Bìoball air-loidhne

列王紀下卷 16 - 現代台語譯本羅馬字版

Iû-tāi-ông A-hap-su
( 2 Tāi 28.1-27 )

¹ Lī-má-lī ê kiáⁿ Í-sek-lia̍t-ông Pí-ka tē-cha̍p-chhit nî, Iok-thán ê kiáⁿ A-hap-su khai-sí chòe Iû-tāi-ông.

² A-hap-su chē-ūi ê sî jī-cha̍p hè, tī Iâ-lō͘-sat-léng choh-ông cha̍p-la̍k nî; i bô chhin-chhiūⁿ i ê chó͘-sian Tāi-pi̍t chòe Siōng Chú — i ê Siōng-tè khòaⁿ-chòe hó ê sū,

³ tian-tò khì kiâⁿ Í-sek-lia̍t hiah-ê ông ê lō͘, sīm-chì sio i ka-kī ê kiáⁿ hiàn-chòe chè, o̍h Siōng Chú tī in bīn-chêng kóaⁿ-chhut ê lia̍t-kok só͘ chòe khó-ò͘ⁿ ê sū;

⁴ koh tī soaⁿ-thâu-tôaⁿ, ta̍k-ê soaⁿ-lûn-á, ta̍k-châng chhiⁿ-chhùi ê chhiū ē-bīn hiàn-chè sio-hiuⁿ.

⁵ Hit-sî, Sū-lī-a-ông Lī-sìn kap Lī-má-lī ê kiáⁿ Í-sek-lia̍t-ông Pí-ka chiūⁿ-lâi kong-kek Iâ-lō͘-sat-léng, ûi-khùn A-hap-su, m̄-kú phah bōe iâⁿ i.

⁶ Tng-sî Sū-lī-a-ông Lī-sìn siu-hôe Í-la-tha kui-sio̍k Sū-lī-a, kóaⁿ Iû-tāi-lâng chhut Í-la-tha. Í-tong-lâng chiū lâi Í-la-tha khiā-khí, kàu kin-á-ji̍t.

⁷ A-hap-su phài sù-chiá khì kìⁿ A-su̍t-ông Thê-kek-la Pí-lia̍t-sek, kóng, “Góa sī lí ê po̍k-jîn, lí ê kiáⁿ. Sū-lī-a-ông kap Í-sek-lia̍t-ông kong-kek góa, chhiáⁿ lâi kiù góa thoat-lī in ê chhiú.”

⁸ A-hap-su chiong Siōng Chú tiān-lāi kap ông-kiong hú-khò͘ só͘-ū ê kim gûn, chòe lé-mi̍h sàng hō͘ A-su̍t-ông.

⁹ A-su̍t-ông tah-èng, chiū khì kong-táⁿ Tāi-má-sū-kek, kong-chhú chit-ê siâⁿ, lia̍h hiah-ê chū-bîn khì Kiat-ní, koh thâi-sí Lī-sìn.

¹⁰ A-hap-su-ông khì Tāi-má-sū-kek beh gêng-chiap A-su̍t-ông Thê-kek-la Pí-lia̍t-sek; i tī Tāi-má-sū-kek khòaⁿ-tio̍h chi̍t chō tôaⁿ. A-hap-su-ông chiong hit-ê tôaⁿ ê khoán-sit, siông-sè ê tô͘-iūⁿ kap choh-hoat, kià hō͘ chè-si O͘-lī-a.

¹¹ Chè-si O͘-lī-a chiū tī A-hap-su-ông iáu-bē tùi Tāi-má-sū-kek tńg-lâi í-chêng, chiàu A-hap-su-ông tùi Tāi-má-sū-kek kià--lâi ê tô͘-iūⁿ khí chi̍t chō tôaⁿ.

¹² Ông tùi Tāi-má-sū-kek tò--lâi, khòaⁿ-tio̍h tôaⁿ, kiâⁿ óa--khì, tī hit téng-bīn hiàn-chè.

¹³ I hiàn sio-hòa-chè, sò͘-chè, kap tiān-chiú-chè, chiong pêng-an-chè ê huih hiù tī tôaⁿ-téng.

¹⁴ I koh chiong Siōng Chú bīn-chêng ê tâng-tôaⁿ, chiū-sī tī sin ê tôaⁿ kap sèng-tiān tiong-kan ê tâng-tôaⁿ, tùi tiān ê thâu-chêng sóa-khì hē tī sin ê tôaⁿ ê pak-pêng.

¹⁵ A-hap-su-ông bēng-lēng chè-si O͘-lī-a kóng, “Chá-khí-sî ê sio-hòa-chè, ē-hng-sî ê sò͘-chè, ông ê sio-hòa-chè kap sò͘-chè, kok-lāi jîn-bîn ê sio-hòa-chè, sò͘-chè, kap tiān-chiú-chè, lóng tio̍h tī tōa-tôaⁿ ê téng-bīn hiàn; sio-hòa-chè kap kî-tha seng-lé ê huih tio̍h hiù tī tōa-tôaⁿ ê téng-bīn. Tâng-tôaⁿ góa beh chòe kiû-mn̄g ê lō͘-ēng.”

¹⁶ Chè-si O͘-lī-a chiū chiàu A-hap-su-ông ê bēng-lēng khì chòe.

¹⁷ A-hap-su-ông thiah hiah-ê phûn-chō ê tó͘-pang, chiong phûn tùi hiah-ê phûn-chō sóa--lo̍h-lâi; koh chiong tâng-hái tùi cha̍p-jī chiah tâng-gû téng-bīn poaⁿ--lo̍h-lâi, hē tī pho͘ chio̍h-pán ê tōe-bīn.

¹⁸ I koh in-ūi A-su̍t-ông ê iân-kò͘, chiong sèng-tiān An-hioh-ji̍t ê cháu-lông, kap ông choan-iōng ji̍p-lâi sèng-tiān ê gōa-mn̂g, lóng thiah-tiāu.

¹⁹ A-hap-su kî-tha ê só͘-chòe lóng kì-chài tī Iû-tāi Lia̍t-ông-sú.

²⁰ A-hap-su tńg-khì i ê lia̍t-chó͘ hia, an-chòng tī Tāi-pi̍t-siâⁿ, i ê chó͘-sian ê bōng. I ê kiáⁿ Hi-se-ka sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan