Bìoball air-loidhne

列王紀下卷 12 - 現代台語譯本羅馬字版

Iû-tāi-ông Iok-a-si
( 2 Tāi 24.1-16 , 23-27 )

¹ Iâ-hō͘ tē-chhit nî, Iok-a-si choh-ông, tī Iâ-lō͘-sat-léng choh-ông sì-cha̍p nî; i ê lāu-bú kiò-chòe Se-pí-a, sī Pia̍t-sī-pa-lâng.

² Iok-a-si in-ūi chè-si Iâ-hô-iâ-tāi ê kàu-tō, it-seng chòe Siōng Chú khòaⁿ-chòe hó ê sū.

³ M̄-kú soaⁿ-thâu-tôaⁿ iáu-bē hòe-tû, jîn-bîn iû-goân tī hia hiàn-chè sio-hiuⁿ.

⁴ Iok-a-si tùi chèng chè-si kóng, “Só͘-ū hiàn tī Siōng Chú ê sèng-tiān hun-pia̍t-choh-sèng ê chîⁿ, bô-lūn sī ta̍k-ê lâng eng-kai hiàn--ê, á-sī chū-goān hiàn ê chîⁿ,

⁵ á-sī ta̍k-ê chè-si tùi i só͘ bat ê lâng siu-chi̍p ê hōng-hiàn, tio̍h ēng lâi siu-lí sèng-tiān só͘-ū sún-hoāi ê só͘-chāi.”

⁶ M̄-kú kàu Iok-a-si-ông tē-jī-cha̍p-saⁿ nî, chè-si iáu-bē siu-lí sèng-tiān sún-hoāi ê só͘-chāi.

⁷ Só͘-í Iok-a-si-ông tiàu-chi̍p chè-si Iâ-hô-iâ-tāi kap kî-tha ê chè-si, tùi in kóng, “Lín sī-án-chóaⁿ kàu taⁿ iáu-bē siu-lí sèng-tiān sún-hoāi ê só͘-chāi? Lín m̄-thang koh tùi lâng siu chîⁿ, tio̍h chiong chîⁿ kau--chhut-lâi, thang siu-lí sèng-tiān sún-hoāi ê só͘-chāi.”

⁸ Chèng chè-si tah-èng bô beh koh tùi jîn-bîn siu chîⁿ, mā bô beh hū-chek siu-lí sèng-tiān sún-hoāi ê só͘-chāi.

⁹ Chè-si Iâ-hô-iâ-tāi the̍h chi̍t ê kūi, tī téng-bīn ó͘ chi̍t khang, hē tī chè-tôaⁿ piⁿ, Siōng Chú sèng-tiān ji̍p-kháu ê chiàⁿ-pêng; siú-mn̂g ê chè-si kā lâi kèng-pài ê lâng só͘ hiàn ê chîⁿ lóng lok ji̍p-khì kūi-lāi.

¹⁰ Chè-si khòaⁿ-tio̍h kūi-lāi ê chîⁿ ū-kàu chōe ê sî, chiū chhiáⁿ ông ê su-kì kap tōa-chè-si lâi, chiong Siōng Chú sèng-tiān tit--tio̍h ê chîⁿ tiám-sǹg liáu pau--khí-lâi.

¹¹ In chiū chiong tiám-sǹg--kè ê chîⁿ kau hō͘ kàm-tok chéng-siu Siōng Chú sèng-tiān ê lâng. Kàm-tok ê lâng chiong chîⁿ hoat hō͘ siu-lí Siōng Chú sèng-tiān ê choh-ba̍k sai-hū kap kiàn-tio̍k kang-lâng,

¹² thô͘-chúi sai-hū kap phah-chio̍h sai-hū; koh bóe chhâ-liāu kap phah-hó ê chio̍h, siu-lí Siōng Chú sèng-tiān sún-hoāi ê só͘-chāi, í-ki̍p chi-hù siu-lí sèng-tiān ta̍k-khoán ê khai-siau.

¹³ M̄-kú hōng-hiàn tī Siōng Chú sèng-tiān ê chîⁿ bô ēng lâi chòe Siōng Chú sèng-tiān ê gûn-poe, teng-sim ê chián-to, pôaⁿ, lat-pah, kap ta̍k-khoán kim-khì gûn-khì.

¹⁴ In chiong chîⁿ lóng kau hō͘ choh-kang ê lâng siu-lí Siōng Chú ê sèng-tiān.

¹⁵ In m̄-bián kap hoat kang-chîⁿ ê lâng tùi-siàu, in-ūi hiah-ê lâng chòe tāi-chì sêng-si̍t.

¹⁶ M̄-kú pê-chōe-chè kap sio̍k-chōe-chè ê chîⁿ, bô tòa-ji̍p Siōng Chú ê sèng-tiān, lóng kui hō͘ chè-si.

¹⁷ Hit-sî, Sū-lī-a-ông Hap-sih chiūⁿ-khì kong-táⁿ Ka-te̍k, kā i kong-chhú. Hap-sih chiū koat-tēng beh chìn-kong Iâ-lō͘-sat-léng.

¹⁸ Iû-tāi-ông Iok-a-si chiong i ê chó͘-sian Iû-tāi-ông Iok-sa-hoat, Iok-lân, A-hap-siā, kap i pún-sin só͘ hiàn sèng-hòa kui Siōng Chú ê mi̍h, í-ki̍p Siōng Chú sèng-tiān kap ông-kiong ê hú-khò͘ só͘-ū ê kim, lóng sàng hō͘ Sū-lī-a-ông Hap-sih. Hap-sih chiū bô chìn-kong Iâ-lō͘-sat-léng.

¹⁹ Iok-a-si kî-tha ê sū-chek, i ê só͘-chòe, lóng kì-chài tī Iû-tāi Lia̍t-ông-sú.

²⁰ Iok-a-si ê jîn-sîn khí-lâi pōe-poān, tī lo̍h-khì Sek-la lō͘-tiong ê Pek Bí-lô kā i thâi-sí.

²¹ Hiah-ê thâi-sí Iok-a-si ê jîn-sîn sī Sī-bí-ap ê kiáⁿ Iok-sat-kah, kap Sok-be̍k ê kiáⁿ Iok-sat-poa̍t. Iok-a-si kap i ê lia̍t-chó͘ chòe-hé an-chòng tī Tāi-pi̍t-siâⁿ. I ê kiáⁿ A-má-siā sòa-chiap i choh-ông.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan