Bìoball air-loidhne

列王紀下卷 19 - 現代台語譯本羅馬字版

Kok-ông Chhéng-būn Í-sài-a
( Sài 37.1-7 )

¹ Hi-se-ka-ông chi̍t-ē thiaⁿ-tio̍h in ê pò-kò, chiū thiah-li̍h i ê saⁿ, chhēng môa-saⁿ, ji̍p-khì Siōng Chú ê tiān.

² I phài kiong-têng chóng-koán Í-lī-a-kèng, su-kì Sià-pek-ná, kap chu-chhim ê chè-si, lóng chhēng môa-saⁿ, khì kìⁿ A-mô͘-su ê kiáⁿ sian-ti Í-sài-a.

³ In kā Í-sài-a kóng, “Hi-se-ka án-ni kóng, ‘Kin-á-ji̍t sī hoān-lān ê ji̍t, sī siū chek-hoa̍t lêng-jio̍k ê ji̍t, chhin-chhiūⁿ ū gín-á beh chhut-sì, m̄-kú bô-la̍t kā siⁿ--chhut-lâi.

⁴ A-su̍t-ông ū phài i ê pō͘-hā chóng-su-lēng lâi siat-to̍k éng-oa̍h ê Siōng-tè, kiám-chhái Siōng Chú — lí ê Siōng-tè ū thiaⁿ--tio̍h, ōe chhú-hoa̍t kóng chiah-ê ōe ê lâng. Só͘-í, tio̍h thòe lâu tī chia ê lâng kî-tó.’”

⁵ Hi-se-ka-ông ê tāi-sîn lâi kìⁿ Í-sài-a ê sî,

⁶ Í-sài-a tùi in kóng, “Lín tio̍h án-ni kā lín ê chú-lâng kóng, ‘Siōng Chú án-ni kóng: M̄-thang in-ūi lín só͘ thiaⁿ--tio̍h A-su̍t-ông ê pō͘-hā tùi góa ê húi-pòng lâi kiaⁿ-hiâⁿ.

⁷ Khòaⁿ leh, góa beh jiáu-loān i ê sim, hō͘ i thiaⁿ-tio̍h hong-siaⁿ, tò-tńg-khì ka-kī ê kok-ka; góa beh hō͘ i tī hia hō͘ lâng thâi--sí.’”

A-su̍t-ông koh Lâi Khióng-hat
( Sài 37.8-20 )

⁸ Chóng-su-lēng thiaⁿ-tio̍h A-su̍t-ông í-keng lī-khui La-kiat khì kong-kek Li̍p-ná, chiū chhut-hoat khì Li̍p-ná kap ông hōe-ha̍p.

⁹ A-su̍t-ông thiaⁿ-kìⁿ I-soh-phit-a-ông Te̍k-hap-ka beh lâi kong-kek in, chiū phài sù-chiá khì kìⁿ Hi-se-ka, hoan-hù in

¹⁰ tùi Iû-tāi-ông Hi-se-ka kóng, “M̄-thang hō͘ lín só͘ óa-khò ê Siōng-tè phiàn--khì, kóng: Iâ-lō͘-sat-léng bōe hām-lo̍h tī A-su̍t-ông ê chhiú-thâu.

¹¹ Lín it-tēng ū thiaⁿ-tio̍h A-su̍t chu-ông tùi lia̍t-kok só͘ chòe ê tāi-chì; in kā lia̍t-kok lóng châu-bia̍t. Lín kiám ū hoat-tō͘ pī-bián?

¹² Góa ê chó͘-sian húi-bia̍t ê kok-ka, Ko-sàn, Hap-lân, Lī-sek, í-ki̍p tòa tī Thê-la-sat ê Pek I-tiân-lâng, in ê sîn-bêng kiám ū kái-kiù in?

¹³ Hap-má ê ông, A-ní-poa̍t ê ông, Se-hoat-óa-im-siâⁿ ê ông, Hi-ná kap Í-óa ê ông tī tó-ūi?”

¹⁴ Hi-se-ka tùi sù-chiá ê chhiú chiap-tio̍h phoe, tha̍k liáu-āu, chiū chiūⁿ-khì Siōng Chú ê sèng-tiān, tī Siōng Chú ê bīn-chêng chiong phoe thí-khui.

¹⁵ Hi-se-ka ǹg Siōng Chú kî-tó kóng, “Chē tī thiⁿ-sài ki-lō͘-pek téng-bīn ê Siōng Chú — Í-sek-lia̍t ê Siōng-tè ah, chí-ū lí sī tōe-chiūⁿ bān-kok ê Siōng-tè. Lí chhòng-chō thiⁿ kap tōe.

¹⁶ Siōng Chú ah, kiû lí àⁿ hī-khang thiaⁿ, khui lí ê ba̍k-chiu khòaⁿ. Kiû lí thiaⁿ Se-ná-ki-li̍p chhe sù-chiá lâi kóng it-chhè siat-to̍k lí oa̍h-oa̍h Siōng-tè ê ōe.

¹⁷ Siōng Chú ah, A-su̍t chu-ông khak-si̍t ū hō͘ lia̍t-kok kap in ê thó͘-tōe lóng hong-hòe,

¹⁸ kā in ê sîn-bêng lóng hiat hō͘ hé sio-bia̍t, kî-si̍t hiah-ê m̄-sī sîn, put-kò sī lâng ê chhiú ēng chhâ ēng chio̍h chō--ê.

¹⁹ Taⁿ, Siōng Chú — goán ê Siōng-tè ah, kiû lí kiù goán thoat-lī i ê chhiú, hō͘ tōe-chiūⁿ bān-kok lóng ōe chai chí-ū lí Siōng Chú sī Siōng-tè.”

Í-sài-a Hō͘ Ông ê Sìn-sit
( Sài 37.21-38 )

²⁰ A-mô͘-su ê kiáⁿ Í-sài-a chhe lâng khì kìⁿ Hi-se-ka, kóng, “Siōng Chú — Í-sek-lia̍t ê Siōng-tè án-ni kóng, ‘Lí in-ūi A-su̍t-ông Se-ná-ki-li̍p ê sū tùi góa kî-tó, góa ū thiaⁿ--kìⁿ.

²¹ Koan-hē Se-ná-ki-li̍p, góa Siōng Chú án-ni kóng: Chāi-sek-lú Sek-an khòaⁿ-khin lí, thí-chhiò lí; siàu-lú Iâ-lō͘-sat-léng tùi lí iô-thâu.

²² Lí teh bú-jio̍k siáⁿ-lâng, siat-to̍k siáⁿ-lâng? Lí teh tùi siáⁿ-lâng tōa-siaⁿ? Lí teh tùi siáⁿ-lâng kiau-ngō͘, kā i khòaⁿ m̄ chiūⁿ-ba̍k? Kî-si̍t lí sī teh bû-sī góa Í-sek-lia̍t sîn-sèng ê Siōng-tè!

²³ Lí ū thong-kè lí ê sù-chiá bú-bān Chú. Lí kóng: Góa sái chin chōe chiàn-chhia peh-chiūⁿ koân-soaⁿ, khì kàu Lê-pa-lūn siōng-koân ê soaⁿ-chiam. Góa tī hia chhò siōng-koân ê pek-hiuⁿ-chhiū, chhò siōng-hó ê siông-chhiū. Góa peh-kàu siōng-koân ê soaⁿ-chiam, chìn-ji̍p siōng bō͘-sēng ê chhiū-nâ.

²⁴ Góa tī gōa-pang ó͘ chíⁿ, lim in ê chúi. Góa mā ēng kha lap Ai-ki̍p só͘-ū ê hô-liû, lap kah hô-liû lóng ta--khì.

²⁵ “‘Lín kiám m̄-bat thiaⁿ--kìⁿ? Chin chá góa chòe chit-ê kè-ōe, kó͘-chá chiū koat-tēng, taⁿ í-keng si̍t-hiān, chiū-sī lí hō͘ kian-kò͘ ê siâⁿ-pó lóng tó-hoāi, pìⁿ-chòe hong-po͘ chio̍h-tui.

²⁶ Hia ê chū-bîn lóng bô-la̍t; in kiaⁿ-hiâⁿ, kiàn-siàu. In chhin-chhiūⁿ iá-tōe ê chháu, iù-nńg ê íⁿ, chhù-bé-téng ê chháu, iáu-bē tōa-châng chiū ta--khì.

²⁷ “‘Lí tòa tó-ūi, lí chhut, lí ji̍p, lí tùi góa ê siū-khì, góa lóng chai.

²⁸ In-ūi lí ū tùi góa hoat siū-khì, góa ū thiaⁿ-tio̍h lí chū-ko ê ōe; góa beh ēng kau-á kau lí ê phīⁿ, ēng bé-kā-kiuⁿ kòa tī lí ê chhùi, hō͘ lí tùi lâi hit-tiâu lō͘ tò-tńg--khì.’

²⁹ “Hi-se-ka, che beh hō͘ lí chòe kì-hō: Kin-nî, mê-nî, lín lóng ōe chia̍h iá-seng ê mi̍h; tē-saⁿ nî, lín ōe iā-chéng, siu-sêng, chai-chèng phû-tô, chia̍h só͘ kiat ê ké-chí.

³⁰ Iû-tāi-ke tô-thoat só͘ chhun ê chú-bîn ōe chhin-chhiūⁿ si̍t-bu̍t, ē-bīn tèng-kun, téng-bīn kiat ké-chí.

³¹ Tùi Iâ-lō͘-sat-léng beh ū chhun--lo̍h-lâi ê chú-bîn chhut--lâi, tùi Sek-an-soaⁿ beh ū lâng tô-thoat--chhut-lâi. Siōng Chú — Bān-kun ê Thóng-sòe ê jia̍t-sêng it-tēng ōe sêng-choân chit-ê sū.

³² “Só͘-í, koan-hē A-su̍t-ông, Siōng Chú ū án-ni kóng, ‘I bōe chìn-ji̍p chit-ê siâⁿ, liân chi̍t ki chìⁿ mā bōe siā--ji̍p-lâi. I bōe giâ tún-pâi óa-kūn siâⁿ, mā bōe khí thô͘-tui kong siâⁿ.

³³ I tùi tó chi̍t tiâu lō͘ lâi, mā ōe tùi hit-tiâu lō͘ tńg--khì; i bōe chìn-ji̍p chit-ê siâⁿ. Siōng Chú án-ni kóng.

³⁴ Góa ūi-tio̍h góa ê iân-kò͘, mā ūi-tio̍h góa ê po̍k-jîn Tāi-pi̍t ê iân-kò͘, beh pó-hō͘ kái-kiù chit-ê siâⁿ.’”

³⁵ Hit-mî, Siōng Chú ê thiⁿ-sài khì A-su̍t kun-iâⁿ, thâi-sí cha̍p-poeh-bān gō͘-chheng ê lâng. Keh-chá-khí, lâng khí--lâi, hoat-kiàn ta̍k só͘-chāi lóng sī sin-si.

³⁶ A-su̍t-ông Se-ná-ki-li̍p chiū thiat-iâⁿ, tò-tńg-khì Nî-nî-bî, tòa tī hia.

³⁷ Ū chi̍t ji̍t, i tī Nî-su-lo̍k ê biō teh pài i ê sîn-bêng ê sî, i ê kiáⁿ A-tek-bí-le̍k kap Sa-lī-sek ēng to kā i thâi-sí, jiân-āu tô-cháu khì A-la-la̍h ê tōe; i lēng-gōa chi̍t ê kiáⁿ Í-sat Hap-tùn kè-sêng i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan