Bìoball air-loidhne

列王紀下卷 23 - 現代台語譯本羅馬字版

Iok-se-a ê Kái-kek
( 2 Tāi 34.29-33 ; 34.3-7 )

¹ Iok-se-a-ông phài lâng tiàu-chi̍p Iû-tāi kap Iâ-lō͘-sat-léng ê chèng tiúⁿ-ló.

² Ông chiūⁿ-khì Siōng Chú ê tiān; Iû-tāi chèng-lâng kap Iâ-lō͘-sat-léng ê chū-bîn, chè-si, sian-ti, kap só͘-ū ê jîn-bîn, bô-lūn tōa-sòe, mā lóng chiūⁿ--khì. Ông chiū chiong tī Siōng Chú tiān-lāi hoat-kiàn ê iok-su it-chhè ê ōe tha̍k hō͘ in thiaⁿ.

³ Ông khiā tī thiāu-piⁿ, tī Siōng Chú ê bīn-chêng li̍p-iok, beh choân-sim choân-ì sūn-thàn Siōng Chú, chun-siú I ê kài-bēng, kà-sī, kap kui-lē, si̍t-hêng chit-kńg chheh só͘ siá li̍p-iok ê ōe. Jîn-bîn mā lóng koat-sim beh chun-siú chit-ê iok.

⁴ Ông bēng-lēng tōa-chè-si Hi-le̍k-ka, hù-chè-si, kap sèng-tiān ê siú-ōe, chiong ūi Pa-le̍k, A-sià-la, kap thiⁿ-téng ê bān-siōng só͘ chō ê khì-khū, lóng tùi Siōng Chú ê tiān poaⁿ--chhut-khì, tī Iâ-lō͘-sat-léng gōa-bīn, Khip-lûn Khoe-kok ê soaⁿ-phiâⁿ pàng-hé sio, koh chiong hé-hu piàⁿ tī Pek-te̍k-lī.

⁵ Í-chêng Iû-tāi lia̍t-ông só͘ siat-li̍p ê chè-si, chiū-sī tī Iû-tāi hiah-ê siâⁿ, kap Iâ-lō͘-sat-léng sì-ûi ê soaⁿ-thâu-tôaⁿ sio-hiuⁿ pài ngó͘-siōng, ǹg Pa-le̍k sio-hiuⁿ, pài ji̍t, ge̍h, chhiⁿ-sîn, í-ki̍p thiⁿ-téng bān-siōng ê chè-si, Iok-se-a-ông lóng kā in hòe-tû.

⁶ I koh kā A-sià-la lú-sîn ê thiāu-siōng tùi Siōng Chú ê sèng-tiān poaⁿ--chhut-khì, kàu Iâ-lō͘-sat-léng gōa-bīn ê Khip-lûn Khoe-kok, tī hia pàng-hé sio, tûi-chòe hé-hu, chiong hiah-ê hé-hu iā tī jîn-bîn ê kong-bōng.

⁷ Koh thiah-húi Siōng Chú tiān-lāi lâm-chhiong ê chhù, chiū-sī hū-lú ūi-tio̍h A-sià-la pian-chit mi̍h-kiāⁿ ê só͘-chāi.

⁸ Iok-se-a tùi Ka-pa kàu Pia̍t-sī-pa, chiong Iû-tāi ta̍k-ê siâⁿ ê chè-si tiàu-lâi Iâ-lō͘-sat-léng, phò-hoāi hiah-ê chè-si sio-hiuⁿ ê soaⁿ-thâu-tôaⁿ. I koh thiah-húi Iok-su-a chhī-tiúⁿ só͘ khí pài soaⁿ-iûⁿ-kúi ê biō; chit-ê biō tī ji̍p siâⁿ-mn̂g ê tò-pêng.

⁹ M̄-kú soaⁿ-thâu-tôaⁿ ê chè-si bô tī Iâ-lō͘-sat-léng Siōng Chú ê tôaⁿ ho̍k-sāi, chí-ū ōe-tàng kap kî-tha ê chè-si chia̍h bô-kàⁿ-piáⁿ.

¹⁰ Iok-se-a koh phò-hoāi tī Him-lūn-chú Soaⁿ-kok ê Tô-hui-te̍k-biō, chiah bián lâng tī hia sio in ê kiáⁿ cha-bó͘-kiáⁿ hiàn hō͘ Mô͘-lo̍k.

¹¹ I koh chiong Iû-tāi lia̍t-ông hiàn hō͘ ji̍t-thâu hiah-ê bé sóa-cháu, sio-húi hiàn hō͘ ji̍t-thâu ê chiàn-chhia. Chiah-ê bé pún-lâi hē tī Siōng Chú sèng-tiān ê mn̂g-piⁿ, óa-kūn thài-kàm Ná-tan Bí-le̍k ê chhù.

¹² Iû-tāi lia̍t-ông tī A-hap-su ông-kiong chhù-téng só͘ khí ê chè-tôaⁿ, kap Má-ná-se tī Siōng Chú sèng-tiān nn̄g ê tiâⁿ só͘ khí ê chè-tôaⁿ, Iok-se-a lóng kā in húi-hoāi, kòng-chhùi, chiong hiah-ê iù-á piàⁿ tī Khip-lûn Khoe-kok.

¹³ Í-chêng Í-sek-lia̍t-ông Só͘-lô-bûn tī Iâ-lō͘-sat-léng ê tang-pêng, tī Húi-bia̍t-soaⁿ ê lâm-pêng, ūi-tio̍h ho̍k-sāi Se-tùn-lâng khó-ò͘ⁿ ê A-su-tha-lio̍k, Mô͘-ap-lâng khó-ò͘ⁿ ê Ki-boat, A-bûn-lâng khó-ò͘ⁿ ê Mô͘-lo̍k só͘ khí ê soaⁿ-thâu-tôaⁿ, Iok-se-a-ông lóng kā in phò-hoāi.

¹⁴ I koh húi-hoāi chio̍h-thiāu, chhò A-sià-la ê thiāu-siōng, ēng sí-lâng ê kut-thâu kā hiah-ê só͘-chāi thūn-móa.

¹⁵ Iok-se-a húi-hoāi Pek-te̍k-lī ê chè-tôaⁿ, chiū-sī Nî-pat ê kiáⁿ Iâ-lô-pho-an só͘ khí, hō͘ Í-sek-lia̍t hoān-chōe ê soaⁿ-thâu-tôaⁿ, kā chè-tôaⁿ kap soaⁿ-thâu-tôaⁿ kòng kah chhùi-chhùi, koh sio A-sià-la thiāu-siōng.

¹⁶ I oa̍t-thâu, khòaⁿ-tio̍h soaⁿ--ni̍h hiah-ê bōng, chiū phài lâng khì the̍h bōng-lāi ê kut-thâu, tiàm tôaⁿ-téng sio, phah lâ-sâm chè-tôaⁿ. Tú-tú èng-giām í-chêng Iâ-lô-pho-an tī choeh-kî khiā tī tôaⁿ-piⁿ ê sî, Siōng-tè tiōng-iōng ê lâng só͘ soan-kò Siōng Chú ê ōe. Iok-se-a koh oa̍t-thâu khòaⁿ-tio̍h soan-kò chiah-ê ōe hit-ê Siōng-tè tiōng-iōng ê lâng ê bōng,

¹⁷ Iok-se-a mn̄g, “Góa khòaⁿ--tio̍h-ê sī sím-mi̍h-lâng ê bōng-pâi?” Hit-ê siâⁿ ê lâng tùi i kóng, “Che sī Siōng-tè tiōng-iōng ê lâng ê bōng; i tùi Iû-tāi lâi, ū-giân ông tú-chiah kong-kek Pek-te̍k-lī ê tôaⁿ ê tāi-chì.”

¹⁸ I kóng, “Mài kā tín-tāng. M̄-thang sóa i ê kut-thâu.” In chiū bô khì tāng i ê kut-thâu, mā bô tāng-tio̍h tùi Sat-má-lī-a lâi hit-ê sian-ti ê kut-thâu.

¹⁹ Í-chêng Í-sek-lia̍t ê lia̍t-ông tī Sat-má-lī-a ta̍k-ê siâⁿ khí soaⁿ-thâu-tôaⁿ kek Siōng Chú siū-khì, hiān-chāi Iok-se-a chhin-chhiūⁿ i tī Pek-te̍k-lī só͘ chòe--ê chiong hiah-ê lóng húi-hoāi;

²⁰ koh tī tôaⁿ-téng thâi-sí só͘-ū soaⁿ-thâu-tôaⁿ ê chè-si; tī tôaⁿ-téng sio lâng ê kut-thâu. Āu-lâi i tò-khì Iâ-lō͘-sat-léng.

Iok-se-a Siú Pôaⁿ-kè-choeh
( 2 Tāi 35.1-19 )

²¹ Ông bēng-lēng choân-kok jîn-bîn, kóng, “Tio̍h chiàu chit-ê iok-su ê kì-chài, siú Pôaⁿ-kè-choeh ho̍k-sāi Siōng Chú — lín ê Siōng-tè.”

²² Tùi sū-su tī-lí Í-sek-lia̍t, kàu Í-sek-lia̍t kap Iû-tāi lia̍t-ông thóng-tī ê sî, in iáu m̄-bat chhin-chhiūⁿ án-ni siú Pôaⁿ-kè-choeh.

²³ Chí-ū kàu Iok-se-a-ông tē-cha̍p-poeh nî chiah tī Iâ-lō͘-sat-léng ǹg Siōng Chú siú chit-ê Pôaⁿ-kè-choeh.

Iok-se-a Kî-tha ê Kái-kek

²⁴ Iû-tāi-tōe kap Iâ-lō͘-sat-léng só͘-ū khan-bông--ê kap tâng-ki toh-thâu, ngó͘-siōng kap ka-cho̍k-sîn-siōng, í-ki̍p it-chhè khó-ò͘ⁿ ê mi̍h, Iok-se-a lóng kā in tû-tiāu, chiàu tōa-chè-si Hi-le̍k-ka tī Siōng Chú ê tiān só͘ hoat-kiàn ê Lu̍t-hoat-su só͘ kì-chài ê ōe khì chòe.

²⁵ Tī Iok-se-a í-chêng bô ông chhin-chhiūⁿ i choân-sim choân-ì choân-le̍k kui-ǹg Siōng Chú, chun-hêng Mô͘-se só͘-ū ê lu̍t-hoat; tī i í-āu, mā bô ū chi̍t ê ông chhin-chhiūⁿ i.

²⁶ M̄-kú, in-ūi Má-ná-se ê só͘-chòe ū kek Siōng Chú siū-khì, Siōng Chú bô thêng-chí I tùi Iû-tāi só͘ hoat béng-lia̍t ê tōa siū-khì.

²⁷ Siōng Chú kóng, “Góa beh chiong Iû-tāi tùi góa ê bīn-chêng kóaⁿ-cháu, chhin-chhiūⁿ góa bat kóaⁿ-cháu Í-sek-lia̍t; góa beh khì-sak góa só͘ kéng chit-ê siâⁿ Iâ-lō͘-sat-léng, kap chit-keng sèng-tiān, chiū-sī góa bat chí i kóng, ‘Góa ê miâ eng-kai tī hia siū kèng-hōng’ ê só͘-chāi.”

Iok-se-a Sí
( 2 Tāi 35.20-36.1 )

²⁸ Iok-se-a kî-tha ê sū-chek kap i ê só͘-chòe, lóng kì-chài tī Iû-tāi Lia̍t-ông-sú.

²⁹ Iok-se-a chāi-ūi ê sî, Ai-ki̍p-ông Hoat-ló Nî-ko chiūⁿ Iù-hoat-la-tí-hô, pang-chān A-su̍t-ông, Iok-se-a-ông chhut-khì gêng-chiàn; Ai-ki̍p-ông tī Bí-kiat-to kap Iok-se-a kau-chiàn, tī hia kā Iok-se-a thâi-sí.

³⁰ I ê jîn-sîn ēng chhia chài i ê si-thé, tùi Bí-kiat-to sàng tò-khì Iâ-lō͘-sat-léng, chiong i an-chòng tī i ka-kī ê bōng. Iû-tāi ê jîn-bîn ēng iû boah Iok-se-a ê kiáⁿ Iok-hap-su, siat-li̍p i choh-ông, sòa-chiap i ê lāu-pē.

Iû-tāi-ông Iok-hap-su
( 2 Tāi 36.2-4 )

³¹ Iok-hap-su chē-ūi ê sî jī-cha̍p-saⁿ hè, tī Iâ-lō͘-sat-léng choh-ông saⁿ ge̍h-ji̍t kú. I ê lāu-bú kiò-chòe Hap-bō͘-tha, sī Li̍p-ná-lâng Iâ-lī-bí ê cha-bó͘-kiáⁿ.

³² Iok-hap-su chòe Siōng Chú khòaⁿ-chòe pháiⁿ ê sū, chiàu i ê chó͘-sian ê só͘-chòe khì chòe.

³³ Hoat-ló Nî-ko chiong i koaiⁿ tī Hap-má-tōe ê Lī-pí-la, put-chún i tī Iâ-lō͘-sat-léng choh-ông; koh hoa̍t Iû-tāi-kok kim saⁿ-cha̍p-sì kong-kun, gûn saⁿ-chheng sì-pah kong-kun.

³⁴ Ai-ki̍p-ông Nî-ko siat-li̍p Iok-se-a ê kiáⁿ Í-lī-a-kèng sòa-chiap i ê lāu-pē Iok-se-a choh-ông, kā i kái-miâ chòe Iok-ngá-kèng; koh kā Iok-hap-su lia̍h-khì Ai-ki̍p, i chiū sí tī hia.

Iû-tāi-ông Iok-ngá-kèng
( 2 Tāi 36.5-8 )

³⁵ Iok-ngá-kèng chiàu Ai-ki̍p-ông ê bēng-lēng, chiong kim kap gûn kau hō͘ i; Iok-ngá-kèng tùi choân-kok jîn-bîn, chiàu in ê châi-le̍k teng-siu kim-gûn, kau hō͘ Ai-ki̍p-ông Nî-ko.

³⁶ Iok-ngá-kèng chē-ūi ê sî jī-cha̍p-gō͘ hè, tī Iâ-lō͘-sat-léng choh-ông cha̍p-it nî. I ê lāu-bú kiò-chòe Se-pò͘-tāi, sī Ló͘-má-lâng Pí-tāi-ngá ê cha-bó͘-kiáⁿ.

³⁷ Iok-ngá-kèng chòe Siōng Chú khòaⁿ-chòe pháiⁿ ê sū, chiàu i ê chó͘-sian ê só͘-chòe khì chòe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan