Bìoball air-loidhne

列王紀下卷 11 - 現代台語譯本羅馬字版

A-tha-lī-ngá Chhoàn-ūi
( 2 Tāi 22.10-23.15 )

¹ A-hap-siā ê lāu-bú A-tha-lī-ngá chi̍t-ē chai i ê kiáⁿ siū sat-hāi, chiū khí-lâi châu-bia̍t Iû-tāi ông-sek só͘-ū ê hō͘-tāi.

² M̄-kú Iok-lân-ông ê cha-bó͘-kiáⁿ, A-hap-siā ê sió-bē Iok-sī-pa, chiong A-hap-siā ê kiáⁿ Iok-a-si, tùi hiah-ê siū-thâi ê ông-chú tiong thau-phō-- chhut-lâi, chiong i kap i ê lin-bú chhàng tī sèng-tiān ê khùn-pâng, bô hō͘ A-tha-lī-ngá chai, hō͘ Iok-a-si bián siū sat-hāi.

³ A-tha-lī-ngá tī-lí Iû-tāi-kok ê sî, Iok-a-si kap i ê lin-bú chòe-hé bih tī Siōng Chú ê tiān la̍k nî kú.

⁴ Kàu tē-chhit nî, Iâ-hô-iâ-tāi phài lâng tiàu-chi̍p Ka-lī-lâng kap só͘-ū hō͘-ōe-peng ê koaⁿ-tiúⁿ, chhōa in ji̍p Siōng Chú ê sèng-tiān lâi kàu i hia; i kap in li̍p-iok, hō͘ in tī Siōng Chú ê tiān chiù-chōa, koh hō͘ in khòaⁿ ông ê kiáⁿ.

⁵ Koh hoan-hù in kóng, “Lín tio̍h án-ni chòe: Lín tī An-hioh-ji̍t ti̍t-pan ê sî, tio̍h saⁿ-hūn-chi̍t kò͘-siú ông-kiong,

⁶ saⁿ-hūn-chi̍t kò͘-siú So͘-ní-mn̂g, saⁿ-hūn-chi̍t kò͘-siú hō͘-ōe-peng-īⁿ ê āu-mn̂g; án-ni lûn-liû kò͘-siú ông-kiong.

⁷ Lín tī An-hioh-ji̍t bô ti̍t-pan ê nn̄g tūi jîn-oân tio̍h kò͘-siú Siōng Chú ê tiān, pó-hō͘ ông.

⁸ Lín ta̍k-ê lâng tio̍h tòa kun-khì, tī ông ê sì-ûi pó-hō͘; nā ū lâng kiông-beh ji̍p--lâi, tio̍h hō͘ i sí; ông bô-lūn tī tó-ūi, lín lóng tio̍h kun-sûi pó-hō͘ i.”

⁹ Só͘-ū ê koaⁿ-tiúⁿ lóng chiàu chè-si Iâ-hô-iâ-tāi ê bēng-lēng khì chòe; ta̍k-ê koaⁿ-tiúⁿ lóng tòa in ê pō͘-hā, bô-lūn An-hioh-ji̍t ū ti̍t-pan á-sī bô ti̍t-pan, lóng lâi chè-si Iâ-hô-iâ-tāi hia.

¹⁰ Chè-si chiū chiong khǹg tī Siōng Chú tiān-lāi Tāi-pi̍t-ông ê chhiuⁿ kap tún-pâi kau hō͘ hiah-ê koaⁿ-tiúⁿ.

¹¹ Hō͘-ōe-peng chhiú gia̍h bú-khì, tī chè-tôaⁿ kap sèng-tiān hia, tùi tiān ê lâm-pêng kàu pak-pêng, khiā tī ông ê sì-ûi pó-hō͘.

¹² Chè-si chhōa Iok-a-si chhut--lâi, kā i tì ông-koan, chiong iú-koan ông-koân ê iok-su kau hō͘ i, kā i boah-iû, siat-li̍p i choh-ông; in chiū phah-pho̍k-á, hoah kóng, “Goān ông bān-sòe!”

¹³ A-tha-lī-ngá thiaⁿ-tio̍h hō͘-ōe-peng kap jîn-bîn ê siaⁿ, chiū khì chū-chi̍p tī Siōng Chú sèng-tiān ê jîn-bîn hia,

¹⁴ khòaⁿ-tio̍h ông chiàu kui-lē khiā tī sèng-tiān ji̍p-kháu ê thiāu-piⁿ, koaⁿ-tiúⁿ kap pûn lat-pah ê lâng khiā tī ông ê piⁿ--á, kok-lāi ê jîn-bîn lóng hoaⁿ-hí, pûn lat-pah. A-tha-lī-ngá chiū thiah-li̍h i ê saⁿ, hoah kóng, “Chō-hoán lah, chō-hoán lah!”

¹⁵ In-ūi chè-si Iâ-hô-iâ-tāi m̄-ài ū lâng tī Siōng Chú ê sèng-tiān hō͘ lâng thâi-sí, chiū bēng-lēng koán kun-tūi ê koaⁿ-tiúⁿ, kóng, “Kā i tùi tūi-ngó͘ ê tiong-kan kóaⁿ--chhut-khì; beh tè--i-ê, tio̍h hō͘ i sí.”

¹⁶ In siám-khui siang-pêng hō͘ A-tha-lī-ngá kè--khì; i kàu chìn-ji̍p ông-kiong ê Bé-mn̂g, chiū tī hia hō͘ lâng thâi-sí.

Iâ-hô-iâ-tāi ê Kái-kek
( 2 Tāi 23.16-21 )

¹⁷ Iâ-hô-iâ-tāi hō͘ ông í-ki̍p jîn-bîn kap Siōng Chú li̍p-iok, chòe Siōng Chú ê chú-bîn; koh hō͘ ông kap jîn-bîn li̍p-iok.

¹⁸ Tùi án-ni, choân-kok ê jîn-bîn lóng kā Pa-le̍k ê biō thiah-húi, phah-chhùi chè-tôaⁿ kap ngó͘-siōng, koh tī tôaⁿ-chêng phah-sí Pa-le̍k ê chè-si Má-thán. Iâ-hô-iâ-tāi phài koaⁿ-oân kò͘-siú Siōng Chú ê sèng-tiān.

¹⁹ I kap koaⁿ-tiúⁿ, Ka-lī-lâng, hō͘-ōe-peng, í-ki̍p choân-kok jîn-bîn, chhiáⁿ ông tùi Siōng Chú ê sèng-tiān lo̍h--lâi, tùi hō͘-ōe-peng-īⁿ ê mn̂g chìn-ji̍p ông-kiong. Iok-a-si chiū chē ông-ūi.

²⁰ Choân-kok jîn-bîn lóng hoaⁿ-hí khoài-lo̍k, choân-siâⁿ lóng pêng-chēng; A-tha-lī-ngá í-keng tī ông-kiong hō͘ lâng thâi-sí.

²¹ Iok-a-si chē-ūi ê sî chiah chhit hè.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan