Bìoball air-loidhne

« Roimhe

Air adhart »

列王紀上卷 22 - 現代台語譯本羅馬字版

Bí-kai-ngá Kéng-kò A-hap
( 2 Tāi 18.2-27 )

¹ Í-sek-lia̍t kap Sū-lī-a saⁿ nî kú bô kau-chiàn.

² Kàu tē-saⁿ nî, Iû-tāi-ông Iok-sa-hoat lo̍h-khì Í-sek-lia̍t-ông hia.

³ Í-sek-lia̍t-ông tùi i ê jîn-sîn kóng, “Ki-lia̍t ê La-boa̍t sī lán ê, lín chai--bô? Lán ná bô beh chhái-chhú hêng-tōng, tùi Sū-lī-a-ông ê chhiú the̍h--tò-lâi?”

⁴ A-hap tùi Iok-sa-hoat kóng, “Lí beh kap góa chòe-hé khì kong-táⁿ Ki-lia̍t ê La-boa̍t--bô?” Iok-sa-hoat tùi Í-sek-lia̍t-ông kóng, “Góa ê chiū-sī lí ê, góa ê jîn-bîn chiū-sī lí ê jîn-bîn, góa ê bé chiū-sī lí ê bé.”

⁵ Iok-sa-hoat koh tùi Í-sek-lia̍t-ông kóng, “Chhiáⁿ lí seng mn̄g Siōng Chú ê ì-sù.”

⁶ Í-sek-lia̍t-ông chiū tiàu-chi̍p sian-ti tāi-iok sì-pah lâng, mn̄g in kóng, “Góa thang khì kong-táⁿ Ki-lia̍t ê La-boa̍t, á-sī m̄-thang?” In ìn kóng, “Thang khì kong-táⁿ; Chú beh chiong chit-ê siâⁿ kau tī ông ê chhiú.”

⁷ Iok-sa-hoat kóng, “Chia kiám bô koh ū Siōng Chú ê sian-ti hō͘ lán thang mn̄g?”

⁸ Í-sek-lia̍t-ông kā Iok-sa-hoat kóng, “Iáu ū chi̍t ê lâng, sī Im-la ê kiáⁿ Bí-kai-ngá, lán thang tùi i chhéng-būn Siōng Chú; m̄-kú góa oàn-hūn i, in-ūi i tùi góa kóng ê ū-giân bô chi̍t hāng hó, chí-ū kóng chai-hō.” Iok-sa-hoat kóng, “Chhiáⁿ ông m̄-thang án-ni kóng.”

⁹ Í-sek-lia̍t-ông chiū tiàu chi̍t ê koaⁿ-oân lâi, kóng, “Lí kóaⁿ-kín khì kiò Im-la ê kiáⁿ Bí-kai-ngá lâi.”

¹⁰ Í-sek-lia̍t-ông kap Iû-tāi-ông Iok-sa-hoat tī Sat-má-lī-a siâⁿ-mn̂g-kháu ê ngó͘-kok-tiûⁿ, chhēng lé-ho̍k, chē tī in ê pó-chō; só͘-ū ê sian-ti lóng tī in ê bīn-chêng kóng ū-giân.

¹¹ Ki-ná-ná ê kiáⁿ Se-tí-ka chòe thih ê kak, kóng, “Siōng Chú án-ni kóng, ‘Lí beh ēng chiah-ê thih-kak tak Sū-lī-a-lâng, tak kah in lóng siau-bia̍t.’”

¹² Só͘-ū ê sian-ti lóng án-ni ū-giân kóng, “Thang khì kong-táⁿ Ki-lia̍t ê La-boa̍t, it-tēng tek-sèng, Siōng Chú beh chiong chit-ê siâⁿ kau tī ông ê chhiú.”

¹³ Hit-ê khì kiò Bí-kai-ngá ê sù-chiá kā i kóng, “Lí khòaⁿ, só͘-ū ê sian-ti lóng tùi ông kóng hó-ōe, chhiáⁿ lí mā kap in siâng-khoán kóng hó-ōe.”

¹⁴ Bí-kai-ngá kóng, “Góa kí éng-oa̍h ê Siōng Chú chiù-chōa, Siōng Chú tùi góa kóng sím-mi̍h, góa chiū tùi ông kóng sím-mi̍h.”

¹⁵ Bí-kai-ngá lâi kàu ông ê bīn-chêng, ông mn̄g i kóng, “Bí-kai-ngá, goán thang khì kong-táⁿ Ki-lia̍t ê La-boa̍t, á-sī m̄-thang?” I ìn kóng, “Hó ah, chòe lí khì kong-táⁿ, it-tēng ōe sèng-lī; Siōng Chú beh chiong chit-ê siâⁿ kau tī ông ê chhiú.”

¹⁶ Ông tùi i kóng, “Góa tio̍h kiò lí chiù-chōa kúi piàn, lí chiah ōe hōng Siōng Chú ê miâ tùi góa kóng si̍t-chāi-ōe?”

¹⁷ Bí-kai-ngá kóng, “Góa khòaⁿ-kìⁿ Í-sek-lia̍t chèng-lâng chhin-chhiūⁿ bô bo̍k-chiá ê iûⁿ sì-sòaⁿ tī soaⁿ--ni̍h; Siōng Chú án-ni kóng, ‘Chiah-ê lâng bô chú-lâng; ta̍k-ê lâng thang pêng-an tò-khì in tau.’”

¹⁸ Í-sek-lia̍t-ông tùi Iok-sa-hoat kóng, “Góa kiám bô kā lí kóng, chit-ê lâng tùi góa kóng ê ū-giân lóng bô hó-ōe, chí-ū kóng chai-hō.”

¹⁹ Bí-kai-ngá kè-sio̍k kóng, “Só͘-í, tio̍h thiaⁿ Siōng Chú ê ōe! Góa khòaⁿ-kìⁿ Siōng Chú chē tī pó-chō, thiⁿ-téng ê bān-kun khiā tī I ê chiàⁿ-pêng tò-pêng.

²⁰ Siōng Chú kóng, ‘Sím-mi̍h-lâng beh ín-iú A-hap, hō͘ i khì Ki-lia̍t ê La-boa̍t, sí tī hia?’ Chit-ê kóng án-ni, hit-ê kóng án-ni.

²¹ Āu-lâi ū chi̍t ê sîn chhut--lâi, khiā tī Siōng Chú ê bīn-chêng, kóng, ‘Góa khì kā i ín-iú.’

²² Siōng Chú mn̄g i kóng, ‘Lí beh án-chóaⁿ kā ín-iú?’ I ìn kóng, ‘Góa beh chhut-khì chòe pe̍h-chha̍t ê sîn, hō͘ hiah-ê sian-ti kóng pe̍h-chha̍t.’ Siōng Chú kóng, ‘Lí kā i ín-iú, it-tēng ōe sêng-kong. Lí khì, chiàu án-ni chòe.’

²³ Hiān-chāi Siōng Chú ū hō͘ pe̍h-chha̍t ê sîn ji̍p tī lí chiah-ê sian-ti ê chhùi; Siōng Chú soan-pò͘ beh kàng chai-hō hō͘ lí.”

²⁴ Ki-ná-ná ê kiáⁿ Se-tí-ka kiâⁿ chìn-chêng, siàn Bí-kai-ngá ê chhùi-phóe, kóng, “Siōng Chú ê sîn sím-mi̍h sî lī-khui góa lâi tùi lí kóng-ōe?”

²⁵ Bí-kai-ngá kóng, “Lí khì bih tī ba̍t-pâng hit-ji̍t chiū ōe chai.”

²⁶ Í-sek-lia̍t-ông kóng, “Chiong Bí-kai-ngá lia̍h--khí-lâi, kau hō͘ chhī-tiúⁿ A-bûn kap ông ê kiáⁿ Iok-a-si,

²⁷ kā in kóng, ‘Ông kau-tài: Chiong chit-ê lâng koaiⁿ-lo̍h kaⁿ, hō͘ i chi̍t-sut-á piáⁿ kap chúi chiū hó, thèng-hāu góa pêng-an tò--lâi.’”

²⁸ Bí-kai-ngá kóng, “Lí nā chin-chiàⁿ pêng-an tò--lâi, chiū-sī Siōng Chú bô thok góa kóng-ōe.” Koh kóng, “Lín tāi-ke, tio̍h ōe-kì-tit góa kóng ê ōe!”

A-hap Chiàn-sí
( 2 Tāi 18.28-34 )

²⁹ Í-sek-lia̍t-ông A-hap kap Iû-tāi-ông Iok-sa-hoat khì chìn-kong Ki-lia̍t ê La-boa̍t.

³⁰ Í-sek-lia̍t-ông tùi Iok-sa-hoat kóng, “Góa beh kái-chong chiūⁿ chiàn-tiûⁿ, lí thang chhēng lí ê ông-ho̍k.” Í-sek-lia̍t-ông chiū kái-chong chiūⁿ-tīn.

³¹ Sū-lī-a-ông ū hoan-hù i saⁿ-cha̍p-jī ê chiàn-chhia-tiúⁿ, kóng, “M̄-thang kap in ê sū-peng á-sī koaⁿ-tiúⁿ kau-chiàn, chí-ū kap Í-sek-lia̍t-ông kau-chiàn.”

³² Chiàn-chhia-tiúⁿ khòaⁿ-tio̍h Iok-sa-hoat chiū kóng, “Chit-ê it-tēng sī Í-sek-lia̍t-ông!” In chiū oat-khì beh kong-kek i. Iok-sa-hoat chiū hoah kiù-miā.

³³ Chiàn-chhia-tiúⁿ chi̍t-ē khòaⁿ-tio̍h i m̄-sī Í-sek-lia̍t-ông, chiū oa̍t-cháu bô koh tui i.

³⁴ Ū chi̍t ê Sū-lī-a ê peng-á khui keng, bô phah-sǹg siā-ji̍p Í-sek-lia̍t-ông chiàn-kah ê kap-chōa. Ông kā sái-chhia--ê kóng, “Góa tio̍h tāng-siong. Kín se̍h hoan-thâu, tòa góa lī-khui chiàn-tiûⁿ.”

³⁵ Hit-ji̍t, kau-chiàn hui-siông béng-lia̍t. Ū lâng hû ông hō͘ i khiā tī chhia--ni̍h, bīn ǹg Sū-lī-a-lâng; kàu hông-hun ông chiū sí, huih tùi tio̍h-siong ê khang-chhùi lâu kàu chhia-tóe.

³⁶ Ji̍t beh lo̍h ê sî, ū siaⁿ thoân-piàn kun-iâⁿ, kóng, “Ta̍k-ê lâng tò-khì ka-kī ê pún-siâⁿ, tò-khì ka-kī ê pún-tōe.”

³⁷ Ông sí, lâng chiong i tòa tò-khì Sat-má-lī-a; in chiong ông an-chòng tī hia.

³⁸ Ū lâng tī Sat-má-lī-a ê chúi-tî piⁿ sóe i ê chhia (chhiong-ki mā tī hia sóe seng-khu), káu lâi chī i ê huih, tú chiàu Siōng Chú só͘ kóng ê ōe.

³⁹ A-hap kî-tha ê sū-chek, kap i ê só͘-chòe, í-ki̍p i khí-chō chhiūⁿ-gê-kiong kap siâⁿ, lóng kì-chài tī Í-sek-lia̍t Lia̍t-ông-sú.

⁴⁰ A-hap tńg-khì i ê lia̍t-chó͘ hia; i ê kiáⁿ A-hap-siā sòa-chiap i choh-ông.

Iû-tāi-ông Iok-sa-hoat
( 2 Tāi 20.31-21.1 )

⁴¹ Í-sek-lia̍t-ông A-hap tē-sì nî, A-sat ê kiáⁿ Iok-sa-hoat chòe Iû-tāi-ông.

⁴² Iok-sa-hoat chē-ūi ê sî saⁿ-cha̍p-gō͘ hè, tī Iâ-lō͘-sat-léng choh-ông jī-cha̍p-gō͘ nî; i ê lāu-bú kiò-chòe A-so͘-pa, sī Sī-lī-hi ê cha-bó͘-kiáⁿ.

⁴³ Iok-sa-hoat kiâⁿ i lāu-pē A-sat ê lō͘, lóng bô phian-lī, chòe Siōng Chú khòaⁿ-chòe hó ê sū; m̄-kú soaⁿ-thâu-tôaⁿ iáu-bē hòe-tû, jîn-bîn iû-goân tī hia hiàn-chè sio-hiuⁿ.

⁴⁴ Iok-sa-hoat kap Í-sek-lia̍t-ông hô-pêng siong-chhù.

⁴⁵ Iok-sa-hoat kî-tha ê sū-chek, i ê sêng-chiū, í-ki̍p án-chóaⁿ kau-chiàn, lóng kì-chài tī Iû-tāi Lia̍t-ông-sú.

⁴⁶ I ê lāu-pē A-sat lâu--lo̍h-lâi ê loân-tông, Iok-sa-hoat lóng tùi kok-lāi tû--khì.

⁴⁷ Hit-sî Í-tong bô ông, Iok-sa-hoat phài chóng-tok tī-lí.

⁴⁸ Iok-sa-hoat chō Tha-si ê chûn-tūi beh khì Gô-hui ūn kim lâi; m̄-kú khì bô sêng, in-ūi chûn tī Í-sûn Ka-pia̍t sit-sū.

⁴⁹ A-hap ê kiáⁿ A-hap-siā tùi Iok-sa-hoat kóng, “Chhiáⁿ hō͘ góa ê pō͘-hā kap lí ê pō͘-hā chē-chûn chòe-hé khì.” M̄-kú Iok-sa-hoat m̄-khéng.

⁵⁰ Iok-sa-hoat tńg-khì i ê lia̍t-chó͘ hia, kap i ê lia̍t-chó͘ an-chòng tī Tāi-pi̍t-siâⁿ; i ê kiáⁿ Iok-lân sòa-chiap i choh-ông.

Í-sek-lia̍t-ông A-hap-siā

⁵¹ Iû-tāi-ông Iok-sa-hoat cha̍p-chhit nî, A-hap ê kiáⁿ A-hap-siā tī Sat-má-lī-a chòe Í-sek-lia̍t-ông, thóng-tī Í-sek-lia̍t nn̄g nî.

⁵² I chòe Siōng Chú khòaⁿ-chòe pháiⁿ ê sū, kiâⁿ i ê lāu-pē kap lāu-bú ê lō͘, chiū-sī kiâⁿ Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t-lâng hām-lo̍h chōe.

⁵³ I kap i ê lāu-pē kâng-khoán ho̍k-sāi kèng-pài Pa-le̍k, kek Siōng Chú — Í-sek-lia̍t ê Siōng-tè siū-khì.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan