.

¹² Hiaⁿ-tī chí-bē, in-ūi góa í-keng ū chiâⁿ-chòe chhin-chhiūⁿ lín, góa khún-kiû lín mā tio̍h chiâⁿ-chòe chhin-chhiūⁿ góa. Lín m̄-bat khek-khui góa.

¹³ Lín ōe-kì--tit, góa thâu chi̍t piàn thoân hok-im hō͘ lín ê sî sī in-ūi góa seng-khu ū pīⁿ.

¹⁴ Sui-jiân góa kiān-khong ê būn-tôe chiâⁿ-chòe lín ê tāng-tàⁿ, lín to bô khòaⁿ-khin góa, bô kū-choa̍t góa. Lín tian-tò chiap-thāi góa chhin-chhiūⁿ teh chiap-thāi Siōng-tè ê thiⁿ-sài, chhin-chhiūⁿ teh chiap-thāi Ki-tok Iâ-so͘.

¹⁵ Lín tng-sî ê hoaⁿ-hí boán-chiok ná soah bô--khì? Góa káⁿ kóng, lín tng-sî nā tio̍h kā ba̍k-chiu ó͘ chhut-lâi hō͘ góa mā kam-goān.

¹⁶ Hiān-chāi, góa tùi lín chiàu-si̍t kóng soah pìⁿ-chòe lín ê tùi-te̍k!

¹⁷ Hiah-ê lâng tùi lín jia̍t-chêng pèng m̄-sī chhut tī hó-ì, tian-tò sī siūⁿ-beh thiah-khui lín kap góa ê koan-hē, hō͘ lín thang tùi in jia̍t-chêng.

¹⁸ Hó-sū m̄-sī kan-ta góa kap lín chòe-hé ê sî chiah chòe, tio̍h put-sî jia̍t-sim khì chòe.

¹⁹ Góa ê sòe-kiáⁿ, ūi-tio̍h beh hō͘ lín ū Ki-tok ê khoán-sit, góa koh chi̍t piàn keng-kè siⁿ-kiáⁿ ê thòng-khó͘.

²⁰ Góa chin ài chit-chūn chiū khì lín hia, thang ēng bô kâng-khoán ê kháu-khì kap lín kóng-ōe. Góa si̍t-chāi m̄ chai beh án-chóaⁿ tùi-thāi lín!

Hā-kah kap Sa-la ê Lē

²¹ Lín chiah-ê ài hō͘ Lu̍t-hoat koán-hat ê lâng, kā góa kóng, lín kiám bô beh thiaⁿ Lu̍t-hoat teh kóng sím-mi̍h?

²² In-ūi Lu̍t-hoat ū kì-chài: A-pek-la-hán ū nn̄g ê kiáⁿ, chi̍t ê sī lú-pī siⁿ--ê, koh chi̍t ê sī chū-iû ê hū-jîn-lâng siⁿ--ê.

²³ Lú-pī ê kiáⁿ sī thong-kè jîn-sèng siⁿ--ê; chū-iû ê hū-jîn-lâng siⁿ ê kiáⁿ sī thong-kè Siōng-tè ê èng-ún.

²⁴ Che thang ēng ē-bīn ê phì-jū lâi soat-bêng: Chit nn̄g ê hū-jîn-lâng tāi-piáu nn̄g chióng khè-iok. Chi̍t ê sī Hā-kah, tāi-piáu Se-nāi-soaⁿ ê iok, siⁿ ê kiáⁿ choh lô͘-lē.

²⁵ Hā-kah chí A-la-pek ê Se-nāi-soaⁿ, tāi-piáu hiān-chāi ê Iâ-lō͘-sat-léng; in-ūi i kap i ê kiáⁿ-sun lóng sī lô͘-lē.

²⁶ Put-kò thiⁿ-téng ê Iâ-lō͘-sat-léng sī chū-iû--ê, sī lán ê lāu-bú.

²⁷ In-ūi Sèng-keng ū kì-chài: Bōe hoâi-īn, bōe siⁿ-kiáⁿ ê hū-jîn-lâng ah, tio̍h hoaⁿ-hí! M̄-bat keng-kè siⁿ-kiáⁿ thòng-khó͘ ê hū-jîn-lâng ah, tio̍h tōa-siaⁿ hoaⁿ-hí chhiùⁿ-koa! In-ūi siū pàng-sak ê hū-jîn-lâng pí ū tiōng-hu--ê koh-khah chōe kiáⁿ-jî!

²⁸ Hiaⁿ-tī chí-bē, lín chhin-chhiūⁿ Í-sat, sī Siōng-tè èng-ún ê kiáⁿ-jî.

²⁹ Tng-sî, tùi jîn-sèng siⁿ--ê pek-hāi tùi Siōng-tè ê Sîn siⁿ--ê; hiān-chāi mā-sī án-ni.

³⁰ M̄-kú Sèng-keng án-chóaⁿ kóng? “Tio̍h kā lú-pī kap i ê kiáⁿ kóaⁿ--chhut-khì, in-ūi lú-pī ê kiáⁿ bōe-tàng kap chū-iû ê hū-jîn-lâng ê kiáⁿ pîⁿ-pîⁿ kè-sêng sán-gia̍p!”

³¹ Só͘-í, hiaⁿ-tī chí-bē, lán m̄-sī lú-pī ê kiáⁿ-jî, sī chū-iû ê hū-jîn-lâng ê kiáⁿ-jî.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan