Bìoball air-loidhne

列王紀下卷 14 - 現代台語譯本羅馬字版

Iû-tāi-ông A-má-siā
( 2 Tāi 25.1-24 )

¹ Iok-hap-su ê kiáⁿ Í-sek-lia̍t-ông Iok-hôa-si tē-jī nî, Iok-a-si ê kiáⁿ A-má-siā khai-sí chòe Iû-tāi-ông.

² I chē-ūi ê sî jī-cha̍p-gō͘ hè, tī Iâ-lō͘-sat-léng choh-ông jī-cha̍p-káu nî; i ê lāu-bú kiò-chòe Iok-iâ-tān, sī Iâ-lō͘-sat-léng-lâng.

³ A-má-siā chòe Siōng Chú khòaⁿ-chòe hó ê sū, m̄-kú bô chhin-chhiūⁿ i ê chó͘-sian Tāi-pi̍t; i iû-goân chiàu i ê lāu-pē Iok-a-si ê só͘-chòe khì chòe,

⁴ bô thiah-húi soaⁿ-thâu-tôaⁿ; jîn-bîn kè-sio̍k tī hia hiàn-chè sio-hiuⁿ.

⁵ A-má-siā ê ông-koân chi̍t-ē kian-kò͘, chiū chiong thâi-sí i lāu-pē Iû-tāi-ông hiah-ê jîn-sîn chhú-sí.

⁶ M̄-kú i bô thâi-sí hiah-ê jîn-sîn ê kiáⁿ-jî, sī chiàu Mô͘-se lu̍t-hoat ê chheh só͘ kì-chài Siōng Chú ê bēng-lēng: M̄-thang in-ūi kiáⁿ-jî ê só͘-chòe kā lāu-pē chhú-sí, mā m̄-thang in-ūi lāu-pē ê só͘-chòe kā kiáⁿ-jî chhú-sí; ta̍k-ê lâng tio̍h in-ūi ka-kī ê chōe sí.

⁷ A-má-siā tī Iâm ê Soaⁿ-kok thâi-sí Í-tong-lâng chi̍t-bān, koh kong-chhú Se-la, kā i kái-miâ chòe Iok-thiap, kàu kin-á-ji̍t.

⁸ Hit-sî, A-má-siā phài sù-chiá khì kìⁿ Iâ-hō͘ ê sun, Iok-hap-su ê kiáⁿ, Í-sek-lia̍t-ông Iok-hôa-si, kóng, “Lâi, lán lâi chiàn-tiûⁿ piàⁿ su-iâⁿ.”

⁹ Í-sek-lia̍t-ông Iok-hôa-si phài sù-chiá khì kā Iû-tāi-ông A-má-siā kóng, “Lê-pa-lūn ê chháu-chhì chhe sù-chiá khì kìⁿ Lê-pa-lūn ê pek-hiuⁿ-chhiū, kóng, ‘Lí ê cha-bó͘-kiáⁿ hō͘ góa ê kiáⁿ chòe bó͘!’ Āu-lâi Lê-pa-lūn ū chi̍t chiah iá-siù keng-kè, kā chháu-chhì thún-ta̍h.

¹⁰ Lí í-keng thâi-iâⁿ Í-tong, sim chiū kiau-ngō͘ sáng-sè. Lí tiàm lín tau hióng-siū lí ê êng-kng chiū hó, ná beh jiá chai-hō, hō͘ lí pún-sin kap Iû-tāi-kok chòe-hé bia̍t-bông?”

¹¹ M̄-kú A-má-siā thiaⁿ bōe lo̍h--khì. Í-sek-lia̍t-ông Iok-hôa-si chiū chiūⁿ--lâi, tī Iû-tāi ê Pek Sī-be̍k kap Iû-tāi-ông A-má-siā kau-chiàn.

¹² Iû-tāi hō͘ Í-sek-lia̍t phah-pāi, ta̍k-ê lâng cháu tò-khì in tau.

¹³ Í-sek-lia̍t-ông Iok-hôa-si tī hia lia̍h-tio̍h Iû-tāi-ông A-má-siā, koh lâi thiah-húi Iâ-lō͘-sat-léng ê siâⁿ-chhiûⁿ, tùi Í-hoat-liân-mn̂g kàu Kak-mn̂g, iok nn̄g-pah kong-chhioh.

¹⁴ Iok-hôa-si chiong Siōng Chú sèng-tiān kap ông-kiong ê hú-khò͘ só͘-ū ê kim-gûn kap khì-khū lóng the̍h--khì, koh lia̍h lâng chòe jîn-chit, chiah tò-khì Sat-má-lī-a.

¹⁵ Iok-hôa-si kî-tha ê sū-chek, i ê só͘-chòe kap sêng-chiū, í-ki̍p kap Iû-tāi-ông A-má-siā kau-chiàn ê sū, lóng kì-chài tī Í-sek-lia̍t Lia̍t-ông-sú.

¹⁶ Iok-hôa-si tńg-khì i ê lia̍t-chó͘ hia, kap Í-sek-lia̍t chiah-ê ông chòe-hé an-chòng tī Sat-má-lī-a; i ê kiáⁿ Iâ-lô-pho-an Jī-sè sòa-chiap i choh-ông.

Iû-tāi-ông A-má-siā Sí
( 2 Tāi 25.25-28 )

¹⁷ Iok-hap-su ê kiáⁿ Í-sek-lia̍t-ông Iok-hôa-si sí-liáu, Iok-a-si ê kiáⁿ Iû-tāi-ông A-má-siā koh-chài oa̍h cha̍p-gō͘ nî.

¹⁸ A-má-siā kî-tha ê sū-chek, lóng kì-chài tī Iû-tāi Lia̍t-ông-sú.

¹⁹ Tī Iâ-lō͘-sat-léng ū lâng kè-bô͘ beh hāi A-má-siā, i chiū tô-cháu khì La-kiat. In phài lâng jip kàu La-kiat, tī hia kā i thâi-sí.

²⁰ Lâng ēng bé chiong i ê si-thé chài tò-lâi Iâ-lō͘-sat-léng, chiong i an-chòng tī Tāi-pi̍t-siâⁿ, lia̍t-chó͘ ê bōng-tōe.

²¹ Iû-tāi ê jîn-bîn siat-li̍p O͘-se-a sòa-chiap i ê lāu-pē A-má-siā choh-ông, hit-sî i cha̍p-la̍k hè.

²² A-má-siā-ông tńg-khì i ê lia̍t-chó͘ hia liáu-āu, O͘-se-a siu-hôe Í-la-tha kui-sio̍k Iû-tāi-kok, koh kā i siu-kiàn.

Í-sek-lia̍t-ông Iâ-lô-pho-an Jī-sè

²³ Iok-a-si ê kiáⁿ Iû-tāi-ông A-má-siā tē-cha̍p-gō͘ nî, Iok-hôa-si ê kiáⁿ Iâ-lô-pho-an Jī-sè tī Sat-má-lī-a chòe Í-sek-lia̍t-ông; i choh-ông kiōng sì-cha̍p-it nî.

²⁴ I chòe Siōng Chú khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe.

²⁵ I siu-hôe Í-sek-lia̍t pian-kài ê tōe, tùi Hap-má ài-kháu kàu Sí-hái, tú-tú chiàu Siōng Chú — Í-sek-lia̍t ê Siōng-tè thong-kè I ê po̍k-jîn, Ka-te̍k Hi-hut-lâng A-bí-thài ê kiáⁿ sian-ti Iok-ná só͘ kóng ê ōe.

²⁶ Siōng Chú khòaⁿ-kìⁿ Í-sek-lia̍t-lâng, bô-lūn sī chū-iû--ê á-sī bô chū-iû--ê, lóng siū ke̍k-tōa ê khó͘-lān, mā bô lâng pang-chān in.

²⁷ Siōng Chú koat-ì bô beh tùi thiⁿ-ē chhat-siau Í-sek-lia̍t ê miâ, chiū thong-kè Iok-hôa-si ê kiáⁿ Iâ-lô-pho-an Jī-sè kái-kiù in.

²⁸ Iâ-lô-pho-an Jī-sè kî-tha ê sū-chek, i ê só͘-chòe kap sêng-chiū, í-ki̍p i án-chóaⁿ kau-chiàn, án-chóaⁿ chiong í-chêng sio̍k Iû-tāi ê Tāi-má-sū-kek kap Hap-má siu-hôe kui-sio̍k Í-sek-lia̍t, lóng kì-chài tī Í-sek-lia̍t Lia̍t-ông-sú.

²⁹ Iâ-lô-pho-an Jī-sè tńg-khì i ê chó͘-sian Í-sek-lia̍t hiah-ê ông hia, i ê kiáⁿ Sat-ka-lī-a sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan