Bìoball air-loidhne

加拉太書 2 - 現代台語譯本羅馬字版

Pó-lô Siū Kî-tha ê Sù-tô͘ Chiap-la̍p

¹ Cha̍p-sì nî āu, góa koh chiūⁿ Iâ-lō͘-sat-léng, Pa-ná-pa kap góa chòe-hé khì, mā chhōa Thê-to chòe-hé khì.

² Góa chiūⁿ Iâ-lō͘-sat-léng sī chun-thàn Chú ê khé-sī. Góa ū su-hā tùi hiah-ê léng-siù soat-bêng góa tùi Gōa-pang-lâng só͘ thoân ê hok-im, chiah bián hō͘ góa kè-khì á-sī hiān-chāi só͘ phun-pho phah-piàⁿ--ê lóng lo̍k-khong.

³ Kap góa chòe-hé khì ê Thê-to, sui-jiân sī Hi-la̍h-lâng, mā bô lâng kiông-pek i chiap-siū kat-lé.

⁴ Ū chi̍t-kóa ké sìn-tô͘ pì-bi̍t chǹg ji̍p-lâi lán tiong-kan, chhin-chhiūⁿ cheng-thàm chhàng--ji̍p-lâi, beh thàm lán tùi Ki-tok Iâ-so͘ só͘ tit--tio̍h ê chū-iû, siūⁿ-beh hō͘ lán chiâⁿ-chòe lô͘-lē, sòng-sit chū-iû.

⁵ M̄-kú, ūi-tio̍h beh hō͘ lín thang pó-choân hok-im ê chin-lí, goán chi̍t-si-á to bô tùi in niū-pō͘.

⁶ M̄-kú hiah-ê hō͘ lâng khòaⁿ-chòe léng-siù--ê, bô-lūn in ê tōe-ūi sī sím-mi̍h, tùi góa lóng bô éng-hióng, in-ūi Siōng-tè bô ēng gōa-māu phòaⁿ-toàn lâng. In pèng bô lēng-gōa hō͘ góa sím-mi̍h chí-sī,

⁷ tian-tò liáu-kái Siōng-tè ū chiong thoân hok-im hō͘ Gōa-pang-lâng ê jīm-bū kau-thok góa, tú chhin-chhiūⁿ I ū chiong thoân hok-im hō͘ Iû-thài-lâng ê jīm-bū kau-thok Pí-tek.

⁸ In-ūi Siōng-tè ū ēng I ê koân-lêng hō͘ góa chiâⁿ-chòe Gōa-pang-lâng ê sù-tô͘, tú chhin-chhiūⁿ I mā ū hō͘ Pí-tek chiâⁿ-chòe Iû-thài-lâng ê sù-tô͘.

⁹ Ngá-kok, Pí-tek, kap Iok-hān chiah-ê hō͘ lâng khòaⁿ-chòe sī kàu-hōe thiāu-chio̍h--ê, kì-jiân chai-iáⁿ Siōng-tè ū chiong chit-ê te̍k-pia̍t ê sú-bēng kau-tài góa, chiū kap Pa-ná-pa í-ki̍p góa ak chiàⁿ-chhiú piáu-sī lóng sī tâng-kang, koh tông-ì goán tī Gōa-pang-lâng tiong-kan kang-chok, in tī Iû-thài-lâng tiong-kan kang-chok.

¹⁰ In chí-ū iau-kiû goán tio̍h koan-hoâi Iû-thài-lâng tiong ê sàn-chhiah-lâng; chit-hāng tāi-chì tú-tú sī góa it-ti̍t lô-le̍k beh chòe--ê.

Pó-lô tī An-thê-o Chek-pī Pí-tek

¹¹ Pí-tek lâi kàu An-thê-o ê sî, góa tng-bīn kā i hoán-tùi, in-ūi i ū thang chek-pī ê só͘-chāi.

¹² Goân-lâi ū chi̍t-kóa tùi Ngá-kok hia lâi ê lâng iáu-bē kàu í-chêng, Pí-tek ū kap Gōa-pang-lâng ê hiaⁿ-tī chòe-hé chia̍h-pn̄g, m̄-kú hiah-ê lâng kàu í-āu, i soah siám-pī Gōa-pang-lâng sìn-tô͘, m̄-káⁿ koh kap in chòe-hé, in-ūi kiaⁿ hiah-ê chú-tiuⁿ Gōa-pang-lâng tio̍h siū kat-lé ê lâng.

¹³ Kî-tha ê Iû-thài-lâng sìn-tô͘ mā chhin-chhiūⁿ Pí-tek chòe hit-khoán hu-ké ê tāi-chì, liân Pa-ná-pa mā siū éng-hióng khì chòe kâng-khoán bô goân-chek ê tāi-chì.

¹⁴ Góa chi̍t-ē khòaⁿ-tio̍h in bô chiàu hok-im ê chin-lí teh chòe, chiū tī chèng-lâng ê bīn-chêng tùi Pí-tek kóng, “Sui-jiân lí sī Iû-thài-lâng, m̄-kú bô chiàu Iû-thài-lâng khiok chhin-chhiūⁿ Gōa-pang-lâng teh seng-oa̍h, lí ná thang kiông-pek Gōa-pang-lâng tio̍h o̍h Iû-thài-lâng seng-oa̍h?”

Tùi Sìn kap Siōng-tè Ū Ha̍p-gî ê Koan-hē

¹⁵ Lán pún-sin chhut-sì chiū-sī Iû-thài-lâng, m̄-sī “gōa-pang chōe-jîn”.

¹⁶ Put-kò, lán chai lâng ōe-tàng kap Siōng-tè ū ha̍p-gî ê koan-hē sī khò sìn Iâ-so͘ Ki-tok, m̄-sī khò chun-siú Mô͘-se ê Lu̍t-hoat. Lán ka-kī mā sìn Ki-tok Iâ-so͘, sī beh hō͘ lán tùi sìn Ki-tok ōe-tàng kap Siōng-tè ū ha̍p-gî ê koan-hē, m̄-sī khò chun-siú Lu̍t-hoat, in-ūi bô lâng ōe-tàng khò chun-siú Lu̍t-hoat kap Siōng-tè ū ha̍p-gî ê koan-hē.

¹⁷ Lán nā siūⁿ-beh tùi óa-khò Ki-tok kap Siōng-tè ū ha̍p-gî ê koan-hē, iáu-kú hō͘ lâng khòaⁿ-chòe sī chōe-jîn, án-ni Ki-tok sī chōe ê chhe-ēng sī--bô? Choa̍t-tùi m̄-sī!

¹⁸ Góa nā koh khí-chō góa í-chêng só͘ thiah-húi--ê, chiū chèng-bêng góa sī ûi-pōe Lu̍t-hoat ê lâng.

¹⁹ In-ūi, chiàu Lu̍t-hoat góa í-keng sí tī Lu̍t-hoat-ē, sī beh hō͘ góa ǹg Siōng-tè lâi oa̍h. Góa í-keng kap Ki-tok tâng tèng si̍p-jī-kè;

²⁰ án-ni, hiān-chāi teh oa̍h--ê m̄-sī góa, sī Ki-tok tī góa ê lāi-bīn teh oa̍h. Góa hiān-chāi teh oa̍h, sī khò sìn Siōng-tè ê Kiáⁿ teh oa̍h; I thiàⁿ góa, ūi-tio̍h góa pàng-sak sìⁿ-miā.

²¹ Góa bô hō͘ Siōng-tè ê un-tián sit-khì hāu-le̍k. Lâng nā khò Lu̍t-hoat ōe-tàng kap Siōng-tè ū ha̍p-gî ê koan-hē, Ki-tok sí chiū bô-chhái-kang.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan