Bìoball air-loidhne

列王紀下卷 15 - 現代台語譯本羅馬字版

Iû-tāi-ông O͘-se-a
( 2 Tāi 26.1-23 )

¹ Í-sek-lia̍t-ông Iâ-lô-pho-an Jī-sè tē-jī-cha̍p-chhit nî, A-má-siā ê kiáⁿ O͘-se-a khai-sí chòe Iû-tāi-ông.

² I chē-ūi ê sî cha̍p-la̍k hè, tī Iâ-lō͘-sat-léng choh-ông gō͘-cha̍p-jī nî; i ê lāu-bú kiò-chòe Iâ-khó-lī-ngá, sī Iâ-lō͘-sat-léng-lâng.

³ O͘-se-a chòe Siōng Chú khòaⁿ-chòe hó ê sū, chiàu i ê lāu-pē A-má-siā ê só͘-chòe khì chòe.

⁴ M̄-kú soaⁿ-thâu-tôaⁿ iáu-bē hòe-tû, jîn-bîn iû-goân tī hia hiàn-chè sio-hiuⁿ.

⁵ Siōng Chú kàng chai-hō, hō͘ ông it-seng tì-tio̍h giâm-tiōng ê phê-hu-pīⁿ; i chiū tòa tī siū keh-lī ê chhù. I ê kiáⁿ Iok-thán koán-lí ông-ka ê sū, tī-lí kok-chèng.

⁶ O͘-se-a kî-tha ê sū-chek kap i ê só͘-chòe lóng kì tī Iû-tāi Lia̍t-ông-sú.

⁷ O͘-se-a tńg-khì i ê lia̍t-chó͘ hia, lâng kā i an-chòng tī Tāi-pi̍t-siâⁿ, i ê chó͘-sian ê bōng. I ê kiáⁿ Iok-thán sòa-chiap i choh-ông.

Í-sek-lia̍t-ông Sat-ka-lī-a

⁸ Iû-tāi-ông O͘-se-a tē-saⁿ-cha̍p-poeh nî, Iâ-lô-pho-an Jī-sè ê kiáⁿ Sat-ka-lī-a tī Sat-má-lī-a choh-ông, thóng-tī Í-sek-lia̍t la̍k ge̍h-ji̍t kú.

⁹ I chòe Siōng Chú khòaⁿ-chòe pháiⁿ ê sū, chiàu i ê chó͘-sian ê só͘-chòe, bô lī-khui Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe.

¹⁰ Ngá-pí ê kiáⁿ Sa-liông pōe-poān Sat-ka-lī-a, tī jîn-bîn ê bīn-chêng kā i thâi-sí, chhoàn i ê ūi.

¹¹ Sat-ka-lī-a kî-tha ê sū-chek lóng kì-chài tī Í-sek-lia̍t Lia̍t-ông-sú.

¹² Siōng Chú bat tùi Iâ-hō͘ kóng, “Lí ê kiáⁿ-sun ōe chē Í-sek-lia̍t ê ông-ūi kàu tē-sì tāi.” Chit-ê ōe chiū án-ni si̍t-hiān.

Í-sek-lia̍t-ông Sa-liông

¹³ Iû-tāi-ông O͘-se-a tē-saⁿ-cha̍p-káu nî, Ngá-pí ê kiáⁿ Sa-liông tī Sat-má-lī-a chòe Í-sek-lia̍t-ông chi̍t ge̍h-ji̍t kú.

¹⁴ Ka-tí ê kiáⁿ Bí-ná-hiān tùi Tek-sat chiūⁿ-khì Sat-má-lī-a, thâi-sí Ngá-pí ê kiáⁿ Sa-liông, chhoàn i ê ūi.

¹⁵ Sa-liông kî-tha ê sū-chek, kap i pōe-poān ê im-bô͘, lóng kì-chài tī Í-sek-lia̍t Lia̍t-ông-sú.

¹⁶ Hit-sî, Bí-ná-hiān tùi Tek-sat khì kong-táⁿ Thê-húi-sat, kap siâⁿ-lāi ê chū-bîn í-ki̍p sì-ûi ê tōe-khu; in-ūi siâⁿ-lāi ê lâng m̄-khéng tâu-hâng, Bí-ná-hiān chiū kā in châu-bia̍t, sīm-chì phòa-khui só͘-ū ū-sin ê hū-jîn-lâng ê pak-tó͘.

Í-sek-lia̍t-ông Bí-ná-hiān

¹⁷ Iû-tāi-ông O͘-se-a tē-saⁿ-cha̍p-káu nî, Ka-tí ê kiáⁿ Bí-ná-hiān choh-ông, tī Sat-má-lī-a thóng-tī Í-sek-lia̍t cha̍p nî.

¹⁸ I chòe Siōng Chú khòaⁿ-chòe pháiⁿ ê sū, chi̍t-sì-lâng bô lī-khui Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe.

¹⁹ A-su̍t-ông Thê-kek-la Pí-lia̍t-sek lâi chhim-hoān Í-sek-lia̍t. Bí-ná-hiān sàng gûn saⁿ-bān sì-chheng kong-kun hō͘ A-su̍t-ông, kiû i pang-chān kian-kò͘ ông-koân.

²⁰ Bí-ná-hiān kiông-pek Í-sek-lia̍t ê hó-gia̍h-lâng hū-tam chiah-ê gûn, ta̍k-ê lâng chhut gō͘-pah chhit-cha̍p kong-khek, sàng hō͘ A-su̍t-ông. A-su̍t-ông chiū tò-khì i pún-kok.

²¹ Bí-ná-hiān kî-tha ê sū-chek kap i ê só͘-chòe, lóng kì-chài tī Í-sek-lia̍t Lia̍t-ông-sú.

²² Bí-ná-hiān tńg-khì i ê lia̍t-chó͘ hia, i ê kiáⁿ Pí-ka-hat sòa-chiap i choh-ông.

Í-sek-lia̍t-ông Pí-ka-hat

²³ Iû-tāi-ông O͘-se-a tē-gō͘-cha̍p nî, Bí-ná-hiān ê kiáⁿ Pí-ka-hat tī Sat-má-lī-a choh-ông, thóng-tī Í-sek-lia̍t nn̄g nî.

²⁴ I chòe Siōng Chú khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe.

²⁵ I ê sī-ōe-koaⁿ, Lī-má-lī ê kiáⁿ Pí-ka pōe-poān, tī Sat-má-lī-a ông-kiong ê pó-lúi kā i thâi-sí, chhoàn i ê ūi; kiōng-bô͘ ê lâng ū A-ní-ko-pek, A-lī-iâ, í-ki̍p gō͘-cha̍p ê Ki-lia̍t-lâng.

²⁶ Pí-ka-hat kî-tha ê sū-chek kap i ê só͘-chòe, lóng kì-chài tī Í-sek-lia̍t Lia̍t-ông-sú.

Í-sek-lia̍t-ông Pí-ka

²⁷ Iû-tāi-ông O͘-se-a tē-gō͘-cha̍p-jī nî, Lī-má-lī ê kiáⁿ Pí-ka tī Sat-má-lī-a choh-ông, thóng-tī Í-sek-lia̍t jī-cha̍p nî.

²⁸ I chòe Siōng Chú khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe.

²⁹ Pí-ka chòe Í-sek-lia̍t-ông ê sî, A-su̍t-ông Thê-kek-la Pí-lia̍t-sek kong-chhú Í-hûn, A-pek Pek Má-ka, A-ná, Ki-te-su, kap Hā-só chiah-ê siâⁿ, Ki-lia̍t, Ka-lī-lī, í-ki̍p Ná-hut-tha-lī choân tōe-khu; koh chiong hiah-ê chū-bîn lóng lia̍h-khì A-su̍t.

³⁰ O͘-se-a ê kiáⁿ Iok-thán tē-jī-cha̍p nî, Í-la ê kiáⁿ Hô-sè-a pōe-poān Lī-má-lī ê kiáⁿ Pí-ka, kā i thâi-sí, chhoàn i ê ūi.

³¹ Pí-ka kî-tha ê sū-chek kap i ê só͘-chòe, lóng kì-chài tī Í-sek-lia̍t Lia̍t-ông-sú.

Iû-tāi-ông Iok-thán
( 2 Tāi 27.1-9 )

³² Lī-má-lī ê kiáⁿ Í-sek-lia̍t-ông Pí-ka tē-jī nî, O͘-se-a ê kiáⁿ Iok-thán khai-sí chòe Iû-tāi-ông.

³³ I chē-ūi ê sî jī-cha̍p-gō͘ hè, tī Iâ-lō͘-sat-léng choh-ông cha̍p-la̍k nî; i ê lāu-bú kiò-chòe Iâ-lō͘-sa, sī Sat-tok ê cha-bó͘-kiáⁿ.

³⁴ Iok-thán chòe Siōng Chú khòaⁿ-chòe hó ê sū, chiàu i ê lāu-pē O͘-se-a ê só͘-chòe khì chòe.

³⁵ M̄-kú soaⁿ-thâu-tôaⁿ iáu-bē hòe-tû, jîn-bîn iû-goân tī hia hiàn-chè sio-hiuⁿ. Iok-thán khí Siōng Chú sèng-tiān ê Siōng-mn̂g.

³⁶ Iok-thán kî-tha ê sū-chek kap i ê só͘-chòe, lóng kì-chài tī Iû-tāi Lia̍t-ông-sú.

³⁷ Hit-sî, Siōng Chú khai-sí chhe Sū-lī-a-ông Lī-sìn kap Lī-má-lī ê kiáⁿ Í-sek-lia̍t-ông Pí-ka khì kong-kek Iû-tāi.

³⁸ Iok-thán tńg-khì i ê lia̍t-chó͘ hia, an-chòng tī i ê chó͘ Tāi-pi̍t ê siâⁿ, i ê chó͘-sian ê bōng. I ê kiáⁿ A-hap-su sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan