Bìoball air-loidhne

列王紀上卷 7 - 現代台語譯本羅馬字版

Só͘-lô-bûn Khí-chō Kiong-tiān

¹ Só͘-lô-bûn khí ka-kī ê kiong-tiān, khí cha̍p-saⁿ nî chiah oân-sêng.

² I koh khí Lê-pa-lūn Lîm-kiong, tn̂g sì-cha̍p-sì kong-chhioh, khoah jī-cha̍p-jī kong-chhioh, koân cha̍p-saⁿ kong-chhioh-pòaⁿ; ū pek-hiuⁿ-chhâ ê thiāu sì chōa, thiāu-téng ū pek-hiuⁿ-chhâ ê niû.

³ Lāi-bīn ū sì-cha̍p-gō͘ ki thiāu, múi-chōa cha̍p-gō͘ ki, téng-bīn ēng pek-hiuⁿ-chhâ khàm--teh.

⁴ Koh ū thang-á-mn̂g saⁿ chōa, thang-á kap thang-á sio-tùi; lóng-chóng ū saⁿ chàn.

⁵ Só͘-ū ê mn̂g kap mn̂g-khiā lóng sī sù-hong; ū thang-á-mn̂g saⁿ chōa, thang-á kap thang-á sio-tùi; saⁿ chàn lóng sī án-ni.

⁶ I koh khí ū thiāu ê tōa-thiaⁿ, tn̂g jī-cha̍p-jī kong-chhioh, khoah cha̍p-saⁿ kong-chhioh-pòaⁿ; thiāu ê thâu-chêng ū cháu-lông, cháu-lông ū ēng thiāu thuh--teh ê thian-pông.

⁷ Koh khí ông-ūi ê thiaⁿ, chiū-sī sím-phòaⁿ-thiaⁿ, ông tī hia sím-phòaⁿ àn-kiāⁿ; chit-ê thiaⁿ ê tōe-pán tùi chit-pêng kàu hit-pêng lóng pho͘ pek-hiuⁿ-chhâ.

⁸ Só͘-lô-bûn tī thiaⁿ āu-bīn ê tiâⁿ khí chi̍t keng ka-kī tòa ê kiong-tiān, khí-chō ê hong-hoat siâng-khoán. Só͘-lô-bûn lēng-gōa ūi i ê bó͘ Hoat-ló ê cha-bó͘-kiáⁿ khí chi̍t keng kap chit-ê thiaⁿ siâng-khoán ê kiong-tiān.

⁹ Chiah-ê kiong-tiān, tùi tōe-ki kàu piah-téng, tùi gōa-bīn kàu tōa-tiâⁿ, lóng sī ēng kùi-tiōng ê chio̍h khí--ê; chiah-ê chio̍h chiàu chhùn-chhioh phah hó, sì-bīn ēng kù-á siu-chéng--kè.

¹⁰ Tōe-ki sī ēng tōa tè kùi-tiōng ê chio̍h, tn̂g ū-ê saⁿ kong-chhioh pòaⁿ, ū-ê sì kong-chhioh.

¹¹ Téng-bīn ū chiàu chhùn-chhioh phah-hó kùi-tiōng ê chio̍h, mā ū pek-hiuⁿ-chhâ.

¹² Tōa-tiâⁿ chiu-ûi ū phah-hó ê chio̍h saⁿ chàn, pek-hiuⁿ-chhâ chi̍t chàn, lóng kap Siōng Chú sèng-tiān ê lāi-tiâⁿ í-ki̍p tiān ê cháu-lông siâng-khoán.

Hō͘-lân ê Kang-chok

¹³ Só͘-lô-bûn-ông phài lâng tùi Thài-ní chhiáⁿ Hō͘-lân lâi.

¹⁴ I sī Ná-hut-tha-lī chi-cho̍k chi̍t ê kóaⁿ-hū ê kiáⁿ; i ê lāu-pē sī Thài-ní-lâng, sī phah-tâng sai-hū. Hō͘-lân chin ū tì-hūi, chhong-bêng, kap ki-su̍t, gâu phah ta̍k-hāng tâng-khì. I lâi Só͘-lô-bûn-ông hia, chòe ông kau-tài i it-chhè ê kang.

Tâng-thiāu
( 2 Tāi 3.15-17 )

¹⁵ Hō͘-lân chù-chō nn̄g ki tâng-thiāu, ta̍k-ki koân poeh kong-chhioh, thiāu ê chiu-ûi gō͘ kong-chhioh saⁿ-cha̍p kong-hun.

¹⁶ Koh ēng tâng chù nn̄g ê thiāu-táu hē tī thiāu-téng; ta̍k-ê thiāu-táu koân nn̄g kong-chhioh jī-cha̍p kong-hun.

¹⁷ Nn̄g ki tâng-thiāu téng-bīn ê thiāu-táu, lóng ū kòa chhit cho͘ chi̍t-ba̍k chi̍t-ba̍k ê bāng-á kap chi̍t-khoân chi̍t-khoân ê liān-á.

¹⁸ Koh chō nn̄g chōa sia̍h-liû ûi tī bāng-á ê chiu-ûi, lâi chng-thāⁿ thiāu-téng ê thiāu-táu; nn̄g pêng thiāu-táu lóng sī án-ni.

¹⁹ Cháu-lông thiāu-téng ê thiāu-táu koân chi̍t kong-chhioh poeh-cha̍p kong-hun, ū khek pek-ha̍p-hoe.

²⁰ Nn̄g pêng tâng-thiāu ê thiāu-táu, óa bāng-á piⁿ phòng-îⁿ ê só͘-chāi, lóng ū sia̍h-liû nn̄g-pah lia̍p ûi--teh.

²¹ I khiā nn̄g ki thiāu tī sèng-tiān ê cháu-lông; chiàⁿ-pêng hit-ki kiò-chòe Ngá-kun, tò-pêng hit-ki kiò-chòe Pho-a-su.

²² Thiāu-téng ū khek pek-ha̍p-hoe; án-ni, chō thiāu ê kang-thêng chiū oân-sêng.

Tâng-hái
( 2 Tāi 4.2-5 )

²³ Hō͘-lân koh chù chi̍t ê îⁿ-hêng ê tâng-hái, chhim nn̄g kong-chhioh jī-cha̍p kong-hun, ti̍t-kèng sì kong-chhioh sì-cha̍p kong-hun, chiu-ûi cha̍p-saⁿ kong-chhioh jī-cha̍p kong-hun.

²⁴ Tâng-hái ê tûn ē-bīn ū pû-á ûi--teh, múi sì-cha̍p-gō͘ kong-hun cha̍p lia̍p, ū nn̄g pâi, sī chù tâng-hái ê sî siâng-sî chù--ê.

²⁵ Tâng-hái an tī cha̍p-jī chiah tâng-gû ê téng-bīn; saⁿ chiah ǹg pak, saⁿ chiah ǹg sai, saⁿ chiah ǹg lâm, saⁿ chiah ǹg tang; gû-bé ǹg lāi-bīn.

²⁶ Tâng-hái ê kāu-tō͘ chhit kong-hun-pòaⁿ; i ê tûn chhin-chhiūⁿ poe ê tûn, hêng chhin-chhiūⁿ pek-ha̍p-hoe; ōe-tàng tóe sì-bān kong-seng.

Tâng-chō

²⁷ Hō͘-lân koh ēng tâng chè-chō cha̍p ê phûn-chō; ta̍k-ê chō tn̂g chi̍t kong-chhioh poeh-cha̍p kong-hun, khoah chi̍t kong-chhioh poeh-cha̍p kong-hun, koân chi̍t kong-chhioh saⁿ-cha̍p kong-hun.

²⁸ Ta̍k-ê chō sì-ûi lóng ū tó͘-pang tàu tī kè--ni̍h.

²⁹ Tó͘-pang ū sai, gû, kap ki-lō͘-pek; sai kap gû ê téng-bīn kap ē-bīn, lóng ū phû--chhut-lâi ê hoe-khoân tiau-khek.

³⁰ Ta̍k-ê chō ū sì ê tâng-lián kap tâng ê chhia-lián-sim; chō ê sì kha lóng ū kè; kè chù tī phûn ê ē-bīn, sì-piⁿ ū hoe-khoân ê tiau-khek.

³¹ Chō tùi lāi-bīn kàu téng-bīn chhim sì-cha̍p-gō͘ kong-hun; i ê chhùi sī îⁿ--ê, ti̍t-kèng la̍k-cha̍p-la̍k kong-hun, koh ū tiau-khek. Chō ê tó͘ sī sù-hong--ê, m̄-sī îⁿ--ê.

³² Sì ê lián tī tó͘ ê ē-bīn; chhia-lián-sim kap chō saⁿ-liân; ta̍k-ê lián koân la̍k-cha̍p-la̍k kong-hun.

³³ Lián ê hêng-chōng chhin-chhiūⁿ chiàn-chhia-lián; i ê chhia-lián-sim, gōa-khoân, chí, kap lāi-khoân, lóng sī chù--ê.

³⁴ Chō ê sì kak ū sì ê kè, kè kap chō liân-chòe chi̍t ê.

³⁵ Chō ê téng-bīn ū îⁿ ê kho͘, koân jī-cha̍p-jī kong-hun; chō ê téng-bīn ū thuh-koáiⁿ kap tó͘-pang, lóng kap chō liân-chòe chi̍t ê;

³⁶ thuh-koáiⁿ kap tó͘-pang téng-bīn ê khang-ūi, ū khek ki-lō͘-pek, sai, kap chang-chhiū; sì-ûi ū khek hoe-khoân.

³⁷ I chiàu kâng-khoán ê choh-hoat chù cha̍p ê chō; chhùn-chhioh, hêng-chōng lóng siâng-khoán.

³⁸ Hō͘-lân koh chō cha̍p ê tâng-phûn, ta̍k-ê phûn ti̍t-kèng chi̍t kong-chhioh poeh-cha̍p kong-hun, thang tóe poeh-pah kong-seng, cha̍p ê phûn-chō ê téng-bīn, múi chi̍t ê chō hē chi̍t ê phûn.

³⁹ Hiah-ê chō, gō͘ ê hē tī sèng-tiān ê lâm-pêng, gō͘ ê hē tī pak-pêng; tâng-hái hē tī sèng-tiān ê tang-lâm-pêng.

Sèng-tiān ê Iōng-khū
( 2 Tāi 4.11-5.1 )

⁴⁰ Hō͘-lân koh chō phûn, thuh-á, kap óaⁿ. Án-ni, Hō͘-lân ūi-tio̍h Só͘-lô-bûn-ông oân-sêng Siōng Chú sèng-tiān it-chhè ê kang:

⁴¹ Nn̄g ki thiāu, thiāu-téng óaⁿ-hêng ê thiāu-táu, khàm óaⁿ-hêng thiāu-táu ê bāng-á;

⁴² sì-pah lia̍p sia̍h-liû, pun-chòe nn̄g pêng, chi̍t pêng nn̄g pâi, an tī nn̄g niá khàm óaⁿ-hêng thiāu-táu ê bāng-á;

⁴³ cha̍p ê phûn-chō kap chō-téng cha̍p ê phûn;

⁴⁴ chi̍t chō tâng-hái, tâng-hái ē-bīn cha̍p-jī chiah gû;

⁴⁵ phûn, thuh-á, kap óaⁿ; í-siōng chiah-ê khì-khū lóng sī Hō͘-lân ūi-tio̍h Só͘-lô-bûn-ông khí Siōng Chú sèng-tiān ēng kng-liāng ê tâng chòe--ê.

⁴⁶ Chiah-ê khì-khū sī ông tī Iok-tàn pêng-goân, ēng So͘-kat kap Sat-la-tàn tiong-kan ê liâm-thô͘ chòe bô͘ chù-chō--ê.

⁴⁷ In-ūi tâng chòe ê khì-khū siuⁿ chōe, Só͘-lô-bûn chiū lóng bô kè chhìn, tâng ê tāng-liōng bô hoat-tō͘ kè-sǹg.

⁴⁸ Só͘-lô-bûn koh chō Siōng Chú tiān-lāi só͘-ū ê khì-khū: Kim-tôaⁿ, pâi hiàn-chè ê piáⁿ ê kim-toh;

⁴⁹ lōe-tiān thâu-chêng ê teng-tâi, chiàⁿ-pêng gō͘ ê, tò-pêng gō͘ ê, lóng ēng sûn-kim chòe; teng-tâi ê hoe, teng, giap-á, mā ēng kim chòe;

⁵⁰ teng-tâi ê poe, teng-sim ê chián-to, pôaⁿ, khǹg hiuⁿ ê phiat-á, kap khǹg hé-thòaⁿ ê phûn sī sûn-kim chòe--ê; siōng lāi-bīn Chì-sèng-só͘ ê mn̂g kap chêng-tiān ê mn̂g ê mn̂g-liú, lóng sī kim--ê.

⁵¹ Án-ni, Só͘-lô-bûn-ông oân-sêng Siōng Chú sèng-tiān it-chhè ê kang. Só͘-lô-bûn chiong i ê lāu-pē Tāi-pi̍t só͘ hiàn ê kim, gûn, kap khì-khū lóng tòa ji̍p-khì hē tī Siōng Chú sèng-tiān ê hú-khò͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan