Bìoball air-loidhne

列王紀下卷 6 - 現代台語譯本羅馬字版

Pó͘-thâu Phû--khí-lâi

¹ Sian-ti ê ha̍k-seng tùi Í-lī-sa kóng, “Lāu-su, goán kap lí tòa ê só͘-chāi siuⁿ oe̍h.

² Chhiáⁿ ún-chún goán khì Iok-tàn-hô, ta̍k-ê lâng tùi hia chhú chi̍t ki chhâ-liāu, tī hia khí tòa ê só͘-chāi.” Í-lī-sa kóng, “Hó, lín khì.”

³ Ū chi̍t ê kóng, “Chhiáⁿ kap po̍k-jîn chòe-hé lâi-khì.” Í-lī-sa ìn kóng, “Hó, góa kap lín khì.”

⁴ I chiū kap in chòe-hé khì. In kàu Iok-tàn-hô, chiū khai-sí chhò-chhiū.

⁵ Ū chi̍t ê lâng teh chhò ê sî, pó͘-thâu-bah lak lo̍h-khì chúi--ni̍h. I chiū kiò kóng, “Chhám ah! Lāu-su, chit-ki pó͘-thâu sī kā lâng chioh--ê.”

⁶ Siōng-tè tiōng-iōng ê lâng kóng, “Lak tī tó-ūi?” I pò Í-lī-sa khòaⁿ lak--lo̍h-khì ê só͘-chāi. Í-lī-sa chiū chhò chi̍t ki chhâ tùi hia hiat--lo̍h-khì; pó͘-thâu-bah chiū phû--khí-lâi.

⁷ I kóng, “Khioh--khí-lâi.” Hit-ê lâng chiū chhun-chhiú kā khioh--khí-lâi.

Sū-lī-a ê Kun-tūi Pāi-thè

⁸ Sū-lī-a-ông kap Í-sek-lia̍t kau-chiàn. I kap i ê jîn-sîn thó-lūn kóng, “Góa beh tī bó͘ só͘-chāi bó͘ só͘-chāi chat-iâⁿ.”

⁹ Siōng-tè tiōng-iōng ê lâng chhe lâng khì kìⁿ Í-sek-lia̍t-ông, kóng, “Lí tio̍h sòe-jī, m̄-thang tùi bó͘ só͘-chāi keng-kè, in-ūi Sū-lī-a-lâng tī hia chat-iâⁿ.”

¹⁰ Í-sek-lia̍t-ông phài lâng khì kéng-kò Siōng-tè tiōng-iōng ê lâng só͘ kóng hit só͘-chāi ê chū-bîn, in chiū ka-kiông hông-pī. Kâng-khoán ê sū hoat-seng kúi-nā piàn.

¹¹ Sū-lī-a-ông in-ūi chit-ê sū sim-lāi chin siū-khì, tiàu i ê jîn-sîn lâi, kā in kóng, “Lín tiong-kan siáⁿ-lâng lāu-sia̍p siau-sit hō͘ Í-sek-lia̍t-ông, tio̍h láu-si̍t kā góa kóng.”

¹² Ū chi̍t ê jîn-sîn kóng, “Góa ê chú, góa ê ông ah, m̄-sī goán. Sī Í-sek-lia̍t ê sian-ti Í-lī-sa chiong lí tī pâng-keng lāi kóng ê ōe kā Í-sek-lia̍t-ông kóng.”

¹³ Ông kóng, “Lín khì thàm-khòaⁿ i tī sím-mi̍h só͘-chāi, góa thang phài lâng khì kā lia̍h.” Ū lâng tùi ông kóng, “I tī To-tan.”

¹⁴ Ông chiū phài bé, chiàn-chhia, kap chi̍t tōa-tūi kun-peng khì hia. In àm-sî kàu, pau-ûi hit-ê siâⁿ.

¹⁵ Siōng-tè tiōng-iōng ê lâng ê po̍k-jîn thàu-chá khí--lâi, chhut-khì gōa-bīn, khòaⁿ-tio̍h ū kun-peng, bé, kap chiàn-chhia kā siâⁿ pau-ûi--teh. Po̍k-jîn tùi Í-lī-sa kóng, “Chhám ah, lāu-su! Lán beh án-chóaⁿ?”

¹⁶ Siōng-tè tiōng-iōng ê lâng kóng, “M̄-bián kiaⁿ! Kap lán chòe-hé--ê pí kap in chòe-hé--ê khah chōe.”

¹⁷ Í-lī-sa kî-tó kóng, “Siōng Chú, kiû lí khui i ê ba̍k-chiu, hō͘ i ōe khòaⁿ--kìⁿ.” Siōng Chú chiū khui hit-ê po̍k-jîn ê ba̍k-chiu, i chiū khòaⁿ-kìⁿ kui-ê soaⁿ lóng sī hé-bé hé-chhia kā Í-lī-sa ûi--teh.

¹⁸ Sū-lī-a-lâng lo̍h-khì kàu Í-lī-sa hia, Í-lī-sa tùi Siōng Chú kî-tó kóng, “Kiû lí phah chiah-ê kun-peng, hō͘ in ba̍k-chiu bōe khòaⁿ--kìⁿ.” Siōng Chú thiaⁿ Í-lī-sa ê kî-tó, hō͘ in bōe khòaⁿ--kìⁿ.

¹⁹ Í-lī-sa tùi in kóng, “Lín kiâⁿ m̄-tio̍h lō͘, chhē m̄-tio̍h siâⁿ; tè góa lâi, góa chhōa lín khì lín beh chhē ê lâng hia.” Í-lī-sa chiū chhōa in kàu Sat-má-lī-a.

²⁰ In ji̍p-khì Sat-má-lī-a, Í-lī-sa kî-tó kóng, “Siōng Chú, kiû lí khui chiah-ê lâng ê ba̍k-chiu, hō͘ in ōe khòaⁿ--kìⁿ.” Siōng Chú khui in ê ba̍k-chiu, in chiū khòaⁿ--kìⁿ, hoat-kiàn in lóng tī Sat-má-lī-a ê siâⁿ-lāi.

²¹ Í-sek-lia̍t-ông khòaⁿ-tio̍h in, chiū mn̄g Í-lī-sa kóng, “Su-hū, góa kiám thang kā in thâi-sí? Kiám thang kā in thâi-sí?”

²² Í-lī-sa ìn kóng, “M̄-thang kā in thâi-sí. In kiám sī lí ēng to ēng keng lia̍h--lâi-ê, ná thang kā in thâi-sí? Tio̍h ēng piáⁿ kap chúi hō͘ in lim-chia̍h, hō͘ in thang tò-khì in ê chú-lâng hia.”

²³ Ông ūi-tio̍h in chún-pī hong-sēng ê iàn-se̍k. In chia̍h-pá, ông kah in tò--khì; in chiū tò-khì in ê chú-lâng hia. Tùi án-ni, Sū-lī-a ê kun-peng bô koh chhim-hoān Í-sek-lia̍t ê kéng-kài.

Sat-má-lī-a Siū Ûi-khùn

²⁴ Āu-lâi, Sū-lī-a-ông Piān Hap-ta̍t tiàu-chi̍p i ê choân-kun, chiūⁿ-lâi ûi-khùn Sat-má-lī-a.

²⁵ Sat-má-lī-a ū tōa ki-hng; Sū-lī-a-lâng kè-sio̍k ûi-khùn siâⁿ, tì-kàu chi̍t ê lû-á ê thâu ta̍t gûn káu-pah kong-khek, nn̄g-pah kong-khek ê hún-chiáu-sái ta̍t la̍k-cha̍p kong-khek ê gûn-á.

²⁶ Í-sek-lia̍t-ông tùi siâⁿ-chhiûⁿ téng keng-kè ê sî, ū chi̍t ê hū-jîn-lâng tùi i kiû-kiò, kóng, “Góa ê chú, góa ê ông, pang-chān góa.”

²⁷ Ông kóng, “Siōng Chú bô pang-chān lí, góa beh tùi tó-ūi pang-chān lí? Tùi ngó͘-kok-tiûⁿ, á-sī tùi chiú-khut sī--bô?”

²⁸ Ông koh kóng, “Lí ū sím-mi̍h kan-khó͘?” I ìn kóng, “Ū chi̍t ê hū-jîn-lâng tùi góa kóng, ‘Chiong lí ê kiáⁿ kau--chhut-lâi, lán kin-á-ji̍t chia̍h i; bîn-á-chài lán chia̍h góa ê kiáⁿ.’

²⁹ Goán chiū chú góa ê kiáⁿ lâi chia̍h. Keh-ji̍t góa tùi i kóng, ‘Chiong lí ê kiáⁿ kau--chhut-lâi, lán chú lâi chia̍h.’ M̄-kú i chiong i ê kiáⁿ chhàng--khí-lâi.”

³⁰ Ông thiaⁿ-tio̍h hū-jîn-lâng ê ōe, chiū thiah-li̍h saⁿ. I tī siâⁿ-chhiûⁿ téng keng-kè ê sî, jîn-bîn khòaⁿ-tio̍h i lāi-bīn chhēng chho͘-môa-pò͘ ê saⁿ.

³¹ Ông kóng, “Sa-hoat ê kiáⁿ Í-lī-sa ê thâu-khak kin-á-ji̍t nā iáu lâu tī i ê seng-khu, goān Siōng-tè ka-pē chek-hoa̍t góa.”

³² Hit-sî, Í-lī-sa chē tī chhù-lāi, tiúⁿ-ló mā kap i chòe-hé chē; ông seng phài chi̍t ê lâng khì. Sù-chiá iáu-bē kàu i hia, Í-lī-sa tùi tiúⁿ-ló kóng, “Lín khòaⁿ, chit-ê hiong-siú ê kiáⁿ phài lâng lâi beh chhú góa ê thâu-khak. Tio̍h chù-ì, sù-chiá nā lâi, tio̍h koaiⁿ-mn̂g, kā i tòng tī mn̂g-gōa; i chú-lâng ê kha-pō͘ siaⁿ kiám bô tè tī i ê āu-bīn teh lâi?”

³³ Í-lī-sa iáu-teh kap in kóng-ōe ê sî, ông lâi kàu i hia; ông kóng, “Chit-ê chai-hō sī tùi Siōng Chú lâi, góa ná tio̍h koh ǹg-bāng Siōng Chú pang-chān?”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan