Bìoball air-loidhne

列王紀上卷 20 - 現代台語譯本羅馬字版

Kap Sū-lī-a-lâng Kau-chiàn

¹ Sū-lī-a-ông Piān Hap-ta̍t tiàu-chi̍p i ê choân-kun, ū saⁿ-cha̍p-jī ê ông kap i khì, ū bé, ū chiàn-chhia, chiūⁿ-khì ûi-kong Sat-má-lī-a.

² Koh phài sù-chiá ji̍p-siâⁿ khì kìⁿ Í-sek-lia̍t-ông A-hap, tùi i kóng, “Piān Hap-ta̍t án-ni kóng,

³ ‘Lí ê kim gûn lóng tio̍h kau hō͘ góa, lí hiah-ê bó͘ kap kiáⁿ-jî siōng-súi--ê mā lóng sī góa ê.’”

⁴ Í-sek-lia̍t-ông ìn kóng, “Góa ê chú, góa ê ông, chiàu lí ê ōe, góa kap góa só͘-ū--ê lóng sī lí ê.”

⁵ Sù-chiá koh lâi kóng, “Piān Hap-ta̍t án-ni kóng, ‘Góa í-keng ū phài lâng khì kā lí kóng, ài lí chiong lí ê kim, gûn, bó͘, kiáⁿ-jî, lóng kau hō͘ góa.

⁶ Bîn-á-chài chit-ê sî, góa beh koh phài góa ê jîn-sîn lâi lí chia, chhiau lí kap lí ê jîn-sîn ê chhù, só͘-ū lí kah-ì--ê, in lóng beh the̍h--khì.’”

⁷ Í-sek-lia̍t-ông tiàu-chi̍p kok-lāi ê tiúⁿ-ló, tùi in kóng, “Lín khòaⁿ, chit-ê lâng tiau-tî chhē-phāng beh hāi góa; i ū phài lâng lâi góa chia, beh ài góa ê bó͘, kiáⁿ-jî, kap kim gûn, góa lóng bô kū-choa̍t.”

⁸ Tiúⁿ-ló kap chèng jîn-bîn lóng kā ông kóng, “Mài thiaⁿ i, mā m̄-thang tah-èng i.”

⁹ Só͘-í ông kā Piān Hap-ta̍t ê sù-chiá kóng, “Lín kā góa ê chú góa ê ông kóng, ‘Lí thâu chi̍t piàn phài lâng tùi lí ê po̍k-jîn iau-kiû--ê góa ōe hō͘ lí; m̄-kú chit-piàn ê iau-kiû góa chòe bōe kàu.’” Sù-chiá chiū tò-khì hôe-ho̍k.

¹⁰ Piān Hap-ta̍t koh phài lâng lâi, kóng, “Sat-má-lī-a ê thô͘-hún, nā ū kàu hō͘ tè góa ê lâng ta̍k-ê mi chi̍t pé, goān sîn-bêng ka-pē chek-hoa̍t góa.”

¹¹ Í-sek-lia̍t-ông ìn kóng, “Lín kā i kóng, ‘Tú-á chhēng chiàn-kah--ê, m̄-thang chhin-chhiūⁿ thǹg chiàn-kah--ê khoa-kháu.’”

¹² Piān Hap-ta̍t kap hiah-ê ông tī pò͘-pîⁿ lāi lim-chiú, thiaⁿ-tio̍h chiah-ê ōe, chiū kā i ê jîn-sîn kóng, “Pâi-tīn chìn-kong!” In chiū pâi-tīn kong-siâⁿ.

¹³ Ū chi̍t ê sian-ti lâi kìⁿ Í-sek-lia̍t-ông A-hap, kóng, “Siōng Chú án-ni kóng, ‘Lí ū khòaⁿ-tio̍h chit tōa-tīn lâng--bô? Khòaⁿ leh, kin-á-ji̍t góa beh chiong in kau tī lí ê chhiú, lí chiū chai góa sī Siōng Chú.’”

¹⁴ A-hap kóng, “Beh phài sím-mi̍h-lâng?” I ìn kóng, “Siōng Chú án-ni kóng, ‘Ēng chiah-ê séng-tiúⁿ ê siàu-liân kun-peng.’” A-hap kóng, “Sím-mi̍h-lâng beh chhōa-thâu chìn-kong?” I ìn kóng, “Chiū-sī lí.”

¹⁵ A-hap chiū tiám-sǹg séng-tiúⁿ ê siàu-liân kun-peng, ū nn̄g-pah saⁿ-cha̍p-jī miâ; āu-lâi i koh tiám-sǹg Í-sek-lia̍t ê kun-peng, kiōng chhit-chheng miâ.

¹⁶ Ji̍t tiong-tàu, in chiū chhut-chiàn. Piān Hap-ta̍t kap hiah-ê lâi pang-chān i ê saⁿ-cha̍p-jī ê ông, tī pò͘-pîⁿ lāi lim chiú-chùi.

¹⁷ Hiah-ê séng-tiúⁿ ê siàu-liân kun-peng chòe thâu chhut--khì. Piān Hap-ta̍t phài lâng khì thàm-cha, in hôe-ho̍k kóng, “Ū lâng tùi Sat-má-lī-a chhut--lâi.”

¹⁸ I kóng, “Put-koán sī chhut-lâi beh kóng-hô, á-sī beh kau-chiàn, lóng kā in oa̍h-oa̍h lia̍h--khí-lâi.”

¹⁹ Hiah-ê séng-tiúⁿ ê siàu-liân kun-peng chhut-siâⁿ, kun-peng tè in;

²⁰ ta̍k-ê lâng thâi-sí i ê tùi-te̍k. Sū-lī-a-lâng tô-cháu, Í-sek-lia̍t-lâng jip in. Sū-lī-a-ông Piān Hap-ta̍t khiâ-bé, kap hiah-ê bé-peng tô-cháu.

²¹ Í-sek-lia̍t-ông chhut-siâⁿ, kong-kek hiah-ê chiàn-chhia kap chiàn-bé, thâi-sí chin chōe Sū-lī-a-lâng.

²² Hit-ê sian-ti lâi kìⁿ Í-sek-lia̍t-ông, tùi i kóng, “Lí tio̍h ka-kiông kun-le̍k, beh chòe sím-mi̍h tio̍h hó-hó kè-ōe; mê-nî chhun-thiⁿ, Sū-lī-a-ông ōe koh lâi kong-kek lí.”

Sū-lī-a-lâng koh Lâi Chhim-hoān

²³ Sū-lī-a-ông ê jîn-sîn tùi i kóng, “Í-sek-lia̍t-lâng ê Siōng-tè sī soaⁿ-sîn, só͘-í in thâi-iâⁿ lán; m̄-kú nā tī pêng-goân kap in kau-chiàn, lán it-tēng ōe thâi-iâⁿ.

²⁴ Chhiáⁿ lí án-ni chòe; kái-tû hiah-ê ông ê chit-bū, phài séng-tiúⁿ tāi-thòe in.

²⁵ Koh chiàu lí sún-sit ê sò͘-bo̍k chio-bō͘ chi̍t tūi kun-peng, chiàn-bé pó͘ chiàn-bé, chiàn-chhia pó͘ chiàn-chhia. Lán tī pêng-goân kap in kau-chiàn, ún-tàng iâⁿ.” Ông chiū thiaⁿ in ê kiàn-gī khì chòe.

²⁶ Keh-nî chhun-thiⁿ, Piān Hap-ta̍t tiám-sǹg Sū-lī-a-lâng, chiūⁿ-khì A-hut, beh kap Í-sek-lia̍t-lâng kau-chiàn.

²⁷ Í-sek-lia̍t-lâng mā tiàu-chi̍p kun-peng, chún-pī kun-niû, chhut-khì beh kap in kau-chiàn, tī in ê tùi-bīn chat-iâⁿ. Í-sek-lia̍t-lâng chhin-chhiūⁿ nn̄g tūi sió-kûn ê soaⁿ-iûⁿ-á; m̄-kú Sū-lī-a-lâng piàn-móa tōe-bīn.

²⁸ Ū chi̍t ê Siōng-tè tiōng-iōng ê lâng lâi kìⁿ Í-sek-lia̍t-ông, kóng, “Siōng Chú án-ni kóng, ‘In-ūi Sū-lī-a-lâng kóng Siōng Chú sī soaⁿ-sîn, m̄-sī pêng-goân ê sîn, só͘-í góa beh chiong chit tōa-tīn ê lâng lóng kau tī lí ê chhiú; lín chiū chai góa sī Siōng Chú.’”

²⁹ Í-sek-lia̍t-lâng kap Sū-lī-a-lâng sio-tùi chat-iâⁿ chhit ji̍t; kàu tē-chhit ji̍t, siang-pêng kun-peng kau-chiàn. Tī hit chi̍t ji̍t, Í-sek-lia̍t-lâng thâi-sí Sū-lī-a-lâng pō͘-peng cha̍p-bān.

³⁰ Kî-tha ê kun-peng tô-cháu ji̍p-khì A-hut-siâⁿ; hit-ê siâⁿ ê siâⁿ-chhiûⁿ tó, teh-sí só͘ chhun ê nn̄g-bān chhit-chheng lâng. Piān Hap-ta̍t cháu ji̍p-siâⁿ, bih tī chi̍t keng chhù ê ba̍t-pâng.

³¹ I ê jîn-sîn kā i kóng, “Goán thiaⁿ-kóng Í-sek-lia̍t-ke ê ông lóng chin jîn-chû; kiû lí ún-chún goán io hâ môa-pò͘, ām-kún thò-soh, chhut-khì tâu-hâng Í-sek-lia̍t-ông; kiám-chhái i ōe lâu lí ê sìⁿ-miā.”

³² In chiū io hâ môa-pò͘, ām-kún thò-soh, khì kìⁿ Í-sek-lia̍t-ông, kóng, “Lí ê po̍k-jîn Piān Hap-ta̍t kóng, ‘Kiû lí lâu góa ê sìⁿ-miā.’” A-hap kóng, “I iáu oa̍h--teh o͘h? I sī góa ê hiaⁿ-tī.”

³³ Hiah-ê lâng chim-chiok thiaⁿ i ê kháu-khì, liâm-piⁿ sūn i ê ōe-bé kóng, “Sī, Piān Hap-ta̍t sī lí ê hiaⁿ-tī.” A-hap kóng, “Lín khì chhōa i lâi.” Piān Hap-ta̍t chhut-lâi kìⁿ ông, ông chiū chhiáⁿ i chē ông ê chhia.

³⁴ Piān Hap-ta̍t tùi A-hap kóng, “Góa ê lāu-pē tùi lí ê lāu-pē chhiúⁿ--lâi ê siâⁿ, góa lóng beh hêng lí; koh lí thang tī Tāi-má-sū-kek siat siong-tiûⁿ, chhin-chhiūⁿ góa ê lāu-pē tī Sat-má-lī-a siat--ê kâng-khoán.” A-hap kóng, “Góa chiàu chit-ê iok pàng lí tò--khì.” A-hap chiū kap i tēng tiâu-iok, pàng i tò--khì.

Sian-ti Chek-pī A-hap

³⁵ Ū chi̍t ê lâng, sī sian-ti ê ha̍k-seng, hōng Siōng Chú ê ōe kā i ê tâng-phōaⁿ kóng, “Phah góa!” Hit-ê lâng m̄-khéng kā i phah.

³⁶ I chiū kā i ê tâng-phōaⁿ kóng, “In-ūi lí m̄ thiaⁿ Siōng Chú ê ōe, lí chi̍t-ē lī-khui góa, ōe hō͘ sai kā-sí.” Hit-ê lâng chi̍t-ē lī-khui, kó-jiân tú-tio̍h sai, hō͘ sai kā-sí.

³⁷ I koh tú-tio̍h chi̍t ê lâng, kā i kóng, “Phah góa!” Hit-ê lâng chiū kā i phah, phah kàu tio̍h-siong.

³⁸ Sian-ti chiū chiong thâu-kun khàm kàu ba̍k-chiu, kái-chong, tī lō͘--ni̍h thèng-hāu ông.

³⁹ Ông tùi hia keng-kè ê sî, i tōa-siaⁿ tùi ông kóng, “Lí ê po̍k-jîn chhut-chiàn ê sî, ū chi̍t ê lâng lia̍h chi̍t ê hu-ló͘ lâi kau góa, kóng, ‘Lí tio̍h kò͘-siú chit-ê lâng; i nā cháu--khì, lí ê sìⁿ-miā tio̍h thòe i ê sìⁿ-miā; nā bô, lí tio̍h kau-chhut saⁿ-cha̍p-sì kong-kun ê gûn.’

⁴⁰ Lí ê po̍k-jîn bô-êng chit-hāng hit-hāng ê sî, hit-ê hu-ló͘ sòa cháu--khì.” Í-sek-lia̍t-ông kā i kóng, “Lí ê ōe í-keng kā ka-kī phòaⁿ-chōe ah.”

⁴¹ I kóaⁿ-kín chiong khàm ba̍k-chiu ê thâu-kun the̍h-tiāu; Í-sek-lia̍t-ông chiū jīn-chhut i sī chi̍t ê sian-ti.

⁴² I kā ông kóng, “Siōng Chú án-ni kóng, ‘In-ūi lí chiong góa koat-tēng beh húi-bia̍t ê lâng pàng hō͘ khì, só͘-í lí ê sìⁿ-miā tio̍h thòe i ê sìⁿ-miā, lí ê jîn-bîn tio̍h thòe i ê jîn-bîn siū húi-bia̍t.’”

⁴³ Í-sek-lia̍t-ông chiū ut-chut bô hoaⁿ-hí, tò-khì Sat-má-lī-a i ê ông-kiong.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan