Bìoball air-loidhne

列王紀上卷 3 - 現代台語譯本羅馬字版

Só͘-lô-bûn ê Kî-tó
( 2 Tāi 1.3-12 )

¹ Só͘-lô-bûn kap Ai-ki̍p-ông Hoat-ló kiat-chhin, chhōa Hoat-ló ê cha-bó͘-kiáⁿ chòe bó͘; tī i ka-kī ê kiong-tiān, Siōng Chú ê sèng-tiān, kap Iâ-lō͘-sat-léng sì-ûi ê siâⁿ-chhiûⁿ iáu-bē khí-hó í-chêng, i hō͘ Hoat-ló ê cha-bó͘-kiáⁿ tòa tī Tāi-pi̍t-siâⁿ.

² Tng-sî iáu-bē ūi-tio̍h Siōng Chú ê miâ khí sèng-tiān, só͘-í jîn-bîn iáu tī soaⁿ-thâu-tôaⁿ hiàn-chè.

³ Só͘-lô-bûn thiàⁿ Siōng Chú, chun-hêng i ê lāu-pē Tāi-pi̍t ê bēng-lēng, m̄-kú iáu tī soaⁿ-thâu-tôaⁿ hiàn-chè sio-hiuⁿ.

⁴ Só͘-lô-bûn-ông khì Ki-piàn hiàn-chè, in-ūi hia ū siōng-tōa ê soaⁿ-thâu-tôaⁿ; i tī tôaⁿ-téng hiàn chi̍t-chheng chiah cheng-siⁿ chòe sio-hòa-chè.

⁵ Tī Ki-piàn, ū chi̍t mî Siōng Chú tī bîn-bāng tiong tùi Só͘-lô-bûn hián-hiān; Siōng-tè kóng, “Lí ài góa sù lí sím-mi̍h, thang tùi góa kiû.”

⁶ Só͘-lô-bûn ìn kóng, “Lí bat si tōa-un hō͘ lí ê po̍k-jîn, góa ê lāu-pē Tāi-pi̍t, in-ūi i ēng sêng-si̍t, kong-gī, chèng-ti̍t ê sim tī lí ê bīn-chêng seng-oa̍h. Lí koh siúⁿ-sù i put-piàn ê thiàⁿ, chiū-sī siúⁿ-sù i chi̍t ê kiáⁿ chē i ê ūi, tú chhin-chhiūⁿ kin-á-ji̍t án-ni.

⁷ Siōng Chú — góa ê Siōng-tè, taⁿ lí hō͘ lí ê po̍k-jîn sòa-chiap góa ê lāu-pē Tāi-pi̍t choh-ông; m̄-kú góa iáu siàu-liân, m̄ chai tio̍h án-chóaⁿ tī-lí kok-ka.

⁸ Lí ê po̍k-jîn tòa tī lí só͘ kéng-soán ê chú-bîn tiong-kan, chiah-ê jîn-bîn chōe kàu bōe-sǹg--tit, mā sǹg bōe liáu.

⁹ Só͘-í, kiû lí sù lí ê po̍k-jîn bêng-piān ê sim, thang phòaⁿ-toàn sī-hui tī-lí lí ê chú-bîn; nā m̄-sī án-ni, siáⁿ-lâng ōe-tàng tī-lí lí chiah chōe ê jîn-bîn?”

¹⁰ Chú chin hoaⁿ-hí Só͘-lô-bûn án-ni kiû.

¹¹ Siōng-tè tùi i kóng, “Lí kì-jiân án-ni kiû, bô ūi ka-kī kiû tn̂g-hè-siū, bô kiû hó-gia̍h, mā bô kiû siau-bia̍t lí tùi-te̍k ê sìⁿ-miā, chí-ū kiû bêng-piān ê sim, ōe-hiáu hun-pia̍t sī-hui kong-chèng tī-lí.

¹² Taⁿ, góa chiàu lí só͘ kiû--ê hō͘ lí. Góa siúⁿ-sù lí chhong-bêng tì-hūi ê sim; tī lí í-chêng bô lâng chhin-chhiūⁿ lí, tī lí í-āu mā bô lâng ōe chhin-chhiūⁿ lí.

¹³ Lí bô kiû--ê, góa mā beh hō͘ lí, chiū-sī hù-chiok, chun-êng; hō͘ lí tī sè-kan ê ji̍t-chí, bô chi̍t ê ông ōe-tàng kap lí pí.

¹⁴ Lí nā kiâⁿ góa ê tō-lō͘, chun-siú góa ê kui-lē kap kài-bēng, o̍h lí ê lāu-pē Tāi-pi̍t ê só͘-chòe, góa chiū beh hō͘ lí tn̂g-hè-siū.”

¹⁵ Só͘-lô-bûn khùn-chhíⁿ, chai sī Siōng Chú tī bîn-bāng tiong tùi i kóng-ōe, chiū khì Iâ-lō͘-sat-léng khiā tī Siōng Chú ê iok-kūi chêng, hiàn sio-hòa-chè kap pêng-an-chè; koh pān iàn-se̍k chhiáⁿ i ê jîn-sîn.

Só͘-lô-bûn Chhong-bêng ê Phòaⁿ-toàn

¹⁶ Ū chi̍t ji̍t, nn̄g ê ki-lú lâi ông hia, khiā tī ông ê bīn-chêng.

¹⁷ Chi̍t ê hū-jîn-lâng kóng, “Góa ê chú ah, góa kap chit-ê hū-jîn-lâng tòa kâng keng chhù; góa siⁿ-kiáⁿ ê sî, i mā tī chhù-lāi.

¹⁸ Góa siⁿ liáu tē-saⁿ ji̍t, chit-ê hū-jîn-lâng mā siⁿ-kiáⁿ; goán nn̄g lâng í-gōa, bô pa̍t-lâng kap goán chòe-hé tòa.

¹⁹ Mî--sî, chit-ê hū-jîn-lâng teh khùn ê sî kā i ê kiáⁿ teh--sí.

²⁰ I pòaⁿ-mî khí--lâi, thàn lí ê lú-pī teh khùn, tùi góa ê sin-piⁿ kā góa ê hāu-siⁿ phō-khì hē tī i ê heng-chêng, chiong i sí--khì ê hāu-siⁿ hē tī góa ê heng-chêng.

²¹ Thiⁿ kng, góa khí-lâi beh hō͘ góa ê hāu-siⁿ chia̍h-lin; bô phah-sǹg, gín-á í-keng sí; góa siông-sè khòaⁿ, hoat-kiàn m̄-sī góa siⁿ ê kiáⁿ.”

²² Lēng-gōa hit-ê hū-jîn-lâng kóng, “M̄-sī, oa̍h--ê sī góa ê kiáⁿ, sí--ê chiah sī lí ê.” Tē-it ê hū-jîn-lâng kóng, “Bô, sí--ê sī lí ê kiáⁿ, oa̍h--ê sī góa ê.” In tī ông ê bīn-chêng án-ni saⁿ-chìⁿ.

²³ Ông kóng, “Chit-ê hū-jîn-lâng kóng, ‘Oa̍h ê kiáⁿ sī góa ê, sí--ê sī lí ê.’ Hit-ê hū-jîn-lâng kóng, ‘Bô, sí ê kiáⁿ sī lí ê, oa̍h--ê sī góa ê.’”

²⁴ Ông koh kóng, “Kā góa gia̍h to lâi.” Sī-ōe chiū gia̍h to lâi ông ê bīn-chêng.

²⁵ Ông kóng, “Chiong oa̍h ê gín-á phòa chòe nn̄g pêng, chi̍t pêng hō͘ hit-ê, chi̍t pêng hō͘ chit-ê.”

²⁶ Oa̍h ê gín-á ê lāu-bú ūi-tio̍h thiàⁿ ka-kī ê kiáⁿ, sim chhin-chhiūⁿ hé teh to̍h, chiū tùi ông kóng, “Góa ê chú ah, chiong oa̍h ê gín-á hō͘ hit-ê hū-jîn-lâng, chhian-bān m̄-thang kā i thâi-sí.” Lēng-gōa hit-ê hū-jîn-lâng kóng, “Kā i phòa-khui! Chit-ê gín-á m̄-bián hō͘ i, mā m̄-bián hō͘ góa.”

²⁷ Ông chiū hā-lēng, “M̄-thang thâi! Chiong oa̍h ê gín-á hō͘ tē-it ê hū-jîn-lâng, in-ūi i chiah sī gín-á ê lāu-bú.”

²⁸ Choân Í-sek-lia̍t jîn-bîn thiaⁿ-tio̍h ông ê phòaⁿ-koat, chiū lóng kèng-ùi i, in-ūi in khòaⁿ-kìⁿ i phòaⁿ-toàn ê sî ū tùi Siōng-tè lâi ê tì-hūi.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan