Bìoball air-loidhne

加拉太書 1 - 現代台語譯本羅馬字版

¹ Góa sī Pó-lô. Góa choh sù-tô͘ m̄-sī tùi lâng á-sī thong-kè lâng, sī thong-kè Iâ-so͘ Ki-tok kap hō͘ I tùi sí-lâng tiong koh-oa̍h ê Pē Siōng-tè ê ho͘-tiàu.

² Góa kap tī chia ê hiaⁿ-tī chí-bē siá-phoe hō͘ Ka-lia̍p-thài ê chèng kàu-hōe.

³ Goān lán ê Pē Siōng-tè kap Chú Iâ-so͘ Ki-tok sù lín un-tián kap pêng-an!

⁴ Ūi-tio̍h beh kiù lán thoat-lī hiān-kim chit-ê siâ-ok ê sè-tāi, Ki-tok ū chiàu lán ê Pē Siōng-tè ê chí-ì ūi-tio̍h lán ê chōe hiàn I pún-sin.

⁵ Goān êng-kng kui hō͘ Siōng-tè ti̍t-kàu éng-éng-oán-oán. Amen!

Î-it ê Hok-im

⁶ Lín hō͘ góa chin tio̍h-kiaⁿ! Lín kèng-jiân hiah-ni̍h kín chiū pàng-sak hit-ūi thong-kè Ki-tok ê un-tián ho͘-tiàu lín ê Siōng-tè, khì tè pa̍t-ê hok-im.

⁷ Kî-si̍t bô pa̍t-khoán ê hok-im. Góa án-ni kóng sī in-ūi ū chi̍t-kóa lâng kā lín jiáu-loān, siūⁿ-beh khiok-kái Ki-tok ê hok-im.

⁸ M̄-kú, bô-lūn sī goán á-sī tùi thiⁿ-téng lâi ê thiⁿ-sài, só͘ thoân--ê nā kap goán í-chêng thoân hō͘ lín ê hok-im bô kâng-khoán, i eng-kai siū chiù-chó͘!

⁹ Goán bat kóng, hiān-chāi koh kóng chi̍t piàn: Nā ū lâng só͘ thoân ê hok-im kap lín í-keng chiap-siū--ê bô kâng-khoán, i eng-kai siū chiù-chó͘!

¹⁰ Góa chit-chūn án-ni kóng, kiám sī beh tit-tio̍h lâng á-sī Siōng-tè ê chheng-chàn? Góa kiám sī beh tit-tio̍h lâng ê hoaⁿ-hí? Góa nā iáu-teh siūⁿ-beh tit-tio̍h lâng ê hoaⁿ-hí, góa chiū m̄-sī Ki-tok ê po̍k-jîn.

Pó-lô Án-chóaⁿ Chiâⁿ-chòe Sù-tô͘

¹¹ Hiaⁿ-tī chí-bē, góa ài lín chai, góa só͘ thoân ê hok-im m̄-sī lâng siūⁿ--chhut-lâi--ê.

¹² Chit-ê hok-im, góa m̄-sī tùi lâng niá-siū, mā m̄-sī tùi lâng ha̍k-si̍p, sī tùi Iâ-so͘ Ki-tok lâi ê khé-sī.

¹³ Lín í-keng ū thiaⁿ-kìⁿ góa í-chêng choh Iû-thài kàu-tô͘ ê sî ê só͘-kiâⁿ-só͘-chòe. Góa jōa-á-ni̍h ke̍k-le̍k pek-hāi Siōng-tè ê kàu-hōe, beh thiat-tóe kā i húi-bia̍t.

¹⁴ Góa pí kâng chi̍t pòe ê Iû-thài-lâng koh-khah chek-ke̍k chun-thàn Iû-thài kàu-kui, koh-khah jia̍t-sim chun-siú chó͘-sian ê thoân-thóng.

¹⁵ M̄-kú, tùi Siōng-tè ê un-tián, góa iáu-bē chhut-sì, I chiū koat-tēng kā góa hun-pia̍t--chhut-lâi, koh soán-tiàu góa,

¹⁶ tùi góa khé-sī I ê Kiáⁿ, hō͘ góa thang tùi Gōa-pang-lâng soan-iông I ê Kiáⁿ ê hok-im, góa lóng bô kā lâng chhéng-kàu,

¹⁷ mā bô chiūⁿ Iâ-lō͘-sat-léng khì kìⁿ hiah-ê pí góa khah tāi-seng choh sù-tô͘ ê lâng. Góa sûi-sî khì A-la-pek, jiân-āu koh tò-khì Tāi-má-sū-kek.

¹⁸ Saⁿ nî āu, góa chiah khì Iâ-lō͘-sat-léng pài-hóng Pí-tek, kap i tòa cha̍p-gō͘ ji̍t.

¹⁹ Chú ê hiaⁿ-tī Ngá-kok í-gōa, kî-tha ê sù-tô͘ góa lóng bô kìⁿ--tio̍h.

²⁰ Góa só͘ siá--ê lóng sī sū-si̍t; tī Siōng-tè bīn-chêng góa bô kóng pe̍h-chha̍t.

²¹ Āu-lâi, góa khì Sū-lī-a kap Ki-lī-ka kéng-lāi ta̍k só͘-chāi.

²² Tng-sî, Iû-thài tōe-khu chèng kàu-hōe ê sìn-tô͘ lóng m̄ bat góa.

²³ In chí-ū thiaⁿ-tio̍h pa̍t-lâng kóng, “Hit-ê í-chêng pek-hāi lán ê lâng, hiān-chāi teh thoân i kè-khì siūⁿ-beh húi-bia̍t ê sìn-gióng!”

²⁴ In chiū in-ūi góa kui êng-kng hō͘ Siōng-tè!

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan