Bìoball air-loidhne

列王紀下卷 22 - 現代台語譯本羅馬字版

Iû-tāi-ông Iok-se-a
( 2 Tāi 34.1-2 )

¹ Iok-se-a chē-ūi ê sî poeh hè, tī Iâ-lō͘-sat-léng choh-ông saⁿ-cha̍p-it nî; i ê lāu-bú kiò-chòe Iâ-tí-tāi, sī Pho-su-ka-lâng A-tāi-ngá ê cha-bó͘-kiáⁿ.

² I chòe Siōng Chú khòaⁿ-chòe hó ê sū, kiâⁿ i ê chó͘-sian Tāi-pi̍t ê lō͘, bô phian-chó-phian-iū.

Hoat-kiàn Lu̍t-hoat-su
( 2 Tāi 34.8-28 )

³ Iok-se-a-ông tē-cha̍p-poeh nî, i phài Bí-su-lân ê sun, A-sat-lī-ngá ê kiáⁿ su-kì Sa-hoan khì Siōng Chú ê tiān, hoan-hù i kóng,

⁴ “Lí khì kìⁿ tōa-chè-si Hi-le̍k-ka, chhiáⁿ i chiong sèng-tiān mn̂g-kháu ê siú-ōe tùi jîn-bîn siu--lâi, tòa-ji̍p Siōng Chú sèng-tiān hiah-ê gûn, tiám-sǹg chheng-chhó,

^5-6 kau hō͘ koán-lí Siōng Chú sèng-tiān ê lâng, hō͘ in choán-kau Siōng Chú tiān-lāi ê kang-lâng, chiū-sī choh-ba̍k sai-hū, kiàn-tio̍k kang-lâng, kap thô͘-chúi sai-hū, khì bóe chhâ-liāu kap keh-keng ê chio̍h, thang siu-lí sèng-tiān sún-hoāi ê só͘-chāi.

⁷ M̄-kú m̄-bián kap hoat kang-chîⁿ ê lâng tùi-siàu, in-ūi in chòe tāi-chì sêng-si̍t.”

⁸ Tōa-chè-si Hi-le̍k-ka tùi su-kì Sa-hoan kóng, “Góa tī Siōng Chú sèng-tiān lāi-bīn hoat-kiàn chi̍t kńg lu̍t-hoat ê chheh.” Hi-le̍k-ka chiong chheh kau hō͘ Sa-hoan, Sa-hoan chiū tha̍k hit-kńg chheh.

⁹ Su-kì Sa-hoan khì kìⁿ ông, hôe-ho̍k ông kóng, “Lí ê po̍k-jîn í-keng chiong tiān-lāi ê gûn piàⁿ--chhut-lâi, kau hō͘ koán-lí Siōng Chú sèng-tiān ê lâng.”

¹⁰ Su-kì Sa-hoan koh tùi ông kóng, “Tōa-chè-si Hi-le̍k-ka ū the̍h chi̍t kńg chheh hō͘ góa.” Sa-hoan chiū tī ông ê bīn-chêng tōa-siaⁿ tha̍k hit-kńg chheh.

¹¹ Ông thiaⁿ-tio̍h Lu̍t-hoat-su ê ōe, chiū thiah-li̍h i ê saⁿ.

¹² Ông hoan-hù tōa-chè-si Hi-le̍k-ka, Sa-hoan ê kiáⁿ A-hi-kam, Bí-kai-a ê kiáⁿ A-kek-pho, su-kì Sa-hoan, kap ông ê jîn-sîn A-sat-ngá, kóng,

¹³ “Lín khì, ūi góa kap choân-thé Iû-tāi jîn-bîn, chiong só͘ hoat-kiàn chit-kńg chheh ê ōe chhéng-būn Siōng Chú. In-ūi lán ê chó͘-sian bô thiaⁿ-thàn chit-kńg chheh ê ōe, bô chiàu só͘ kì-chài tùi lán ê kà-sī khì chòe, só͘-í Siōng Chú tùi lán hoat tōa siū-khì.”

¹⁴ Tùi án-ni, tōa-chè-si Hi-le̍k-ka, kap A-hi-kam, A-kek-pho, Sa-hoan, A-sat-ngá, chòe-hé khì kìⁿ lú sian-ti Hō͘-le̍k-tāi. I sī koán-lí lé-ho̍k hit-ê Sa-liông ê bó͘; Sa-liông sī Hap-ní-hap-su ê sun, Te̍k-óa ê kiáⁿ. Hō͘-le̍k-tāi tòa tī Iâ-lō͘-sat-léng sin ê siâⁿ-khu. In kā i chhéng-kàu.

¹⁵ I tùi in kóng, “Siōng Chú — Í-sek-lia̍t ê Siōng-tè án-ni kóng, ‘Lín khì hôe-ho̍k chhe lín lâi kìⁿ góa ê lâng, kā i kóng

¹⁶ Siōng Chú án-ni kóng: Góa beh chiàu Iû-tāi-ông só͘ tha̍k hit-kńg chheh ê ōe, kàng chai-hō tī chit-ê só͘-chāi kap chia ê chū-bîn.

¹⁷ In-ūi in khì-sak góa, kā pa̍t-ê sîn-bêng sio-hiuⁿ, ēng in ê só͘-chòe kek góa siū-khì, só͘-í góa tùi chit-ê só͘-chāi hoat tōa siū-khì bô-soah.’

¹⁸ M̄-kú chhe lín lâi chhéng-būn Siōng Chú ê Iû-tāi-ông, lín tio̍h án-ni tùi i kóng, ‘Siōng Chú — Í-sek-lia̍t ê Siōng-tè án-ni kóng: Lí thiaⁿ-tio̍h

¹⁹ góa beh hō͘ chit-ê só͘-chāi pha-hng, hō͘ chia ê chū-bîn siū chiù-chó͘, lí chiū chhàm-hóe, tī Siōng Chú bīn-chêng khiam-pi, koh thiah-li̍h saⁿ, tī góa ê bīn-chêng thî-khàu, góa ū thiaⁿ--tio̍h. Siōng Chú kóng:

²⁰ Só͘-í góa beh hō͘ lí pêng-an lī-khui sè-kan, tńg-khì lí ê lia̍t-chó͘ hia. Lí bōe khòaⁿ-tio̍h góa só͘ beh kàng-lo̍h tī chit só͘-chāi it-chhè ê chai-hō.’” In chiū tò--khì, chiong chiah-ê ōe tùi ông hôe-ho̍k.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan