Bìoball air-loidhne

列王紀下卷 10 - 現代台語譯本羅馬字版

A-hap ê Hō͘-tāi Siū Thâi-sí

¹ A-hap ū chhit-cha̍p ê kiáⁿ-sun tī Sat-má-lī-a. Iâ-hō͘ siá-phoe khì Sat-má-lī-a, hō͘ hia ê siú-léng, tiúⁿ-ló, kap A-hap kiáⁿ-sun ê kàm-hō͘-jîn,

² kóng, “Kì-jiân lín chú-lâng ê kiáⁿ-sun kap lín chòe-hé, lín koh ū chiàn-chhia, chiàn-bé, kian-kò͘ ê siâⁿ, kap bú-khì, chit-tiuⁿ phoe sàng kàu lín hia ê sî,

³ lín tio̍h tī lín chú-lâng kiáⁿ-sun ê tiong-kan, kéng chi̍t ê siōng-hó siōng sek-ha̍p--ê, hō͘ i sòa-chiap i ê lāu-pē choh-ông, lín mā thang ūi-tio̍h lín chú-lâng ê ke kau-chiàn.”

⁴ In hui-siông kiaⁿ, kóng, “Liân Iok-hô-lân kap A-hap-siā nn̄g ê ông to bōe-tàng tùi-khòng i, lán ná ū hoat-tō͘?”

⁵ Ông-kiong chóng-koán, chhī-tiúⁿ, kap tiúⁿ-ló, í-ki̍p ông kiáⁿ-sun ê kàm-hō͘-jîn, phài lâng khì kìⁿ Iâ-hō͘, kóng, “Goán sī lí ê po̍k-jîn, lí kā goán kóng--ê, goán lóng beh chiàu án-ni chòe. Goán bô beh siat-li̍p lâng choh-ông; chhiáⁿ chiàu lí ê ì-sù khì chòe.”

⁶ Iâ-hō͘ koh siá-phoe hō͘ in, kóng, “Lín nā kui-sūn góa, beh thiaⁿ-thàn góa ê ōe, tio̍h chhú lín chú-lâng kiáⁿ-sun ê thâu-khak, bîn-á-chài chit-ê sî tòa-lâi Iâ-su-lia̍t hō͘ góa.” Hit-sî, ông ê kiáⁿ-sun chhit-cha̍p lâng lóng tòa tī siâⁿ-lāi kā in ióng-io̍k ê chun-kùi ê lâng in tau.

⁷ Iâ-hō͘ ê phoe chi̍t-ē kàu, in chiū chiong ông ê kiáⁿ-sun chhit-cha̍p lâng choân-pō͘ thâi-sí, chiong hiah-ê thâu-khak hē tī nâ-á lāi, sàng-khì Iâ-su-lia̍t Iâ-hō͘ hia.

⁸ Ū chi̍t ê sù-chiá lâi kā Iâ-hō͘ kóng, “In tòa ông hiah-ê kiáⁿ-sun ê thâu-khak lâi.” Iâ-hō͘ kóng, “Chiong in thia̍p chòe nn̄g tui, hē tī siâⁿ-mn̂g-kháu, kàu bîn-á-chá-khí.”

⁹ Keh-chá-khí, Iâ-hō͘ chhut--lâi, khiā--teh, tùi chèng jîn-bîn kóng, “Lín lóng bô chōe. Sī góa hoán-poān Iok-hô-lân-ông, kā i thâi-sí, m̄-kú chiah-ê lâng sī siáⁿ-lâng kā in thâi-sí--ê?

¹⁰ Tùi án-ni thang chai, Siōng Chú iú-koan A-hap-ke só͘ kóng ê ōe, bô chi̍t kù lo̍k-khong; in-ūi Siōng Chú thong-kè I ê po̍k-jîn Í-lī-a kóng ê ōe, lóng ū si̍t-hiān.”

¹¹ Sio̍k A-hap-ke tī Iâ-su-lia̍t chhun ê lâng, í-ki̍p i ê jîn-sîn, chhin-bi̍t ê pêng-iú, chè-si, Iâ-hō͘ lóng kā in thâi-sí, liân chi̍t ê to bô lâu--teh.

A-hap-siā ê Chhin-sio̍k Siū Sat-hāi

¹² Iâ-hō͘ chhut-hoat, khì Sat-má-lī-a. Tī tiong-tô͘, i kàu bo̍k-chiá chián iûⁿ-mn̂g ê chhù,

¹³ tú-tio̍h Iû-tāi-ông A-hap-siā ê chhin-sio̍k, mn̄g in kóng, “Lín sī sím-mi̍h-lâng?” In ìn kóng, “Goán sī A-hap-siā ê chhin-sio̍k, tú-beh lo̍h-khì hóng-būn ông kap ông-hō͘ ê kiáⁿ.”

¹⁴ Iâ-hō͘ kóng, “Oa̍h-oa̍h kā in lia̍h--khí-lâi.” Iâ-hō͘ ê pō͘-hā chiū kā in lia̍h--khí-lâi, tī chián iûⁿ-mn̂g ê chhù ê chíⁿ-piⁿ thâi-sí in, kiōng sì-cha̍p-jī lâng, liân chi̍t ê to bô lâu.

¹⁵ Iâ-hō͘ kè-sio̍k chìn-chêng, tú-tio̍h Lī-kah ê kiáⁿ Iok-ná-ta̍t lâi gêng-chiap i; Iâ-hō͘ kā i chhéng-an, tùi i kóng, “Góa sêng-sim tùi-thāi lí, lí kiám mā án-ni tùi-thāi góa?” Iok-ná-ta̍t ìn kóng, “Sī.” Iâ-hō͘ kóng, “Nā-sī án-ni, lí ê chhiú chhun--chhut-lâi.” Iok-ná-ta̍t chiū chhun-chhiú hō͘ i. I chiū khan Iok-ná-ta̍t chiūⁿ-chhia.

¹⁶ Iâ-hō͘ kóng, “Kap góa chòe-hé lâi-khì, khòaⁿ góa án-chóaⁿ ūi-tio̍h Siōng Chú jia̍t-sim chòe tāi-chì.” I chiū hō͘ Iok-ná-ta̍t chē i ê chhia.

¹⁷ Kàu Sat-má-lī-a, Iâ-hō͘ thâi-sí só͘-ū sio̍k A-hap-ke lâu tī Sat-má-lī-a ê lâng, liân chi̍t ê to bô lâu--teh, tú chiàu Siōng Chú thong-kè Í-lī-a só͘ kóng ê ōe.

Pài Pa-le̍k ê Lâng Siū Sat-hāi

¹⁸ Iâ-hō͘ tiàu-chi̍p chèng jîn-bîn, kā in kóng, “A-hap ho̍k-sāi Pa-le̍k iáu bô-kàu, Iâ-hō͘ beh koh-khah jia̍t-sim ho̍k-sāi i.

¹⁹ Só͘-í tio̍h tiàu-chi̍p Pa-le̍k só͘-ū ê sian-ti, chè-si, kap lóng-chóng pài Pa-le̍k ê lâng lâi góa chia, chi̍t ê to bōe-tàng bô lâi, in-ūi góa beh ūi Pa-le̍k kú-hêng tōa chè-sū; bô lâi--ê, beh hō͘ i sí.” Che sī Iâ-hō͘ ê khúi-kè, beh thâi-sí só͘-ū pài Pa-le̍k ê lâng.

²⁰ Iâ-hō͘ kóng, “Tio̍h ūi Pa-le̍k tiàu-chi̍p giâm-siok-hōe.” In chiū soan-pò͘.

²¹ Iâ-hō͘ phài lâng khì Í-sek-lia̍t ta̍k só͘-chāi soan-kò chit-ê siau-sit; pài Pa-le̍k ê lâng lóng chiâu kàu, bô chi̍t ê bô lâi. In chiū chìn-ji̍p Pa-le̍k ê biō; Pa-le̍k ê biō-lāi, lâng khoeh kah móa-móa-móa.

²² Iâ-hō͘ hoan-hù koán-lí lé-ho̍k ê lâng kóng, “Lé-ho̍k the̍h chhut-lâi hō͘ só͘-ū pài Pa-le̍k ê lâng chhēng.” Hit-ê lâng chiū the̍h lé-ho̍k chhut-lâi hō͘ in.

²³ Iâ-hō͘ kap Lī-kah ê kiáⁿ Iok-ná-ta̍t ji̍p Pa-le̍k ê biō, kā pài Pa-le̍k ê lâng kóng, “Lín tio̍h siông-sè so͘-cha, lín tiong-kan m̄-thang ū pài Siōng Chú ê lâng, chí-ū pài Pa-le̍k ê lâng ōe-tàng tī chia.”

²⁴ In chiū ji̍p-khì beh hiàn chè-sū kap sio-hòa-chè. Iâ-hō͘ í-keng ū an-pâi poeh-cha̍p ê lâng tī biō ê gōa-bīn, koh tùi in kóng, “Góa chiong chiah-ê lâng kau hō͘ lín, nā ū lâng tô-cháu, pàng i cháu ê lâng tio̍h pê miā.”

²⁵ Iâ-hō͘ hiàn sio-hòa-chè liáu-āu, tùi hō͘-ōe-peng kap kun-koaⁿ kóng, “Ji̍p--khì, chóng thâi! Chi̍t ê to m̄-thang hō͘ cháu--khì.” In chiū ēng to thâi-sí só͘-ū ê lâng, chiong sin-si tàn tī hia. Jiân-āu koh khì kàu Pa-le̍k-biō ê lōe-tiān,

²⁶ chiong thiāu-siōng lóng the̍h chhut-lâi sio.

²⁷ In húi-hoāi Pa-le̍k ê thiāu-siōng, thiah-húi Pa-le̍k ê biō, kā i kái-chòe piān-só͘, kàu kin-á-ji̍t.

²⁸ Án-ni, Iâ-hō͘ tùi Í-sek-lia̍t siau-bia̍t Pa-le̍k chông-pài.

²⁹ M̄-kú Iâ-hō͘ kap Nî-pat ê kiáⁿ Iâ-lô-pho-an kâng-khoán, hō͘ Í-sek-lia̍t-lâng hām-lo̍h chōe, chiū-sī khì pài Pek-te̍k-lī kap Tān ê kim-gû.

³⁰ Siōng Chú kā Iâ-hō͘ kóng, “In-ūi lí ū oân-sêng góa khòaⁿ-chòe hó ê sū, chiàu góa ê sim-ì tùi-thāi A-hap-ke, lí ê kiáⁿ-sun beh sòa-chiap lí chòe Í-sek-lia̍t ê ông kàu tē-sì tāi.”

³¹ M̄-kú Iâ-hō͘ bô choan-sim chun-siú Siōng Chú — Í-sek-lia̍t ê Siōng-tè ê lu̍t-hoat, kap Iâ-lô-pho-an kâng-khoán, hō͘ Í-sek-lia̍t-lâng hām-lo̍h chōe.

Iâ-hō͘ Sí

³² Hit-sî, Siōng Chú hō͘ Í-sek-lia̍t-kok khai-sí soe-bî; Sū-lī-a-ông Hap-sih phah-pāi Í-sek-lia̍t,

³³ chiàm-léng Iok-tàn-hô tang-pêng Ki-lia̍t choân-tōe, tùi A-lūn Soaⁿ-kok hù-kūn ê A-lô-ní khí, kàu Ki-lia̍t kap Pa-san, chiū-sī Ka-tek-lâng, Lū-piān-lâng, Má-ná-se-lâng ê tōe-khu.

³⁴ Iâ-hō͘ kî-tha ê sū-chek, i ê só͘-chòe, kap i ê sêng-chiū, lóng kì-chài tī Í-sek-lia̍t Lia̍t-ông-sú.

³⁵ Iâ-hō͘ tńg-khì i ê lia̍t-chó͘ hia liáu-āu, an-chòng tī Sat-má-lī-a. I ê kiáⁿ Iok-hap-su sòa-chiap i choh-ông.

³⁶ Iâ-hō͘ tī Sat-má-lī-a chòe Í-sek-lia̍t-ông chóng-kiōng jī-cha̍p-poeh nî.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan