Bìoball air-loidhne

列王紀上卷 8 - 現代台語譯本羅馬字版

Gêng-chiap Iok-kūi Ji̍p Sèng-tiān
( 2 Tāi 5.2-6.2 )

¹ Hit-sî, Só͘-lô-bûn tiàu-chi̍p Í-sek-lia̍t ê tiúⁿ-ló, ta̍k chi-cho̍k ê siú-léng, í-ki̍p ta̍k chong-cho̍k ê cho̍k-tiúⁿ lâi Iâ-lō͘-sat-léng, beh gêng-chiap Siōng Chú ê iok-kūi, tùi Sek-an ê Tāi-pi̍t-siâⁿ ūn khí-lâi sèng-tiān.

² Í-tha-liām-ge̍h, chiū-sī chhit--ge̍h, Tah-liâu-choeh ê sî, Í-sek-lia̍t-lâng lóng chū-chi̍p tī Só͘-lô-bûn-ông hia.

³ Í-sek-lia̍t ê tiúⁿ-ló lóng lâi, hiah-ê chè-si chiū kng iok-kūi khí--lâi.

⁴ Chè-si kap Lī-bī-lâng chiong Siōng Chú ê iok-kūi, hōe-bō͘, í-ki̍p pò͘-pîⁿ lāi it-chhè sèng ê khì-khū kng-ji̍p sèng-tiān.

⁵ Só͘-lô-bûn-ông kap chū-chi̍p tī i hia ê Í-sek-lia̍t choân hōe-chiòng, tī iok-kūi chêng hiàn gû, iûⁿ chòe chè-mi̍h, chè-mi̍h chōe kah bōe-sǹg--tit.

⁶ Chè-si kng Siōng Chú ê iok-kūi ji̍p lōe-tiān, chiū-sī Chì-sèng-só͘, hē tī chí-tēng ê só͘-chāi, thiⁿ-sài ki-lō͘-pek si̍t-kó͘ ē-bīn.

⁷ Ki-lō͘-pek tī hē iok-kūi só͘-chāi ê téng-bīn thí-khui in ê si̍t, jia-khàm iok-kūi kap kng iok-kūi ê kǹg.

⁸ Kǹg chin tn̂g, kǹg-bé tī lōe-tiān chêng ê sèng-só͘ khòaⁿ ōe tio̍h, tùi gōa-bīn chiū bōe-tàng khòaⁿ--tio̍h; kàu kin-á-ji̍t kǹg iáu tī hia.

⁹ Iok-kūi lāi-bīn chí-ū nn̄g tè chio̍h-pán, í-gōa lóng bô pa̍t-hāng mi̍h; chio̍h-pán sī Í-sek-lia̍t-lâng chhut Ai-ki̍p-tōe, Siōng Chú tī Hô-lia̍t-soaⁿ kap in li̍p-iok ê sî Mô͘-se só͘ hē--ê.

¹⁰ Tng chè-si tùi sèng-só͘ chhut--lâi ê sî, ū hûn chhiong-móa Siōng Chú ê tiān,

¹¹ in-ūi án-ni, chè-si bōe-tàng khiā-teh ho̍k-sāi; Siōng Chú ê êng-kng chhiong-móa Siōng Chú ê tiān.

¹² Hit-sî Só͘-lô-bûn kóng, “Siōng Chú bat kóng, I beh tiàm tī ba̍t-hûn ê só͘-chāi.

¹³ Góa í-keng khí chi̍t keng tông-hông ê tiān, chòe lí éng-oán khiā-khí ê só͘-chāi.”

Só͘-lô-bûn tùi Jîn-bîn Kóng-ōe
( 2 Tāi 6.3-11 )

¹⁴ Í-sek-lia̍t hōe-chiòng lóng khiā--teh, Só͘-lô-bûn-ông oa̍t kè-lâi kā in chiok-hok.

¹⁵ I kóng, “Siōng Chú — Í-sek-lia̍t ê Siōng-tè eng-kai tit-tio̍h o-ló! I chhin-chhùi tùi góa ê lāu-pē Tāi-pi̍t èng-ún--ê, lóng chhin-chhiú si̍t-hiān.

¹⁶ Siōng Chú ū kóng, ‘Tùi góa chhōa góa ê chú-bîn Í-sek-lia̍t chhut Ai-ki̍p í-lâi, góa m̄-bat tī Í-sek-lia̍t chèng chi-cho̍k tiong-kan kéng chi̍t ê siâⁿ ūi góa ê miâ khí sèng-tiān; m̄-kú góa ū soán-li̍p Tāi-pi̍t lâi tī-lí góa ê chú-bîn Í-sek-lia̍t.’

¹⁷ “Góa ê lāu-pē Tāi-pi̍t sim-lāi ū ì-sù beh ūi Siōng Chú — Í-sek-lia̍t ê Siōng-tè ê miâ khí sèng-tiān.

¹⁸ Chóng-sī Siōng Chú tùi góa ê lāu-pē Tāi-pi̍t kóng, ‘Lí ū ì-sù beh ūi góa ê miâ khí sèng-tiān, lí chit-ê sim-ì chin hó;

¹⁹ m̄-kú lí m̄-thang khí, lí chhin-siⁿ ê kiáⁿ ōe ūi góa ê miâ khí sèng-tiān.’

²⁰ “Taⁿ Siōng Chú si̍t-hiān I só͘ kóng ê ōe; góa chiàu Siōng Chú ê ōe khí-lâi sòa-chiap góa ê lāu-pē Tāi-pi̍t chē Í-sek-lia̍t ê ông-ūi, koh ūi Siōng Chú — Í-sek-lia̍t Siōng-tè ê miâ khí sèng-tiān.

²¹ Góa mā tī hia ūi iok-kūi chún-pī chi̍t ê só͘-chāi; kūi-lāi ū Siōng Chú ê iok, chiū-sī I chhōa lán ê lia̍t-chó͘ chhut Ai-ki̍p ê sî kap in li̍p ê iok.”

Só͘-lô-bûn ê Kî-tó
( 2 Tāi 6.12-42 )

²² Só͘-lô-bûn tng Í-sek-lia̍t hōe-chiòng ê bīn-chêng, khiā tī Siōng Chú ê chè-tôaⁿ chêng, gia̍h siang-chhiú ǹg thiⁿ, kóng,

²³ “Siōng Chú — Í-sek-lia̍t ê Siōng-tè, thiⁿ-téng tōe-ē bô chi̍t ê sîn-bêng chhin-chhiūⁿ lí; lí tùi hiah-ê it-sim-it-ì sūn-ho̍k lí ê po̍k-jîn siú-iok si chû-ài.

²⁴ Lí ū chip-siú tùi lí ê po̍k-jîn góa ê lāu-pē Tāi-pi̍t ê èng-ún; lí chhin-chhùi èng-ún--ê, kin-á-ji̍t lóng chhin-chhiú si̍t-hiān.

²⁵ Siōng Chú — Í-sek-lia̍t ê Siōng-tè, kiû lí si̍t-hiān tùi lí ê po̍k-jîn góa ê lāu-pē Tāi-pi̍t ê èng-ún; lí ū kóng, ‘Lí ê kiáⁿ-sun nā chhin-chhiūⁿ lí tī góa ê bīn-chêng kín-sīn seng-oa̍h, lí ê hō͘-tāi chiū ōe éng-oán chē Í-sek-lia̍t ê ông-ūi.’

²⁶ Í-sek-lia̍t ê Siōng-tè, lí tùi lí ê po̍k-jîn góa ê lāu-pē Tāi-pi̍t só͘ kóng--ê, kiû lí si̍t-hiān.

²⁷ “Siōng-tè ah, lí kiám chin-chiàⁿ tòa tī tōe-chiūⁿ? Thiⁿ kap thiⁿ-téng ê thiⁿ to bô-kàu thang hō͘ lí tòa, hô-hòng góa só͘ khí chit-keng sèng-tiān?

²⁸ Siōng Chú — góa ê Siōng-tè, kiû lí àⁿ-lo̍h thiaⁿ lí ê po̍k-jîn ê kî-tó khún-kiû, thiaⁿ lí ê po̍k-jîn kin-á-ji̍t tī lí bīn-chêng ê kiû-kiò kî-tó.

²⁹ Goān lí mî-ji̍t khòaⁿ-kò͘ chit-ê sèng-tiān, chiū-sī lí kóng lí beh lîm-chāi ê só͘-chāi. Lí ê po̍k-jîn ǹg chit-ê só͘-chāi kî-tó ê sî, kiû lí thiaⁿ.

³⁰ Lí ê po̍k-jîn kap lí ê chú-bîn Í-sek-lia̍t ǹg chit só͘-chāi kî-tó ê sî, goān lí tī thiⁿ-téng, lí tòa ê só͘-chāi, thiaⁿ goán ê kî-kiû, sià-bián goán.

³¹ “Lâng nā tek-chōe chhù-piⁿ, siū-pek tio̍h chiù-chōa, i lâi chit-keng tiān tī lí ê tôaⁿ-chêng chiù-chōa i sī bû-ko͘--ê,

³² kiû lí tī thiⁿ-téng àⁿ-lo̍h thiaⁿ lâi pān-lí, sím-phòaⁿ lí chiah-ê po̍k-jîn: Tēng pháiⁿ-lâng chòe ū-chōe, chiàu i ê só͘-chòe kā i pò-èng; tēng bû-ko͘--ê chòe bô-chōe, chiàu i ê chèng-ti̍t kā i pò-siúⁿ.

³³ “Lí ê chú-bîn Í-sek-lia̍t nā tek-chōe lí, hō͘ tùi-te̍k phah-pāi, in nā hoán-hóe kui-ǹg lí, soan-jīn lí ê miâ, koh tī chit-keng sèng-tiān tùi lí kî-tó khún-kiû,

³⁴ kiû lí tī thiⁿ-téng àⁿ-lo̍h thiaⁿ, sià-bián lí ê chú-bîn Í-sek-lia̍t ê chōe, hō͘ in tò-lâi lí só͘ siúⁿ-sù in lia̍t-chó͘ ê tōe.

³⁵ “In nā tek-chōe lí, lí kā thiⁿ koaiⁿ-ba̍t bô lo̍h-hō͘; lí hêng-hoa̍t in ê sî, in nā ǹg chit só͘-chāi kî-tó, soan-jīn lí ê miâ, lī-khui in ê chōe-ok,

³⁶ kiû lí tī thiⁿ-téng àⁿ-lo̍h thiaⁿ in ê kî-tó, sià-bián lí ê po̍k-jîn kap lí ê chú-bîn Í-sek-lia̍t ê chōe, kà-sī in kiâⁿ chèng-ti̍t ê lō͘, koh lo̍h-hō͘ tī lí siúⁿ-sù in chòe sán-gia̍p ê tōe.

³⁷ “Chit-ê tōe nā ū ki-hng, un-e̍k, hé-sio-hong, pīⁿ-hāi, chháu-meh, chháu-meh-kong, á-sī tùi-te̍k ûi-khùn in ê siâⁿ, bô-lūn ū sím-mi̍h chai-hō, sím-mi̍h tōa-pīⁿ,

³⁸ lí ê chú-bîn Í-sek-lia̍t tiong nā ū lâng ūi ka-kī ê chai-hō sim kan-khó͘, ǹg chit-ê sèng-tiān gia̍h-chhiú pek-chhiat khún-kiû,

³⁹ kiû lí tī thiⁿ-téng, lí khiā-khí ê só͘-chāi, àⁿ-lo̍h thiaⁿ lâi sià-bián in, pang-chān in; in-ūi lí chai in ê sim, mā chí-ū lí chai sè-kan-lâng ê sim, goān lí chiàu in ta̍k-ê lâng ê kiâⁿ-chòe tùi-thāi in,

⁴⁰ hō͘ in tī lí siúⁿ-sù goán lia̍t-chó͘ ê tōe, chi̍t-sì-lâng kèng-ùi lí.

^41-42 “Nā ū gōa-kok-lâng, m̄-sī sio̍k lí ê chú-bîn Í-sek-lia̍t--ê, in-ūi thiaⁿ-tio̍h lí ê tōa-miâ, tōa koân-lêng ê chok-ûi, kap lí kiù-chō͘ ê chhiú-kut, tùi chin hn̄g ê só͘-chāi lâi, ǹg chit-ê tiān kî-tó,

⁴³ kiû lí tī thiⁿ-téng, lí khiā-khí ê só͘-chāi, thiaⁿ in ê kî-kiû, chiàu gōa-kok-lâng it-chhè tùi lí khún-kiû--ê lâi chòe, hō͘ thiⁿ-ē bān-bîn lóng ōe chhin-chhiūⁿ lí ê chú-bîn Í-sek-lia̍t siâng-khoán, bat lí ê miâ, kèng-ùi lí; koh hō͘ in chai chit-ê sèng-tiān sī kèng-pài kiû-kiò lí ê só͘-chāi.

⁴⁴ “Lí ê chú-bîn hōng lí ê bēng-lēng, bô-lūn chhut-khì sím-mi̍h só͘-chāi kap tùi-te̍k kau-chiàn ê sî, nā ǹg lí só͘ kéng-soán ê siâⁿ, kap góa ūi-tio̍h lí ê miâ khí ê tiān, tùi Siōng Chú kî-tó,

⁴⁵ kiû lí tī thiⁿ-téng thiaⁿ in ê kî-tó khún-kiû, hō͘ in tek-sèng.

⁴⁶ “Sè-kan bô chi̍t ê lâng bô hoān-chōe, m̄-kú lí ê chú-bîn nā tek-chōe lí, lí tùi in siū-khì, chiong in kau hō͘ tùi-te̍k, kā in lia̍h-khì tùi-te̍k ê tōe, bô-lūn hn̄g á-sī kūn,

⁴⁷ in nā tī hō͘ lâng lia̍h--khì ê tōe hôe-sim-tńg-ì, koh tī in siū-lia̍h ê tōe hóe-kái, tùi lí ai-kiû, ‘Goán ū chōe, goán pōe-ge̍k, goán chòe pháiⁿ.’

⁴⁸ In nā tī tùi-te̍k lia̍h in khì ê tōe, choân-sim choân-ì kui-sūn lí, koh ǹg lí siúⁿ-sù in lia̍t-chó͘ ê tōe, kap lí só͘ kéng-soán ê siâⁿ, í-ki̍p góa hōng lí ê miâ khí ê tiān, tùi lí kî-tó,

⁴⁹ kiû lí tī thiⁿ-téng, lí khiā-khí ê só͘-chāi, thiaⁿ in ê kî-tó khún-kiû, chiàu kong-tō tùi-thāi in,

⁵⁰ koh sià-bián hiah-ê tek-chōe lí ê chú-bîn, í-ki̍p in it-chhè ê chōe-kò, hō͘ in tùi lia̍h in ê lâng tit-tio̍h lîn-bín.

⁵¹ In-ūi in sī lí ê chú-bîn, lí ê sán-gia̍p, sī lí tùi Ai-ki̍p, tùi chù-thih ê hé-lô͘ tiong kiù--chhut-lâi--ê.

^52-53 “Chì-koân ê Siōng Chú ah, kiû lí khui ba̍k-chiu khòaⁿ-kò͘; lí ê po̍k-jîn kap lí ê chú-bîn Í-sek-lia̍t bô-lūn sím-mi̍h sî tùi lí khún-kiû, kiû lí thiaⁿ. Lí bat tùi tōe-chiūⁿ bān-bîn ê tiong-kan hun-pia̍t goán ê lia̍t-chó͘ chòe lí ê sán-gia̍p, sī chiàu lí chhōa in chhut Ai-ki̍p ê sî, thong-kè lí ê po̍k-jîn Mô͘-se só͘ èng-ún--ê.”

Só͘-lô-bûn ūi Jîn-bîn Chiok-hok

⁵⁴ Só͘-lô-bûn siang-kha kūi tī Siōng Chú ê tôaⁿ-chêng, gia̍h siang-chhiú ǹg thiⁿ, tùi Siōng Chú kî-tó khún-kiû soah, chiū khí--lâi.

⁵⁵ I khiā--teh, tōa-siaⁿ chiok-hok Í-sek-lia̍t choân hōe-chiòng, kóng,

⁵⁶ “Siōng Chú eng-kai siū chheng-chàn! I ū chiàu èng-ún sù thài-pêng hō͘ I ê chú-bîn Í-sek-lia̍t; I thong-kè I ê po̍k-jîn Mô͘-se só͘ èng-ún un-tián ê ōe, bô chi̍t kù bô si̍t-hiān.

⁵⁷ Goān Siōng Chú — lán ê Siōng-tè kap lán tông-chāi, chhin-chhiūⁿ I kap lán ê lia̍t-chó͘ tông-chāi siâng-khoán. Goān I bô lī-khui lán, bô pàng-sak lán,

⁵⁸ hō͘ lán ê sim kui-ǹg I, chun-hêng I it-chhè ê tō-lō͘, siú I só͘ hō͘ lán lia̍t-chó͘ ê kài-bēng, kui-lē, kap bēng-lēng.

⁵⁹ Goān góa tī Siōng Chú ê bīn-chêng só͘ kî-kiû chiah-ê ōe, mî-ji̍t thàu kàu Siōng Chú — lán ê Siōng-tè bīn-chêng; koh chiàu ta̍k-ji̍t ê su-iàu pang-chān I ê po̍k-jîn kap I ê chú-bîn Í-sek-lia̍t.

⁶⁰ Hō͘ tōe-chiūⁿ bān-bîn chai Siōng Chú í-gōa bô pa̍t-ê Siōng-tè.

⁶¹ Só͘-í lín tio̍h tùi Siōng Chú — lán ê Siōng-tè chûn sûn-choân ê sim, chun-thàn I ê kui-lē, siú I ê kài-bēng, kap kin-á-ji̍t kâng-khoán.”

Hōng-hiàn Sèng-tiān
( 2 Tāi 7.4-10 )

⁶² Ông kap Í-sek-lia̍t jîn-bîn chòe-hé tī Siōng Chú bīn-chêng hiàn-chè.

⁶³ Só͘-lô-bûn ǹg Siōng Chú hiàn pêng-an-chè, gû nn̄g-bān nn̄g-chheng chiah, iûⁿ cha̍p-jī-bān chiah. Án-ni, ông kap Í-sek-lia̍t jîn-bîn ūi-tio̍h Siōng Chú ê tiān kú-hêng hōng-hiàn-lé.

⁶⁴ Hit-ji̍t, ông in-ūi sèng-tiān thâu-chêng ê tâng-tôaⁿ siuⁿ sòe, bô-kàu thang tī hia hiàn sio-hòa-chè, sò͘-chè, kap pêng-an-chè ê iû, chiū chiong Siōng Chú tiān-chêng ê tiâⁿ tiong-ng ê só͘-chāi hun-pia̍t-choh-sèng, tī hia hiàn sio-hòa-chè, sò͘-chè, kap pêng-an-chè ê iû.

⁶⁵ Hit-sî, Só͘-lô-bûn kap Í-sek-lia̍t jîn-bîn tī Siōng Chú — lán ê Siōng-tè bīn-chêng siú-choeh, chhit ji̍t, koh chhit ji̍t, kiōng cha̍p-sì ji̍t; Í-sek-lia̍t jîn-bîn tùi Hap-má ài-kháu kàu Ai-ki̍p ê khoe-kok lâi chham-ka, chiâⁿ-chòe sēng-hóng ê tāi-hōe.

⁶⁶ Choeh-kî soah keh-ji̍t, ông kā jîn-bîn kái-sàn, hō͘ in tò-khì in tau, in chiū kā ông chiok-hok. Jîn-bîn in-ūi Siōng Chú tùi I ê po̍k-jîn Tāi-pi̍t kap I ê chú-bîn Í-sek-lia̍t só͘ siúⁿ-sù it-chhè ê un-hūi, sim-lāi hoaⁿ-hí khoài-lo̍k.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan