Bìoball air-loidhne

列王紀下卷 18 - 現代台語譯本羅馬字版

Iû-tāi-ông Hi-se-ka
( 2 Tāi 29.1-2 ; 31.1 )

¹ Tng Í-la ê kiáⁿ Í-sek-lia̍t-ông Hô-sè-a tē-saⁿ nî, A-hap-su ê kiáⁿ Hi-se-ka khai-sí chòe Iû-tāi-ông.

² I chē-ūi ê sî jī-cha̍p-gō͘ hè, tī Iâ-lō͘-sat-léng choh-ông jī-cha̍p-káu nî; i ê lāu-bú kiò-chòe A-pí-ngá, sī Sat-ka-lī-a ê cha-bó͘-kiáⁿ.

³ Hi-se-ka chòe Siōng Chú khòaⁿ-chòe hó ê sū, chiàu i ê chó͘-sian Tāi-pi̍t it-chhè ê só͘-chòe.

⁴ I hòe-tû soaⁿ-thâu-tôaⁿ, húi-hoāi chio̍h-thiāu, chhò A-sià-la ê thiāu-siōng, phah-chhùi Mô͘-se chō ê tâng-chôa; in-ūi hit-sî Í-sek-lia̍t-lâng iáu tùi tâng-chôa sio-hiuⁿ, kiò i chòe Nî-hut-sū-tān.

⁵ Hi-se-ka óa-khò Siōng Chú — Í-sek-lia̍t ê Siōng-tè; tī i í-chêng kap í-āu ê Iû-tāi lia̍t-ông, bô lâng ōe-tàng kap i pí.

⁶ Hi-se-ka tùi Siōng Chú tiong-sêng, bô lī-khui I, chip-siú Siōng Chú só͘ bēng-lēng Mô͘-se ê kài-bēng.

⁷ Siōng Chú kap i tông-chāi, i bô-lūn khì tó-ūi, só͘ chòe--ê lóng sūn-lī; i pōe-poān A-su̍t-ông, bô koh ho̍k-sāi i.

⁸ I phah-pāi Hui-lī-sū-lâng, ti̍t-kàu Ka-sat kap sì-ûi ê tōe-khu, tùi kan-ta ū siú-bōng-tâi ê chng-siā kàu ū pó-lúi ê siâⁿ.

⁹ Hi-se-ka-ông tē-sì nî, chiū-sī Í-la ê kiáⁿ Í-sek-lia̍t-ông Hô-sè-a tē-chhit nî, A-su̍t-ông Sat-bān-í-sek chiūⁿ-lâi ûi-kong Sat-má-lī-a.

¹⁰ Kàu tē-saⁿ nî nî-bé, chiū-sī Hi-se-ka tē-la̍k nî, Í-sek-lia̍t-ông Hô-sè-a tē-káu nî, Sat-má-lī-a siū kong-phòa.

¹¹ A-su̍t-ông chiong Í-sek-lia̍t-lâng lia̍h-khì A-su̍t, hō͘ in tòa tī Hap-la̍h, Ko-sàn tōe-khu ê Hap-phok hô-piⁿ, í-ki̍p Bí-tí-a-lâng ê siâⁿ.

¹² In-ūi in m̄ thiaⁿ-thàn Siōng Chú — in ê Siōng-tè ê ōe, ûi-pōe I ê iok; Siōng Chú ê po̍k-jîn Mô͘-se só͘ bēng-lēng in--ê, in m̄ thiaⁿ-thàn, m̄ chun-siú.

A-su̍t Ui-hia̍p Iâ-lō͘-sat-léng
( 2 Tāi 32.1-19 ; Sài 36.1-22 )

¹³ Hi-se-ka-ông tē-cha̍p-sì nî, A-su̍t-ông Se-ná-ki-li̍p chiūⁿ-lâi kong-kek Iû-tāi só͘-ū kian-kò͘ ê siâⁿ, koh kā in chiàm-léng.

¹⁴ Iû-tāi-ông Hi-se-ka phài lâng khì La-kiat kìⁿ A-su̍t-ông, kóng, “Góa ū tek-chōe lí, kiû lí thiat-kun lī-khui góa; lí bô-lūn iau-kiû sím-mi̍h, góa lóng tah-èng.” Tùi án-ni, A-su̍t-ông hoa̍t Iû-tāi-ông Hi-se-ka gûn chi̍t-bān kong-kun, kim chi̍t-chheng kong-kun.

¹⁵ Hi-se-ka chiū chiong Siōng Chú sèng-tiān kap ông-kiong ê hú-khò͘ só͘-ū ê gûn lóng hō͘ i.

¹⁶ Hi-se-ka koh chiong Siōng Chú sèng-tiān mn̂g-téng ê kim kap i ka-kī pau tī thiāu-téng ê kim pak--lo̍h-lâi, kau hō͘ A-su̍t-ông.

¹⁷ A-su̍t-ông tùi La-kiat phài goân-sòe, chiong-kun, kap chóng-su-lēng, tòa tāi-kun khì Iâ-lō͘-sat-léng Hi-se-ka-ông hia. In chiūⁿ-lâi kàu Iâ-lō͘-sat-léng, khiā tī Siōng-tî ê chúi-kau piⁿ, tī Phiò-pò͘-tiûⁿ ê tōa-lō͘ hia.

¹⁸ In tōa-siaⁿ kiò ông, chiū ū Hi-le̍k-ka ê kiáⁿ kiong-têng chóng-koán Í-lī-a-kèng, su-kì Sià-pek-ná, í-ki̍p A-sat ê kiáⁿ sú-koaⁿ Iok-a, chhut-lâi kìⁿ in.

¹⁹ Chóng-su-lēng tùi in kóng, “Khì kā Hi-se-ka kóng, A-su̍t tāi-ông án-ni kóng, ‘Lí teh khò-sè sím-mi̍h?

²⁰ Lí siūⁿ-kóng ū chhek-lio̍k kap kun-le̍k, kî-si̍t sī phòng-hong ê ōe. Tàu-tóe lí sī khò siáⁿ-lâng, kèng-jiân káⁿ hoán-poān góa?

²¹ Lí só͘ óa-khò ê Ai-ki̍p sī chi̍t ki tn̄g--khì ê lô͘-tek-á-koáiⁿ; lâng nā khò i, chhiú ōe hō͘ i chha̍k--ji̍p-khì. Só͘-ū óa-khò Ai-ki̍p-ông Hoat-ló ê lâng lóng ōe án-ni.

²² Lín nā tùi góa kóng: Goán óa-khò Siōng Chú — goán ê Siōng-tè; Hi-se-ka kiám m̄-sī ū hòe-tû Siōng-tè ê soaⁿ-thâu-tôaⁿ kap chè-tôaⁿ, koh kā Iû-tāi kap Iâ-lō͘-sat-léng ê lâng kóng: Lín it-tēng tio̍h tī Iâ-lō͘-sat-léng chit-ê chè-tôaⁿ kèng-pài?’

²³ Taⁿ lâi, lâi kap góa ê chú-lâng A-su̍t-ông sio-su. Góa hō͘ lín nn̄g-chheng chiah bé, lín kiám ū hoat-tō͘ chhē kàu-gia̍h ê lâng thang khiâ?

²⁴ Nā bô hoat-tō͘, lín ná ōe-tàng phah-pāi góa ê chú siōng-sòe ê chi̍t ê pō͘-hā? Lín kiám beh koh óa-khò Ai-ki̍p ê chiàn-chhia kap bé-peng?

²⁵ Hiān-chāi, góa lâi kong-kek húi-bia̍t chit-ê só͘-chāi, kiám m̄-sī Siōng Chú ê chí-ì? Siōng Chú chhin-sin kā góa kóng, ‘Chiūⁿ-khì kong-chhú chit-tè thó͘-tōe, kā i húi-bia̍t.’”

²⁶ Hi-le̍k-ka ê kiáⁿ Í-lī-a-kèng, Sià-pek-ná, kap Iok-a tùi chóng-su-lēng kóng, “Chhiáⁿ ēng A-lân-ōe tùi lí ê po̍k-jîn kóng, goán thiaⁿ ū. Chhiáⁿ m̄-thang ēng Hi-pek-lâi-ōe kóng, kiaⁿ-liáu hō͘ siâⁿ-chhiûⁿ téng ê jîn-bîn thiaⁿ--tio̍h.”

²⁷ Chóng-su-lēng tùi in kóng, “Lín siūⁿ-kóng goán chú-lâng chhe góa kóng chiah-ê ōe, chí-ū beh hō͘ lín kap lín ê kok-ông thiaⁿ sī--bô? M̄-sī, góa mā beh kóng hō͘ siâⁿ-chhiûⁿ téng ê lâng thiaⁿ. In kap lín kâng-khoán tio̍h chia̍h ka-kī ê pùn, lim ka-kī ê jiō.”

²⁸ Chóng-su-lēng koh khiā khí-lâi tōa-siaⁿ ēng Hi-pek-lâi-ōe hoah kóng, “Tio̍h thiaⁿ A-su̍t tāi-ông ê ōe.

²⁹ Ông án-ni kóng, ‘M̄-thang hō͘ Hi-se-ka phiàn--khì, in-ūi i bōe-tàng kiù lín thoat-lī góa ê chhiú.

³⁰ I kiò lín sìn-khò Siōng Chú, kóng: Siōng Chú it-tēng ōe kiù lán; chit-ê siâⁿ bōe hām-lo̍h tī A-su̍t-ông ê chhiú.’

³¹ M̄-thang thiaⁿ Hi-se-ka ê ōe. A-su̍t-ông án-ni kóng, ‘Kap góa kóng-hô, chhut-lâi tâu-hâng. Án-ni, lín ta̍k-ê lâng chiū ōe-tàng chia̍h ka-kī chèng ê phû-tô kap bû-hoa-kó, lim lín ka-kī ê chíⁿ-chúi,

³² thèng-hāu góa chhōa lín kàu chi̍t ê só͘-chāi, chhin-chhiūⁿ lín ê thó͘-tōe, ū ngó͘-kok kap sin-chiú, ū bí-niû kap phû-tô-hn̂g, ū kaⁿ-ná-iû kap bi̍t, hō͘ lín oa̍h tn̂g-hè-siū. M̄-thang hō͘ Hi-se-ka phiàn--khì, i kóng: Siōng Chú it-tēng ōe kiù lán. Lín m̄-thang thiaⁿ i ê ōe.

³³ Bān-kok ê chèng sîn-bêng, tó chi̍t ê bat kiù i ka-kī ê kok thoat-lī A-su̍t-ông ê chhiú?

³⁴ Hap-má kap A-ní-poa̍t ê sîn-bêng tī tó-ūi? Se-hoat-óa-im, Hi-ná, Í-óa ê sîn-bêng tī tó-ūi? In kiám ū kái-kiù Sat-má-lī-a thoat-lī góa ê chhiú?

³⁵ Chiah-ê kok-ka ê sîn-bêng ū tó chi̍t ê bat tùi góa ê chhiú kiù-chhut i ka-kī ê kok-ka? Án-ni, Siōng Chú ná ōe-tàng kiù Iâ-lō͘-sat-léng thoat-lī góa ê chhiú-thâu?’”

³⁶ M̄-kú jîn-bîn lóng chēng-chēng, bô ìn pòaⁿ-kù ōe, in-ūi Hi-se-ka-ông ū kā in hoan-hù, “M̄-thang ìn i!”

³⁷ Hit-sî, Hi-le̍k-ka ê kiáⁿ kiong-têng chóng-koán Í-lī-a-kèng, su-kì Sià-pek-ná, kap A-sat ê kiáⁿ sú-koaⁿ Iok-a, lóng thiah-li̍h in ê saⁿ, tùi Hi-se-ka pò-kò A-su̍t ê chóng-su-lēng kā in kóng ê ōe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan