Bìoball air-loidhne

列王紀下卷 7 - 現代台語譯本羅馬字版

¹ Í-lī-sa kóng, “Lín tio̍h thiaⁿ Siōng Chú ê ōe; Siōng Chú án-ni kóng, ‘Bîn-á-chài tāi-iok chit-ê sî, tī Sat-má-lī-a ê chhī-tiûⁿ, saⁿ kong-kun iù mī-hún ōe kan-ta bōe gûn cha̍p-it kong-khek, la̍k kong-kun tōa-be̍h mā chiah bōe gûn cha̍p-it kong-khek.’”

² Ū chi̍t ê ông ê sī-ōe-koaⁿ ìn Siōng-tè tiōng-iōng ê lâng kóng, “Siōng Chú chiū-sī khui thiⁿ-thang kàng-lo̍h ngó͘-kok, chit-ê tāi-chì mā bô khó-lêng hoat-seng.” Í-lī-sa kóng, “Lí beh chhin-ba̍k khòaⁿ--tio̍h, m̄-kú chia̍h bōe tio̍h.”

Sū-lī-a Kun-tūi Tô-cháu

³ Tī siâⁿ-mn̂g gōa ū sì ê bâ-hong-pīⁿ-lâng, in kóng-lâi-kóng-khì, “Lán ná tio̍h chē tī chia tán sí?

⁴ Lán nā ji̍p-siâⁿ, siâⁿ-lāi ū ki-hng, lán ōe sí tī hia; nā tiām-tiām chē tiàm chia, mā-sī sí. Lâi, lán lâi-khì tâu-hâng Sū-lī-a ê kun-tūi; in nā lâu lán ê sìⁿ-miā, lán chiū ōe oa̍h; in nā thâi lán, lán kâng-khoán mā-sī sí.”

⁵ Hông-hun ê sî, in chhut-hoat khì Sū-lī-a-lâng ê kun-iâⁿ. In kàu Sū-lī-a-lâng ê kun-iâⁿ piⁿ, kèng-jiân bô lâng tī hia.

⁶ In-ūi Chú hō͘ Sū-lī-a ê kun-tūi thiaⁿ-kìⁿ chiàn-chhia kap chiàn-bé ê siaⁿ, í-ki̍p tōa kun-tūi ê siaⁿ. In chiū hō͘-siōng kóng, “Che it-tēng sī Í-sek-lia̍t-ông chhiàⁿ Hek-lâng chu-ông kap Ai-ki̍p chu-ông lâi kong-kek lán.”

⁷ Só͘-í tī hông-hun ê sî in chiū pàng-sak in ê pò͘-pîⁿ, bé, lû, kun-iâⁿ, piàⁿ-miā tô-cháu.

⁸ Hiah-ê bâ-hong-pīⁿ-lâng lâi kàu kun-iâⁿ piⁿ, ji̍p chi̍t ê pò͘-pîⁿ, ia̍h-chia̍h-ia̍h-lim, koh tùi hia the̍h kim gûn kap i-ho̍k khì chhàng; āu-lâi koh ji̍p chi̍t ê pò͘-pîⁿ, mā tùi hia the̍h châi-bu̍t khì chhàng.

⁹ Hit-sî, in hō͘-siōng kóng, “Lán án-ni chòe m̄-tio̍h. Kin-á-ji̍t sī ū hó siau-sit ê ji̍t, m̄-kú lán soah tiām-tiām; nā thèng-hāu kàu thiⁿ-kng, lán chiū ū chōe. Kiâⁿ, lán lâi-khì pò ông-ka chai.”

¹⁰ In chiū khì kiò kò͘ siâⁿ-mn̂g ê lâng, kā in kóng, “Goán khì Sū-lī-a-lâng ê kun-iâⁿ, khòaⁿ-tio̍h iâⁿ-lāi lóng bô lâng, bô-tōng-bô-chēng; chí-ū bé, lû pa̍k--teh, pò͘-pîⁿ lóng lâu--teh.”

¹¹ Hiah-ê kò͘ siâⁿ-mn̂g ê lâng tōa-siaⁿ hoah, siau-sit chiū thoân kàu ông-ka.

¹² Ông thàu-mî khí--lâi, kā i ê jîn-sîn kóng, “Góa kā lín kóng, che sī Sū-lī-a-lâng ê kè-bô͘. In chai lán iau-gō, só͘-í chhut kun-iâⁿ, bâi-ho̍k tī iá-gōa, kóng, ‘In chhut-siâⁿ ê sî, lán thang oa̍h-oa̍h lia̍h in, chiàm-léng chit-ê siâⁿ.’”

¹³ Ū chi̍t ê jîn-sîn tùi ông kóng, “Siâⁿ-lāi iáu ū chhun bé, chhiáⁿ lí phài lâng khan gō͘ chiah lâi, lán thang phài lâng khì thàm-cha; hoâiⁿ-ti̍t siâⁿ-lāi ê lâng kín-bān lóng ōe bia̍t-bông.”

¹⁴ In soán nn̄g tâi chiàn-chhia kap bé, ông chiū phài in khì thàm Sū-lī-a ê kun-tūi, kóng, “Lín khì thàm-cha.”

¹⁵ In tui-chong Sū-lī-a ê kun-tūi kàu Iok-tàn-hô, khòaⁿ-tio̍h iân-lō͘ lóng sī Sū-lī-a-lâng tô-cháu ê sî hiat-ka̍k ê i-ho̍k khì-khū. Sù-chiá chiū tò-lâi hôe-ho̍k ông.

¹⁶ Sat-má-lī-a ê chū-bîn chhut-khì chhiúⁿ Sū-lī-a-lâng ê kun-iâⁿ; án-ni, saⁿ kong-kun iù mī-hún bōe gûn cha̍p-it kong-khek, la̍k kong-kun tōa-be̍h bōe gûn cha̍p-it kong-khek; tú chiàu Siōng Chú só͘ kóng ê ōe.

¹⁷ Ông phài hit-ê sī-ōe-koaⁿ tī siâⁿ-mn̂g chí-hui, soah hō͘ chèng-lâng ta̍h-sí tī hia; tú chiàu Siōng-tè tiōng-iōng ê lâng tī ông lo̍h-lâi kìⁿ i ê sî só͘ kóng ê ōe.

¹⁸ Siōng-tè tiōng-iōng ê lâng ū tùi ông kóng, “Bîn-á-chài tāi-iok chit-ê sî, tī Sat-má-lī-a ê chhī-tiûⁿ, la̍k kong-kun tōa-be̍h ōe kan-ta bōe gûn cha̍p-it kong-khek, saⁿ kong-kun iù mī-hún mā chiah bōe gûn cha̍p-it kong-khek.”

¹⁹ Hit-ê sī-ōe-koaⁿ tùi Siōng-tè tiōng-iōng ê lâng kóng, “Siōng Chú chiū-sī khui thiⁿ-thang kàng-lo̍h ngó͘-kok, chit-ê tāi-chì mā bô khó-lêng hoat-seng.” Siōng-tè tiōng-iōng ê lâng kóng, “Lí beh chhin-ba̍k khòaⁿ--tio̍h, m̄-kú chia̍h bōe tio̍h.”

²⁰ Chit-kù ōe kó-jiân hoat-seng tī hit-ê sī-ōe-koaⁿ sin-chiūⁿ, in-ūi chèng-lâng tī siâⁿ-mn̂g kā i ta̍h--sí.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan