Bìoball air-loidhne

列王紀上卷 6 - 現代台語譯本羅馬字版

Só͘-lô-bûn Khí-chō Sèng-tiān
( 2 Tāi 3.2-4 )

¹ Í-sek-lia̍t-lâng chhut Ai-ki̍p liáu-āu sì-pah poeh-cha̍p nî, Só͘-lô-bûn chòe Í-sek-lia̍t-ông tē-sì nî jī--ge̍h, chiū-sī Se-hut-ge̍h, i tāng-kang khí-chō Siōng Chú ê sèng-tiān.

² Só͘-lô-bûn-ông ūi Siōng Chú khí ê tiān, tn̂g jī-cha̍p-chhit kong-chhioh, khoah káu kong-chhioh, koân cha̍p-saⁿ kong-chhioh-pòaⁿ.

³ Tiān-chêng ê cháu-lông chhim sì kong-chhioh-pòaⁿ, khoah káu kong-chhioh, kap tiān pîⁿ khoah.

⁴ I ūi-tio̍h sèng-tiān chòe lāi-bīn khoah gōa-bīn oe̍h ê thang-á.

⁵ I tī óa sèng-tiān, pau-koat chêng-tiān kap lōe-tiān ê gōa-piah sì-ûi khí siuⁿ-pâng;

⁶ tē-it chàn khoah nn̄g kong-chhioh jī-cha̍p kong-hun, tē-jī chàn khoah nn̄g kong-chhioh chhit-cha̍p kong-hun, tē-saⁿ chàn khoah saⁿ kong-chhioh cha̍p kong-hun; tī sèng-tiān ê gōa-piah sì-ûi koh chòe png-chhiûⁿ, chiah bián hō͘ îⁿ-á chhah-ji̍p tiān ê piah.

⁷ Khí-chō sèng-tiān ê chio̍h-châi í-keng lóng tī chio̍h-tiûⁿ phah hó, só͘-í khí-chō ê sî chiū bô thûi, pó͘-thâu, kap ta̍k-chióng thih-khì ê siaⁿ.

⁸ Siuⁿ-pâng tē-it chàn ê ji̍p-kháu tī sèng-tiān ê lâm-pêng; tùi tē-it chàn ū kńg-lê-thui chiūⁿ tē-jī chàn, tùi tē-jī chàn chiūⁿ kàu tē-saⁿ chàn.

⁹ I ēng pek-hiuⁿ-chhâ chòe niû, ēng pek-hiuⁿ-chhâ-pán chòe chhù-téng; án-ni, sèng-tiān chiū khí-hó.

¹⁰ Óa sèng-tiān ê piah khí ê siuⁿ-pâng, ta̍k-chàn koân nn̄g kong-chhioh jī-cha̍p kong-hun; pek-hiuⁿ-chhâ ê niû lóng khòa tī tiān ê png-chhiûⁿ.

¹¹ Siōng Chú tùi Só͘-lô-bûn kóng,

¹² “Koan-hē lí só͘ khí chit-keng sèng-tiān, lí nā chhiat-si̍t chun-hêng góa ê kui-lē, bēng-lēng, kap kài-bēng, góa chiū beh tùi lí si̍t-hiān góa èng-ún lí ê lāu-pē Tāi-pi̍t ê ōe.

¹³ Góa beh tiàm tī Í-sek-lia̍t-lâng ê tiong-kan, it-tēng bōe pàng-sak góa ê chú-bîn Í-sek-lia̍t.”

Sèng-tiān Lōe-pō͘ ê Siat-pī
( 2 Tāi 3.8-14 )

¹⁴ Só͘-lô-bûn oân-sêng khí-chō sèng-tiān ê kang-chok.

¹⁵ I ēng pek-hiuⁿ-chhâ-pán tah sèng-tiān lāi-bīn ê piah, tùi thô͘-kha kàu piah-téng; koh ēng siông-chhiū-pán pho͘ tiān ê thô͘-kha.

¹⁶ Koh tī tiān lāi-bīn ê āu-pêng keh chi̍t keng lōe-tiān chòe Chì-sèng-só͘, tn̂g káu kong-chhioh; tùi thô͘-kha kàu piah-téng ēng pek-hiuⁿ-chhâ-pán keh--khí-lâi.

¹⁷ Chêng-tiān tn̂g cha̍p-poeh kong-chhioh.

¹⁸ Sèng-tiān lāi-bīn ê pek-hiuⁿ-chhâ-pán lóng ū khek pû-á kap hoe-lúi; tiān-lāi lóng ēng pek-hiuⁿ-chhâ pau--teh, liân chi̍t tè chio̍h-thâu to khòaⁿ bōe tio̍h.

¹⁹ Lōe-tiān chún-pī beh an-tì Siōng Chú ê iok-kūi.

²⁰ Lōe-tiān, tn̂g, khoah, koân lóng káu kong-chhioh, lāi-bīn tah sûn-kim; hiuⁿ-tôaⁿ ēng pek-hiuⁿ-chhâ khàm--teh.

²¹ Só͘-lô-bûn ēng sûn-kim tah sèng-tiān ê lōe-pō͘, mā ēng sûn-kim tah lōe-tiān ê ji̍p-kháu, koh khan kim-liān-á.

²² Sèng-tiān ê lōe-pō͘ kap lōe-tiān chêng ê hiuⁿ-tôaⁿ lóng tah kim, kàu kui-keng sèng-tiān lóng tah móa.

Chō Nn̄g Ê Ki-lō͘-pek

^23-26 Tī lōe-tiān ê lāi-bīn, Só͘-lô-bûn ēng kaⁿ-ná-chhâ chō nn̄g ê thiⁿ-sài ki-lō͘-pek, ta̍k-ê koân sì kong-chhioh sì-cha̍p kong-hun. Ki-lō͘-pek nn̄g pêng ê si̍t ta̍k-pêng tn̂g nn̄g kong-chhioh jī-cha̍p kong-hun; tùi chit-pêng ê si̍t-bé kàu hit-pêng ê si̍t-bé, iok sì kong-chhioh sì-cha̍p kong-hun. Lēng-gōa chi̍t ê ki-lō͘-pek mā siâng-khoán.

²⁷ I chiong ki-lō͘-pek hē tī lōe-tiān ê lāi-bīn; ki-lō͘-pek ê si̍t thí-khui, tē-it ê ki-lō͘-pek chi̍t pêng ê si̍t tú-tio̍h chit-pêng ê piah, tē-jī ê chi̍t pêng ê si̍t tú-tio̍h hit-pêng ê piah; in lēng-gōa nn̄g ki si̍t tī tiān ê tiong-ng sio-kha̍p.

²⁸ I koh ēng kim tah hiah-ê ki-lō͘-pek.

Sèng-tiān ê Chng-thāⁿ

²⁹ Sèng-tiān ê chêng-tiān kap lōe-tiān sì-ûi ê piah, lóng ū khek ki-lō͘-pek, chang-chhiū, kap hoe-lúi ê hêng-chōng.

³⁰ Chêng-tiān kap lōe-tiān ê tōe-pán lóng tah kim.

³¹ Só͘-lô-bûn koh ēng kaⁿ-ná-chhâ chòe ji̍p lōe-tiān ê mn̂g; mn̂g-bâi kap mn̂g-khiā lóng sī gō͘-kak-hêng ê thiāu.

³² Tī ēng kaⁿ-ná-chhâ chō ê nn̄g ê mn̂g-sìⁿ khek ki-lō͘-pek, chang-chhiū, kap hoe-lúi, lóng tah kim; koh ēng kim siuⁿ tī ki-lō͘-pek kap chang-chhiū téng-bīn.

³³ Koh tī chêng-tiān ê ji̍p-kháu ēng kaⁿ-ná-chhâ chòe sì-kak-hêng ê mn̂g-khiā.

³⁴ Ēng siông-chhiū-chhâ chòe siang-pêng ê mn̂g-sìⁿ; nn̄g pêng ê mn̂g-sìⁿ kok ū nn̄g phìⁿ, ōe-áu--tit;

³⁵ téng-bīn khek ki-lō͘-pek, chang-chhiū, kap hoe-lúi, lóng tah kim; koh chiong kim phah-pîⁿ, siuⁿ tī tiau-khek-bu̍t ê téng-bīn.

³⁶ I koh ēng phah-hó ê chio̍h saⁿ pâi kap pek-hiuⁿ-chhâ chi̍t pâi lâi khí lāi-tiâⁿ.

³⁷ Só͘-lô-bûn choh-ông tē-sì nî jī--ge̍h, chiū-sī Se-hut-ge̍h, hē Siōng Chú sèng-tiān ê tōe-ki.

³⁸ Kàu cha̍p-it nî poeh--ge̍h, chiū-sī Pò͘-le̍k-ge̍h, sèng-tiān só͘-ū ê kang-thêng lóng chiàu kè-ōe oân-sêng; khí-chō kiōng chhit nî kú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan