Bìoball air-loidhne

列王紀上卷 9 - 現代台語譯本羅馬字版

Siōng Chú koh tùi Só͘-lô-bûn Hián-hiān
( 2 Tāi 7.11-22 )

¹ Só͘-lô-bûn oân-sêng Siōng Chú ê sèng-tiān, ông-kiong, kap i só͘ ài khí ê kiàn-tio̍k liáu-āu,

² Siōng Chú tē-jī piàn tùi Só͘-lô-bûn hián-hiān, chhin-chhiūⁿ í-chêng tī Ki-piàn tùi i hián-hiān kâng-khoán.

³ Siōng Chú tùi i kóng, “Lí tī góa ê bīn-chêng kî-tó khún-kiû--ê, góa lóng ū thiaⁿ--tio̍h. Góa í-keng chiong lí só͘ khí chit-keng tiān hun-pia̍t-choh-sèng, chòe éng-oán kèng-pài góa ê só͘-chāi. Góa ê ba̍k-chiu, góa ê sim mā beh put-sî tī hia.

⁴ Lí nā chhin-chhiūⁿ lí ê lāu-pē Tāi-pi̍t, tī góa ê bīn-chêng sim sûn-choân, só͘-kiâⁿ-só͘-chòe chèng-ti̍t, chun-thàn góa ê kài-bēng, chip-siú góa ê kui-lē kap bēng-lēng,

⁵ góa chiū beh kian-kò͘ lí tī Í-sek-lia̍t-kok ê ông-ūi kàu éng-oán; chhin-chhiūⁿ góa ū èng-ún lí ê lāu-pē Tāi-pi̍t kóng, ‘Lí ê hō͘-tāi ōe chē Í-sek-lia̍t ê ông-ūi éng bô tn̄g.’

⁶ Lín kap lín ê kiáⁿ-sun nā oa̍t-cháu lī-khui góa, bô chip-siú góa pan-pò͘ hō͘ lín ê kài-bēng kap kui-lē, khì ho̍k-sāi kèng-pài pa̍t-ê sîn-bêng,

⁷ góa chiū beh chiong Í-sek-lia̍t-lâng tùi góa siúⁿ-sù in ê tōe kā in siau-bia̍t, mā beh khì-sak chit-keng hun-pia̍t-choh-sèng ēng lâi kèng-pài góa ê tiān, hō͘ Í-sek-lia̍t-lâng tī bān-kok tiong chòe chhiàu-tâm, siū lâng thí-chhiò.

⁸ Chit-keng sèng-tiān hiān-chāi sui-jiân tông-hông, kàu hit-sî, keng-kè ê lâng ōe tio̍h-kiaⁿ thí-chhiò, kóng, ‘Siōng Chú ná ōe án-ni tùi-thāi chit-ê tōe kap chit-keng tiān?’

⁹ Ū lâng ōe ìn kóng, ‘Sī in-ūi in khì-sak chhōa in ê lia̍t-chó͘ chhut Ai-ki̍p-tōe ê Siōng Chú — in ê Siōng-tè, khì sìn-hōng pa̍t-ê sîn-bêng, kèng-pài ho̍k-sāi in, só͘-í Siōng Chú hō͘ chiah-ê it-chhè ê chai-hō lîm-kàu in.’”

Só͘-lô-bûn kap Hi-lân ê Hia̍p-iok
( 2 Tāi 8.1-2 )

¹⁰ Só͘-lô-bûn ēng jī-cha̍p nî khí Siōng Chú ê sèng-tiān kap ông-kiong, chit nn̄g keng oân-kang ê sî,

¹¹ Só͘-lô-bûn-ông chiong Ka-lī-lī-tōe jī-cha̍p ê siâⁿ hō͘ Thài-ní-ông Hi-lân; in-ūi Hi-lân ū chiàu Só͘-lô-bûn ê chhéng-kiû, ēng pek-hiuⁿ-chhâ, siông-chhiū-chhâ, kap kim hō͘ i.

¹² Hi-lân tùi Thài-ní chhut--lâi, khì khòaⁿ Só͘-lô-bûn hō͘ i ê siâⁿ, khòaⁿ-liáu bô kah-ì,

¹³ chiū kóng, “Góa ê hiaⁿ-tī, lí hō͘ góa chit-khoán ê siâⁿ o͘h?” I chiū kiò hiah-ê siâⁿ chòe Ka-pō͘-le̍k-tōe, kàu kin-á-ji̍t.

¹⁴ Hi-lân bat sàng kim tāi-iok sì-chheng kong-kun hō͘ Só͘-lô-bûn-ông.

Só͘-lô-bûn Kî-tha ê Sū-chek
( 2 Tāi 8.3-18 )

¹⁵ Só͘-lô-bûn-ông phài kiông-chè-lô-kang khí-chō Siōng Chú ê sèng-tiān, ka-kī ê ông-kiong, Bí-lô, Iâ-lō͘-sat-léng ê siâⁿ-chhiûⁿ, kap Hā-só, Bí-kiat-to, í-ki̍p Ki-sek chiah-ê siâⁿ.

¹⁶ (Chá-chêng Ai-ki̍p-ông Hoat-ló chiūⁿ-lâi kong-chhú Ki-sek, pàng-hé sio siâⁿ, thâi-sí siâⁿ-lāi ê Ka-lâm-lâng, chiong siâⁿ hō͘ i ê cha-bó͘-kiáⁿ, Só͘-lô-bûn ê bó͘, chòe kè-chng.)

¹⁷ Só͘-lô-bûn tiông-kiàn Ki-sek, Ē Pek Hô-lûn;

¹⁸ Pa-la, kap Iû-tāi khòng-iá ê Ta̍t-bo̍k.

¹⁹ Só͘-lô-bûn mā khí-chō chin chōe siâⁿ, tún-chek kun-iōng-phín, chiàn-chhia kap chiàn-bé; koh tī Iâ-lō͘-sat-léng, Lê-pa-lūn, kap i tī-lí ê choân-tōe, khí-chō i só͘ ài khí ê kiàn-tio̍k.

²⁰ Só͘-ū tòa tī kéng-lāi ê A-mô͘-lī-lâng, Hek-lâng, Pí-lī-sé-lâng, Hi-bī-lâng, Iâ-pò͘-su-lâng chhun--lo̍h-lâi ê hō͘-tāi, m̄-sī sio̍k tī Í-sek-lia̍t,

²¹ bô hō͘ Í-sek-lia̍t-lâng siau-bia̍t--ê, Só͘-lô-bûn kiông-chè in chòe khó͘-kang, kàu kin-á-ji̍t.

²² M̄-kú Só͘-lô-bûn bô hō͘ Í-sek-lia̍t-lâng chòe lô͘-lē; hō͘ in chòe i ê chiàn-sū, jîn-sîn, siú-léng, kun-tiúⁿ, chiàn-chhia-tiúⁿ, bé-peng-tiúⁿ.

²³ Só͘-lô-bûn ê tok-kang ū gō͘-pah gō͘-cha̍p lâng, koán-lí choh-kang ê lâng.

²⁴ Hoat-ló ê cha-bó͘-kiáⁿ tùi Tāi-pi̍t-siâⁿ poaⁿ ji̍p-khì Só͘-lô-bûn ūi-tio̍h i khí ê kiong-tiān. Só͘-lô-bûn koh khí Bí-lô.

²⁵ Só͘-lô-bûn ta̍k-nî saⁿ piàn tī i ūi Siōng Chú khí ê chè-tôaⁿ hiàn sio-hòa-chè kap pêng-an-chè; koh tī Siōng Chú ê bīn-chêng sio-hiuⁿ. Án-ni, i oân-sêng khí-chō sèng-tiān ê kang-thêng.

²⁶ Só͘-lô-bûn-ông tī Í-tong tōe-khu ê Âng-hái hái-piⁿ, óa-kūn Í-lo̍k ê Í-sûn Ka-pia̍t chō chûn.

²⁷ Hi-lân phài i ê pō͘-hā, chiū-sī keng-giām hong-hù ê chûn-oân, kap Só͘-lô-bûn ê pō͘-hā chòe-hé kiâⁿ-chûn.

²⁸ In khì Gô-hui, tùi hia ūn-sàng kim chi̍t-bān sì-chheng kong-kun kàu Só͘-lô-bûn-ông hia.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan