Bìoball air-loidhne

列王紀上卷 21 - 現代台語譯本羅馬字版

Ná-pek ê Phû-tô-hn̂g

¹ Āu-lâi koh ū tāi-chì hoat-seng. Iâ-su-lia̍t-lâng Ná-pek tī Iâ-su-lia̍t ū chi̍t khu phû-tô-hn̂g, óa-kūn Sat-má-lī-a-ông A-hap ê ông-kiong.

² A-hap kā Ná-pek kóng, “Lí ê phû-tô-hn̂g hō͘ góa chòe chhài-hn̂g, in-ūi chin kūn góa ê ông-kiong; góa beh ēng koh-khah hó ê hn̂g kā lí ōaⁿ; lí nā ài gûn, góa chiū chiàu kè-chîⁿ kā lí bóe.”

³ Ná-pek kā A-hap kóng, “Siōng Chú bōe ún-chún góa chiong chó͘-sian lâu--lo̍h-lâi ê sán-gia̍p hō͘ lí.”

⁴ A-hap in-ūi Iâ-su-lia̍t-lâng Ná-pek kóng ê ōe, ut-chut bô hoaⁿ-hí, tò-khì ông-kiong; in-ūi Ná-pek ū kóng “Góa bōe-tàng ēng góa ê chó͘-gia̍p hō͘ lí”, A-hap chiū tó tī bîn-chhn̂g, bīn ǹg lāi-bīn, mā m̄ chia̍h.

⁵ Ông-hō͘ Iâ-sé-phek lâi i hia, mn̄g i kóng, “Lí sī-án-chóaⁿ ut-chut m̄ chia̍h-pn̄g?”

⁶ I ìn kóng, “In-ūi góa tùi Iâ-su-lia̍t-lâng Ná-pek kóng, ‘Lí ê phû-tô-hn̂g hō͘ góa, góa ēng gûn kā lí bóe; á-sī lí nā ài, góa chiū ēng phû-tô-hn̂g kap lí ōaⁿ.’ I kóng, ‘Góa ê phû-tô-hn̂g, góa bōe-tàng hō͘ lí.’”

⁷ Ông-hō͘ Iâ-sé-phek kā i kóng, “Lí chit-chūn kiám m̄-sī teh thóng-tī Í-sek-lia̍t-kok? Khí--lâi, hoaⁿ-hoaⁿ-hí-hí lâi chia̍h; góa beh chiong Iâ-su-lia̍t-lâng Ná-pek ê phû-tô-hn̂g hō͘ lí.”

⁸ Iâ-sé-phek ēng A-hap ê miâ siá-phoe, khàm ông ê ìn, kià-phoe hō͘ hiah-ê kap Ná-pek tòa kâng-siâⁿ ê tiúⁿ-ló kap kùi-cho̍k.

⁹ Phoe-lāi siá kóng, “Lín tio̍h soan-pò͘ kìm-chia̍h, hō͘ Ná-pek chē tī jîn-bîn ê thâu-chêng;

¹⁰ koh kiò nn̄g ê húi-lūi chē tī i ê tùi-bīn, choh-chèng kò i kóng, ‘Lí siat-to̍k Siōng-tè kap bú-jio̍k ông.’ Jiân-āu kā i thoa--chhut-khì, ēng chio̍h-thâu tìm-sí.”

¹¹ Hiah-ê kap Ná-pek tòa kâng-siâⁿ ê tiúⁿ-ló kap kùi-cho̍k, chiū chiàu Iâ-sé-phek kià hō͘ in ê phoe só͘ siá--ê khì chòe.

¹² In soan-pò͘ kìm-chia̍h, hō͘ Ná-pek chē tī jîn-bîn ê thâu-chêng.

¹³ Koh kiò nn̄g ê húi-lūi lâi chē tī Ná-pek ê tùi-bīn, tng chèng-lâng ê bīn-chêng choh-chèng kò Ná-pek, kóng, “Ná-pek siat-to̍k Siōng-tè koh bú-jio̍k ông.” Chèng-lâng chiū kā i thoa chhut-khì siâⁿ-gōa, ēng chio̍h-thâu tìm-sí.

¹⁴ Tiúⁿ-ló kap kùi-cho̍k chiū chhe lâng khì kā Iâ-sé-phek kóng, “Ná-pek í-keng hō͘ chio̍h-thâu tìm-sí lah.”

¹⁵ Iâ-sé-phek thiaⁿ-tio̍h Ná-pek hō͘ chio̍h-thâu tìm-sí, chiū kā A-hap kóng, “Lí khì chiap-siu Iâ-su-lia̍t-lâng Ná-pek m̄-khéng bōe hō͘ lí ê phû-tô-hn̂g. I í-keng sí, bô-miā lah.”

¹⁶ A-hap thiaⁿ-tio̍h Ná-pek í-keng sí, chiū khí--lâi, lo̍h-khì beh chiap-siu Iâ-su-lia̍t-lâng Ná-pek ê phû-tô-hn̂g.

¹⁷ Siōng Chú ê ōe lîm-kàu Thê-su-pí-lâng Í-lī-a, kóng,

¹⁸ “Lí khí--lâi, khì kìⁿ tòa tī Sat-má-lī-a ê Í-sek-lia̍t-ông A-hap; i chit-chūn lo̍h-khì Iâ-su-lia̍t beh chiap-siu Ná-pek ê phû-tô-hn̂g.

¹⁹ Lí tio̍h kā i kóng, ‘Siōng Chú án-ni kóng: Lí ū thâi-sí lâng koh chiap-siu i ê sán-gia̍p.’ Koh kā i kóng, ‘Siōng Chú án-ni kóng: Káu tī sím-mi̍h só͘-chāi chī Ná-pek ê huih, mā beh tī hia chī lí ê huih, chiū-sī lí pún-sin ê huih.’”

²⁰ A-hap tùi Í-lī-a kóng, “Góa ê tùi-thâu, lí teh chhē góa sī--bô?” I ìn kóng, “Góa teh chhē lí, in-ūi lí chhut-bōe ka-kī, chòe Siōng Chú khòaⁿ-chòe pháiⁿ ê sū.

²¹ Siōng Chú kóng, ‘Góa beh kàng chai-hō hō͘ lí, beh châu-bia̍t lí; só͘-ū tī Í-sek-lia̍t tiong sio̍k A-hap ê ta-po͘-lâng, bô-lūn chū-iû--ê á-sī bô chū-iû--ê, góa lóng beh kā in siau-bia̍t.

²² Góa beh hō͘ lí ê ke kap Nî-pat ê kiáⁿ Iâ-lô-pho-an ê ke, í-ki̍p A-hi-ngá ê kiáⁿ Pa-sa ê ke kâng-khoán, in-ūi lí ū jiá góa siū-khì, koh hō͘ Í-sek-lia̍t-lâng hoān-chōe.’

²³ Koan-hē Iâ-sé-phek, Siōng Chú mā ū kóng, ‘Káu beh tī Iâ-su-lia̍t ê gōa-siâⁿ chia̍h Iâ-sé-phek.

²⁴ Sio̍k A-hap ê lâng, sí tī siâⁿ-lāi--ê, beh hō͘ káu chia̍h; sí tī iá-gōa--ê, khong-tiong ê chiáu mā ōe kā in chia̍h.’”

²⁵ (Chêng-kàu-taⁿ bô lâng chhin-chhiūⁿ A-hap, i siū ông-hō͘ Iâ-sé-phek sái-lōng, chhut-bōe ka-kī, chòe Siōng Chú khòaⁿ-chòe pháiⁿ ê sū.

²⁶ I chòe siōng khó-ò͘ⁿ ê sū, in-ūi i pài ngó͘-siōng, kap Siōng Chú tī Í-sek-lia̍t-lâng bīn-chêng kóaⁿ-chhut ê A-mô͘-lī-lâng chòe kâng-khoán ê sū.)

²⁷ A-hap thiaⁿ-tio̍h chiah-ê ōe, chiū thiah-li̍h saⁿ, chhēng chho͘-môa-pò͘, kìm-chia̍h, chhēng chho͘-môa-pò͘ khùn, sit-chì ut-chut kiâⁿ-lâi-kiâⁿ-khì.

²⁸ Siōng Chú ê ōe lîm-kàu Thê-su-pí-lâng Í-lī-a kóng,

²⁹ “A-hap tī góa ê bīn-chêng hiah-ni̍h khiam-pi, lí ū khòaⁿ--tio̍h-bô? In-ūi i tī góa ê bīn-chêng khiam-pi, só͘-í góa bô beh tī i chāi-siⁿ ê sî kàng chit-ê chai-hō; kàu i ê kiáⁿ choh-ông ê sî, góa chiah beh kàng chit-ê chai-hō hō͘ i ê ke.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan